topbella

الأحد، 31 يناير، 2010

منصورة ودايما منصورة...


يا حبيبتي يا مصر يا مصر وولادك رجعولك بالنصر...

عظيمه يا مصر واللي يكرهك عمرة ماهيشوف النصر...

والله وخدنا الكاس ومصر هتفضل مرفوعه الراس...

حقك تفرحي يا بلادي كاس افريقيا بقا ملاكي...

والله وعملوها الرجاله وخلوا الجزاير حصاله...

بلدنا في القلوب متشاله....والحسرة خلاص م القلوب متشاله....

مبروك يا مصر ....

دايما يا رب منصورة....في الكورة وفي غير الكورة ....

اللي جايه دي بقا اهداء لمنتخب الجزاير الشقيق//

ولكل مغرور ومعتدي وظالم....

(ارقصي يا خضرا لأمش قادرة رقصوا حد غيري أربعه هدوا حيلي )



الاثنين، 25 يناير، 2010

قارئ الأفكار


أوقات كتير باتمني تبقي عندي القدرة علي قراءة أفكار الناس

اللي بتعامل معاهم في حياتي

معرفش ليه؟ يمكن علشان أنا عموما باحب اعرف الناس شايفاني ازاي...

أو أنا في عيون الأخرين...

يمكن برضه عايزة أعرفمين صادق معايا

ومين بيخدعني ...ما علينا......

طب لو تخيلنا ان أصبح عندنا الملكه دي يعني انت تقدر

تعرف اللي قدامك بيفكر في ايه ..

فهمت حاجه ...أبسطهالك

يعني هنفترض ان العلماء اخترعوا جهاز يمكنك لما تستخدمه

انك تقرا أفكار الشخص اللي قدامك وانت بتكلمه ...

تفتكروا ياتري ده هيكون تأثيرة ايه علي علاقاتك باللي حواليك؟؟؟

ياتري اللي هتكتشفه هيوطد العلاقات دي

ولا هتكتشف حاجات تخليك تنسف العلاقات دي من أساسه؟؟

دي حوارات اتخيلتها بين أشخاص هنشوفها ...

قبل وبعد استخدام الجهاز السحري بتاع قراءة الأفكار..

ده حوار بين شاب وشابه زملاء في نفس مكان العمل:


هي شابه جميله وهو شاب وقور و أمور

لكن في بدايه حياته يعني لسه مكونش نفسه....
تعالوا نشوف الحوار :

هي:صباح الخير يا أستاذ كريم..

هو :صباح النور يا انسه نيفين...

هي:ممكن لو سمحت تفهمني الشغل ده يخلص ازاي

علشان الشغل ده جديد عليا والمدير كلفني بيه...

هو :أه ممكن طبعا مفيش مشكله...

اللي هيسمع الحوار هيقول انه حوار عادي جدا

بين أي اتنين زملاء في العمل

وده الكلام اللي اتقال علي اللسان....

أما بقا لو شغلنا جهاز قارئ الأفكارهيبقا الحوار بالشكل ده:

هي:ايه ده وده جه امته المنيل علي عينه

دانا عيني اتلوحت وانا عماله

ابص علي باب الشركه عشان اشوفه وهو داخل

ايه؟ كان لابس طاقيه الاخفا...

المهم أما اروح انكشه كده

واهو شويه الشغل اللي في ايدي ده حجه

اروح له بيها يمكن يتلحلح شويه

ويتكلم بقا جاته البلا قرفني ...

هو:صباح العسل يا مزة ايه يابت الحلاوة دي ع الصبح

ارحميني بقا الله يحرقك...

قال شغل جديد عليها قال ...

بيتهيألي كده انها حجه عشان

تقف تتكلم معاك ياد يا كريم

واقعه واقعه يعني...

هو:بس البلوزة دي أحلي م اللي كانت لابساها امبارح

التانيه كانت متخناها قوي انما دي مخلياها زي المانيكان...

هي:ايوه كده كويس انك حلقت دقنك

لما مبتكونش حالقها باحس اني باتكلم مع أبو جهل..

شكلك بيبقي وحش قوي...

