topbella

الأحد، 22 نوفمبر، 2009

خلاااص ماما قررت تبقي بابا+تحديث

اتخذ شهر يار مجلسه المعتاد ...

ونادي بأعلي صوته بت يا شهر زاد...

تعالي احكي لي الحدوته بسرعه عشان خلاص جه الميعاد ...

قالتله روح اتلهي علي عينك يا راجل دالاهو وقت حواديت ولا حكايات ...

انا بقالي ثلاث أيام مش بنام ...

سهرانه قدام التلفزيون بتابع تفاصيل وكستنا في السودان...

تعبت واتعصبت وانفعلت
ودمي فار من كتر الغليان ...

مع اني وانت عارف لا اهلاويه ولا زملكاويه ولا باشجع اي فريق كان...

يعني فرجتي علي ماتشات المنتخب ماهي الا تعبير مني عن الوطنيه والامتنان ...

لوطني الغالي عندي غلاوة القرد اللي أمه بتشوفه بعنيها غزال ...

شهر يار بص لها بعطف وقال...

تعالي يا حبيبتي جنبي نفكر مع بعض بدال ما تقلب معاكي بعد الشر بجنان...

وبعد ماهديت شويه قعدت معاة وقالوا نراجع مع بعض الحكايه من اولها بالتمام والكمال...

عشان نعرف لينا حق نزعل ولا الغلط من عندنا كمان ...

وقعدت شهر زاد تحكي الحكايه وشهر يار بيسمع بكل اهتمام...

في أول الحكايه:

منتخبنا الهمام في بدايه التصفيات مكانش واخد الموضوع بجد في الحسبان...

وقعد بسلامته يتهزم ويتعادل وف الخط ينام...

لحد ما اتهزمنا علي ايد الجزايرالهزيمه التمام...

واحنا في الجزاير حصل شغب من جمهورهم المصاب بالجنان

وولعوا نار وشماريخ في الملعب قبل وأثناء وبعد المباراة كمان...

وكان في محاوله لتسميم ولادنا في وجبه الكسكسي اللي مكانتش تمام...

ده غير الطبل والزمر الليل بطوله وده كله خلي منتخبنا ميعرفش ينام ...

طيب سكتنا ليه علي كل اللي حصل لنا ...

وليه اتحاد الكورة بتاعنا مخدش اجراء يحفظ بيه حقنا...

(عشان مصر بالنسبه للعرب ماما وماما لازم تغفر وفي حقها تسامح
)


عنها ووقعنا في حسبه برما واتزنقنا المزنق التمام...

ولازم نخرج من عنق الزجاجه ونفوز علي زامبيا ورواندا كمان...

وحصلت المعجزة وفوزنا عليهم ورجعت الحكايه تمام ...

ومن يوم ماكسبنا في ماتش رواندا الوضع اتغير تمام ...

و فجأة.. يا مصري بقي وصولنا لكاس العالم ...

الهدف القومي المصري
اللي مكنش في الحسبان...

وشحنت الدوله كل أجهزتها و مواردها وسخرتها لخدمه المنتخب المصري الهمام...

أما عن الاعلام المصري الحكومي والخاص كمان...

هاااااتك يا أغاني وطنيه وجو تعبئه عامه متصورنهوش في الاحلام...

لدرجه اننا صدقنا ان وصولنا لكاس العالم هو بر الأمان...

ولو حصل يبقي خلاص لا هيبقي في بطاله ولا فقر ولا حد مصري في الطل هينام...

ولا ميه ملوثه ولا زباله ولا ظلم ولا طوارئ ...

وكل مشاكلنا هتبقي خلاص في خبركان...

بالذمه
في دوله يا عالم يبقي هدفها القومي تكسب ماتش كورة يا جدعان...

ده مكانش حد فيكي يا مصر طفل... شاب... راجل... بنت ...حتي ستات البيوت كمان ....

اللي في الكورة بيفهم واللي مالهوش في الكورة كمان...

كله بيدعي لمصر توصل كاس العالم و ترسي يا عيني علي بر الأمان...

واللي مطير برج من عقلي وقرب يسبب لي جنان...

لما قياداتنا الرشيدة تقدر تعمل هدف قومي وتهيأ لنجاحه كل الأركان...

ليه متختارش هدف مفيد لمصر وللمصريين كمان...

زي القضاء علي الأميه المنتشرة ونصف الشعب في الجهل غرقان...

أو النهوض بالتعليم اللي لا بقا ينفع معاه تبديل ولا احلال ...

وخلاص منظومته باظت وعايز يتهد ويتبني من جديد من كل الأركان...

أو البحث العلمي مثلا بعد ما طفشوا الباحثين بحجه ضعف الميزانيه اللي بتروح كلها للأغاني والأفلام...

ساعتها الشعب كله هيلتف حواليهم ويساعد بكل حماس في البنيان....

ده الشعب عطشان وطنيه وكلمه مصر علي لسانه أحب الكلام...

اذا كان في ماتش كورة رفعوا العلم ودعوامن قلبهم لمصر كمان...

واللي حتي لو كنا وصلنا كاس العالم مكنش حد فينا هيطلع كسبان ...

غير بس اللعيبه اللي السما هتمطر عليهم ملايين من قوتنا بعد رجوعهم من السودان...

دي أمثله قليله للأهداف الجادة لو خلصت النوايا للاصلاح والبنيان...

بس يا خسارة مش باين منهم غير كل نيه عشان يعيشونا في لهو ورا لهو

وتوهان ورا توهان...

ويكملوا لعبتهم اياها ويلهونا في حاجه هبله ويدبروا هما الاعيبهم التمام...