لما بتحلقها بقا بيتبقي قمر شبه

الواد المضروب اللي اسمه أحمد عز

هي:ايه يا بني عينك هاتطلع عليا طب ايه واكل سد الحنك ليه

متتنيل تتكلم وعليا النعمه ماهطلب منك حاجه فوق طاقتك

هو:يا شيخه الواحد كل مايشوفك بيفتكر حاله المنيل

بقا انا لو معايافلوس دلوقتي مش كنت اتجوزتك

بدل الشحططه اللي انا فيها دي ...

منكوا لله ياللي في بالي ...يالي واكلينها والعه

وسايبينا احنا نغني ظلموة...

أفتكر كده الحوار اختلف تماما ...

**********************

وده حوار بين مذيع مشهور من مذيعي التوك شو ومسئول كبير في الحكومه ...

المذيع:ممكن حضرتك يا فندم تقولنا ايه هي أهم أولويات الحكومه في المرحله القادمه؟

المسئول: شوف أهم حاجه عند الحكومه واللي حطاها علي قمه أولوياتها

هي مراعاة محدودي الدخل ...وأظن ده واضح من تحسن أحوال محدودي الدخل

في السنوات اللي فاتت...واللي كنت باشرف فيها بتولي أعباء المسؤليه ...

المذيع:طب يا فندم تفتكر ليه محدودي الدخل مش حاسين بالتحسن اللي حضرتك بتقول عليه؟

المسؤل:التحسن تدريجي وهتظهر اثارة علي المدي البعيد ...

المشكله ان الناس دايما مستعجلين ومعندهاش بعد نظر...

المذيع: يا فندم في اشاعات بتتردد في الفترة الأخيرة ان حضرتك
بتخصص أراضي ملك الدوله لبعض أقاربك يا تري رد حضرتك ايه علي الشائعات دي؟

الوزير :لا طبعا دي اشاعات مغرضه وانا عمري في حياتي ماخالفت القانون ابدا

والشجرة المثمرة دايما هي اللي بتتحدف بالطوب

ودول ناس حاقدين عليا وعلي نجاحي...

وانا من خلال برنامجك الشهير

باهديلهم اغنيه فريد الأطرش...يا عوازل فلفلوا.....

ده طبعا كان الحوار المذاع علي الهوا....واللي اتقال علي اللسان

أمابقا لو شغلنا الجهاز العبقري بتاع قراءة الأفكار هيكون الحوار بالشكل ده:

المذيع: ارغي يا عم الأمور صدعنا بكلامك الفارغ اللي كلنا عارفين انه ضحك ع الدقون...

المسؤل:طب هاقوله ايه ده..

اذا كنت أنا نفسي من كتر ماكررت الكلام حفظته...

هواحنا خلفناهم ونسيناهم احنا فاضيين لهم

لما هنوزع فلوس البلد ع الفقرا والشحاتين احنا هيفضلنا ايه؟

جاتكوا القرف مليتوا البلد ....

المذيع: والنعمه عارف انك هتقول الاجابه دي مانا كل سنه

باعمل معاك نفس الحوار وبتقول نفس البقين دول

والحكايه بتطربق علي راس الشعب أكتر وأكتر....

المسؤل:طبعا مش حاسين بتحسن علشان مفيش أصلا تحسن...انت صدقت ولا ايه.....

المذيع: شوف بقا أنا صبرت عليك كتير وانت سايق فيها ومقضيها كدب من أول اللقاء

طب خد القاضيه بقا عشان تعرف اني كاشفك....

والنبي لافضحك وأجيب سيرة أرض الساحل اللي قاللي عليها
شبطه السكرتير بتاعك

بعد مالطش مني باكوين...
مش مهم كله عشان اجيب سبق وابقي مذيع متصيط...

الوزير : ايه ده طب وده عرف موضوع أرض الساحل ازاي دانا لسه مخصص الارض للواد ابني امبارح مافيش غير

الواد شبطه السكرتير الخصوصي بتاعي هو اللي اكيد سرب الخبر أما انك واد نتن صحيح كل ده عشان كنت واعده

ب25 باكو واديته 20 بس بتبعني عشان 5 بواكي يا معفن بس أقول ايه فيك يا شبطه يا بن بهانه هتعيش معفن

وتموت معفن عمرك ماهتبقي نصاب محترم ابدا ...

وبكده طبعا اختلف شكل الحوار تماما..

عرفتوا بقا ان عدم القدرة علي قراءة الأفكار رحمه.....




الجمعة، 15 يناير، 2010

نتائج هامه جدا...

سلام عليكم...

دلوقتي جه وقت تحليل اراء حضاراتكم (اللي عرفتها طبعا من خلال تعليقاتكم)

وفرزهاعشان نوصل للسبب الحقيقي

في انحدار مستوي الأخلاق في الشارع المصري...

وبناء عليه نقترح الحلول اللي ممكن نعملها

عشان نرجع الاخلاق تاني لشارعنا ولنفوسنا...

وده طبعا علي أساس ان الشارع

ماهوالا مرايه بنشوف فيها اخلاقنا وصلت لفين ...

ممكن نلخص الاسباب اللي حضاراتكم قولتوها في الاتي:

1)ضياع الهوية ...
2):
غياب القدوة ...

3) التحولات الاجتماعيه والمعيشيه التي مر بها المجتمع المصري:

(هذا السرد الرائع ورد في تعليق بحر الالوان)

بدءا بالمجتمع الزراعيالمطعم بملامح الدولة البيروقراطيه التي تحكمها دولة الموظفين

حيث كانت هنالك سمات عامة وواضحة لفئة المزارعين او الموظفين او التجار .....

وكان هناك درجه من الترابط والتقارب ما بين تلك الطبقات و علي مستوي الاسرة الصغيرة

كان امرا فاعلا في تماسك هذا العرف ...

وباتجاه المجتمع المصري نحو ملامح المجتمع الصناعي مع بدايات الثورة

ثم نحو مجتمع الاستهلاك مع بدايات عصر الانفتاح

وصولا الي مجتمع الفردية المطلقة والذي نعيشه حاليا ...

كل ذلك أدي الي انهيار الملامح القديمة للمجتمع المصري

التي كان يسيطر عليها العرف بشكل رئيسي

وتحول هذا العرف الي مجرد قواعد بالية ومحصورة في نطاقات ضيقة للغاية .....

4):الاحساس بغياب العدالة ....

وهو شعور يغذي كل ما هو قبيح ....

سواء الانتهازية او الفوضي او النعرات الطائفية او حتي الطبقية والعنصرية

واحساسنا ان بلدنا عندها إمكانيتها وقدراتها ومواردها كبيرة جدا ووفيرة

ولكن الوفرة دى بتتوزع توزيع غير عادل

وعشان كده كل واحد بيحاول ياخد حقه بطريقته الخاصة

بأنه بياخد حتى اللى مش من حقه حتى ولو بشكل غير شرعى

واصبح لكل منا له قانونه وحدد كلا منا لنفسه تشريعات ووحدود طبقا لقانونه

(وده كان كلام Eng:elsayed)

وكل فرد او فئة تستلهم الشريعة التي توافق هواها ....

ويستطيع الفرد ان يلتزم بالعرف متي احب او ان يتملص من اوامره متي اراد...

يعني زي مابيقول Eng:elsayed كل واحد فينا بقي رئيس جمهورية نفسه...

5):انغماس المصريين والعرب عموما في النزوات والشهوات:

فنسوا دينهم وسماحته وقواعده واصوله حتي العادات والتقاليد والاحترام

وكل أصناف التربية الحسنة فنزع الله الحياء من بناتنا

والشهامة والنخوة من دماء رجالنا

وأصبحنا كالعشب النئ موته يشبه حياته...

(وده كان رأي الاستاذ أحمد الصعيدي)

أما اراء الاخوة الغير مصريين في الموضوع:

جاندني من غزة : بتسأل باستغراب اذا الامور فعلا وصلت عندنا للدرجة دي

وبتقول لو فعلا كده تبقي مصيبه...