وكملت القصه بالمصيبه التمام:

بعد ماخرجنا من كاس العالم واتهد الهدف القومي علي راس اللي بنوة...

وعلي راسنا احنا كمان...


لسه مفوقناش من قلم الهزيمه الا وفوقنا ع الوكسه التانيه كمان...

قال ايه اتهان المصريين وانضربوا في السودان...

واتداس علي العلم المصري واتحرق كمان ...

وحرقوا مقرات الشركات المصريه في الجزاير وحاصروا المصريين كمان ...

وبمناسبه عيد الأضحي هربنا زي الخرفان...

فجأة
اتفاجأ حكامنا ان المصري بيتهان ...

طب ايه الجديد يا فندم ولا انتوا عندكوا لا مؤاخذة طرش في الودان...

ماطول عمر المصري بيتهان في الخليج وفي كل حته وطالع عين اللي جابوة كمان...

ولا يعني عشان المرة دي اللي اتهان ناس قيمه وسيمه وورثه ووزرا وحزب واعلام...

وممثل هشك بشك طول عمرة في مصر متكرم ومتصان ....

في الوقت اللي العلما بياخدوا صابونه من كل تكريم ومهرجان...

محدش فينا يقبل بالأهانه لا المرة دي ولا المرات اللي فاتت كماااااااااان ...

المصريين كلهم كرامتهم لازم تتصان ...

والناس في كل حته لازم يحطوا كرامه المصري في الحسبان ...

دي القوة والمصلحه هي لغه هذا الزمان ...

القوي يا حضرت بس هو اللي بيحترم في هذا الزمان...

ومصر محدش هيحترمها الا لو ظهرت لها أنياب وظفران...

تدافع بها عن نفسها وعن أبناءها في كل مكان...

أما التشدق ب مصر هي الأم وكل يوم تاخد علي قفاها من واحده من ولادها قبل ماتنام ...

يبقي دلوقتي لازم تبقي بابا ويطلع لها شنبات تبرمهم كمان...

وبابا يمسك الخرزانه ويربي قللات الربايه لحد مايبقوا عيال تمام ...

ولما يتربوا ويعرفوا غلطهم ويعتذروا كمان ...

يرجع ياخدهم في حضنه تاني ويجيبلهم عسليه ولبان...

وهنا أدرك شهر زاد الصباح ...

فمعرفتش تحط منطق وسكتت عن الكلام المباح...

كوكوكوكو

تحديث:

أنا هاغيب عن النت فترة بسيطه وراجعه تاني ان شاء الله
واعذروني لو مقدرتش اتابع مدوناتكم بس ان شاء الله هارجع اقرا كل البوستات الي فاتتني...

هناك 9 تعليقات:

ستيتة حسب الله الحمش يقول...

البحث العلمي مثلا بعد ما طفشوا الباحثين بحجه ضعف الميزانيه اللي بتروح كلها للأغاني والأفلام...

بتقلبي عليا المواجع يا بنفسجاية؟
عااااااااااااااااااااااااااااااا

بوست روعة

أحمـــــــــــــد أبو العلا يقول...

تحفه البوست ده
ياسلام على الكلام الموزون قافيه ومعنى كمان

قولي ياشهرزاد انتي وشهريار يمكن حد يسمع ولا يصدق

فتاه من الصعيد يقول...

ههههههههههههه

تفاهه وهيافه يا بنتي .... ماتش كوره عبيط والدنيا ولعت

تحياتي

donya يقول...

مساء الخير
هههههههههههه
بجد بجد بوست جميل جدا
ماشاء الله عليكي كتباه حلو اوي

شهرذاد هتغير منك

كل سنه وانتي طيبه

تحياتي

أحمد الصعيدي يقول...

السلام عليكم ورحمة الله

عيد عليكم مبارك
وكل عام وأنتم بخير

micheal يقول...

هههههههههههههه..المفروض تبقى النهاية بأغنية عدى النهار بدل كوكوكو
بس بجد أنا متفق مع شهرزاد في كلام كتير
ليه نختصر الهدف القومي في جلد منفوخ هوا
جميل أننا نوصل كاس العالم ونفرح بس الأجمل أننا نتقدم في شتى المجالات
يعني أمريكا مثلا كبيرها بتوصل الدور الثاني في كاس العالم
الصين مش بتوصل اصلا
هندوراس وصلت كاس عالم..معنى كده أنها بقت قوة عظمى؟
:)
عيد سعيد
تحياتي

البنفسج الحزين يقول...

د:ستيته:
وانا كمان مقروصه من موضوع البحث العلمي اوي لأني علومانجيه وباحثه وعارفه كويس اساليب التطفيش ومن قلبي بقول معاكي عاااااااااااااااااااااااا


أحمد أبو العلا:
ميرسي يا فندم علي ذوقك ده بعض ما عندكم...


فتاة من الصعيد:
ماهو ده الي مجنني أنا ماعنديش مانع تولع بس في المفيد...


donya:
اشكرك ...ومش مشكله أنا وشهر زاد واحد وأكيد مش هتغير مني ...تحياتي

أحمد الصعيدي
كل سنه وانت بألف خير
بس ماعلقتش ع البوست ليه ؟

العميد مايكل:

شهر زاد باعتالك السلام ومبسوطه انك متفق معاها في الكلام هههههههه
تحياتي...

micheal يقول...

في إنتظار بوست جديد

عمرو امام يقول...

انا اول مرة اعلق عندك
ودة طبعا تقصير منى بس انا فعلا مقل

بوست جميل

مع فائق احترامى