وانا بدوري باجاوبها اه للأسف يا جاندني واكتر كمان وطبعا

اوافقك الرأي انها مصيبه...

مستر حازم من غزة... علق علي فكرة تقديرنا وتعظيمنا للممثلين وتجاهل العلماء والناس اللي بجد تستحق التكريم

وقال ان المشكلة ان احنا بشكل عام نعطي من لا يستحق الاهمية اكثر مما هو يستحق...

خواطر شابه من المغرب :

لا تري اختلاف بين ما يحدث في شارعنا والشارع المغربي

وتقول مشاكلنا واحدة والاختلافات بسيطة جدا المشكلة اننا موحدون

فقط في تخلفنا ومشاكلنا ...

هذا فقط هو الذي نجحنا في ان نتوحد فيه...

اما ما فيه الخير والمصلحة فالفرقة هي شعارنا للاسف...

ودلوقتي بعد ما عرفنا الاسباب لازم نقترح الحلول :

في حلول في ايدينا احنا يعني ممكن كل واحد فينا ينفذها ويبدأبنفسه وهي:

1):تعميق الانتماء في نفوسنا لبلدنا كل واحد فينا يراجع تاريخ بلده كويس

( ويتناسي شويه الحال اللي احنا فيه) وخصوصا اوقات العزة والانتصار والقوة

عشان يعرف أو يتذكر قيمه مصر الحقيقيه والتاريخيه

بعيدا عن محاولات التشويش والتقليل من الشأن التي نمر بها الان

فالتاريخ لا يكذب ابدا لأنه ماضي والماضي لا يعود...

2):كل واحد فينا يدور علي القدوة والمثل الأعلي اللي بجد

حواليه ويراجع تاريخه ومسيرته وازاي وصل للي هو فيه

ويحاول يمشي في نفس طريقه...

وصدقوني أكيد هنلاقي كتير مصر مليانه ناس زي الفل ...

3):استرجاع فكرة العمل الجماعي وروح الفريق اللي فقدناها

(يد الله مع الجماعه)

والحلين الجايين دول طبعا مش بايدينا دول بايدين اللي حاكمينا

ومش هيحصلوا الا لو خلصت النوايا بتاعتهم للمصلحه العامه

للوطن مش لكراسيهم ...

4):قانون نابع ومتوافق مع البيئة المصرية , ومستمد من منابعها الوسطية سواء عرفا او شريعة .....

والاهم بالطبع ان يكون القانون حاضرا دائما والكل امامه سواء .

5):شئ أساسي ومهم وضروري جدا هو فكرة الهدف القومي

صدقوني المصريين كلهم هيتوحدوا وهيرجعوا يحبوا بعض ويخافوا علي بعض

من تاني لو في هدف واحد بيجمعهم علشان في الحاله دي هتبقي المصلحه واحده...

وفي النهايه باشكركم علي اثراء الحوار

بارائكم الجميله اللي انا شخصيا استفدت منها جدا ...




الثلاثاء، 12 يناير، 2010

الشارع المصري... الي أين؟ + تحديث



البوست ده كنت كاتباة قبل البوست اللي فات...

هو صحيح البوستين بيتكلموا عن الشارع المصري ...

بس التناول مختلف تماما...

انا فضلت انشر الصور المضحكه الأول...

عشان نضحك شويه ونقعد نمدح

في نفسنا شويه ونقول المصري

دمه خفيف وابن نكته والحاجات دي ...

وخلاص ضحكنا ودلوقتي جه وقت الجد...


****أن أن أه***


أنا دايما باسأل نفسي: هو احنا ليه بنلوم دايما علي كتاب الدراما

وكتاب الافلام انهم بيظهروا الشعب المصري في الافلام المعاصرة ...

في صورة شعب عشوائي وألفاظه نابيه؟؟؟

زي أفلام خالد يوسف مثلا( حين ميسرة وهي فوضي )

مع تحفظي الشديد جدا علي أفلام هذا المخرج...

يعني السؤال هو مين اللي بيستقي معلوماته من التاني

يعني مؤلفين الدراما بياخدوا من الواقع ويكتبوا ؟؟؟

ولا الناس بتتأثر باللي بيتقال في الدراما وبتقلدة؟؟؟

يعني هل السناريست في الافلام دي بيبالغ في فجاجه الالفاظ اللي

بتتقال علي لسان الابطال اللي هما بيمثلوافي الفيلم عامه الشعب المصري...

ولا فعلا هوده الشعب المصري دلوقتي...

لما بحاول ألاقي اجابه علي السؤال ده: بقول لنفسي

طب امشي في أي شارع في اي حته في مصر النهاردة...

حتي لو في حي راقي بلاش عشوائي...

واسمعي الالفاظ اللي تلات أرباعها خادشه للحياء...

و بتتقال علنا...

*********

بلاش كده: مين فينا دلوقتي بيشوف راجل يقف ويقعد ست أوبنت

في المواصلات العامه...

نادر جدا

***********

افرض انك اتعرضت للسرقه النهارده

وانت ماشي في الشارع هل هيحصل المشهد

اللي بنشوفه في افلام زمان بتاع الناس الكتير

اللي بتجري ورا الحرامي

وبتقول حرامي حرامي ...

عشان يسلموة للشرطه...

في حد أصلا هيبص عليك

ولا يهتم باللي حصلك...

كام واحد؟؟؟

وحتي لو وقف وسألك ايه اللي حصل

هيكون علي سبيل الفضول لا أكثر

وبعدين كله هيقول وانا مالي

وانا أدخل نفسي في مشاكل ليه ...

*********

ليه اختفت بينا بعض كلمات الترحيب

والمجاملات الاجتماعيه الرقيقه

واللي مش هتكلفنا أي حاجه

اتفضل ... شكرا ...

من فضلك ... لوسمحت...

ده حتي قيم زي:

العشرة...والجيرة ...والعشم

والشهامه... والجدعنه...الخ الخ الخ...

معدش ليها أي اعتبار في مجتمعنا الحالي...

ليه بقا الاعتبار الوحيد دلوقتي للمصلحه وبس...

**********

ليه مش عايزين نعترف ان احنا كشعب اتغيرنا...

وان كتير قوي من القيم والاخلاقيات

اللي كنا بنتميز بيها زمان ضاعت مننا وانقرضت...

والباقي بيعافر وفي طريقه للانقراض...

أنا كاتبه البوست ده بجد عشان نفسي أعرف السبب

ايه اللي خلانا اتغيرنا للأوحش قوي كده...

طبعا أنا مش باعمم لسه في ناس كتير محترمه

ومهتمه قوي بالأخلاق والقيم أنا باتكلم بوجه عام

ليه حصل تراجع وانحسارللأخلاق والقيم...

في مجتمعنا المصري المعاصر...


ومحدش يقولي السبب الفقر :

ايه دخل انعدام الأخلاق في الفقر

طول عمر الشعب المصري

أغلبه والسواد الأعظم منه فقرا

ويمكن أكتر من دلوقتي كمان...

بس كانت دايما الاخلاق فوق كل اعتبار...

ومحدش يقولي الجيل الجديد والشباب:

هو اللي مش مهتم بالأخلاق:

والدليل علي كده واسألوا كل البنات

بذمتكم وانتوا ماشيين في الشارع

أكتر المعاكسات بتيجي من الشباب

ولا من الرجاله الكبار اللي متجوزين

وعيالهم قدكوا...

يا ريت لو حد فيكم عنده تفسير أو تحليل للظاهرة

دي يفهمني ويكسب فيا ثواب...

أو حتي لو حد اتعرض لمواقف تخص

موضوع الاخلاق في الشارع المصري يحكيهالنا ...

والي اللقاء في بوست جديد ان شاء الله...


ملحوظه هامه:كل البوستات التي تندرج تحت title

موضوع للمناقشه مثل هذا البوست هارد فيها علي تعليقات

حضارتكم في البوست التالي...عشان اقدر اقدم لحضارتكم

ملخص لما توصلت اليه حاله النقاش والحوار بيننا...

أشكركم وباتمني تواصلوا التعليق وابداء الاراء...