topbella

الخميس، ٢٠ مايو ٢٠١٠

العلاقه بين الشعب والتوك شو والفساد

أولا باشكر كل اللي سألوا عليا في فترة غيابي واحب أطمنكم عليا
أنا بخير والحمد لله أنا بس كنت مشغوله شويه في الشغل الفترة اللي فاتت
ومكنش عندي وقت للنت بس خلاص الحمد لله فترة الانشغال الجامد خلصت
وتوفر عندي وقت لمتابعه المدونات ورجعتلكوا تاني وربنا يلطف بيكوا بقا هههههه ...
أما بخصوص البوست الجديد فها هو بين ايديكم ......
التكنولوجيا والثورة المعرفيه زي ماليها اثارها الضارة منقدرش ننكر ان لها أوجه استفادة عديدة جدا ...
وطبعا دي حقيقه مفروغ منها ..
ومن نتاجات التكنولوجيا في العصر الحديث الأقمار الصناعيه أو القنوات الفضائيه أو الدش....
ارجعوا معايا بالذاكرة شويه وافتكروا الحال من 7أو 8 سنين فاتوا...
قبل انتشار الدش ورخص أسعارة وتوافرة في كل بيت بل علي سطح كل عشه مصريه
فاكرين كنا بنعرف أخبار بلدنا واللي بيجري فيها منين؟؟؟
هاااااااااااااة افتكرتوا
كنا بنعرف الأخبار من نشرة سته ونشرة تسعه في القناة الأولي الأرضيه اللي مكانش عندنا غيرها

هي والقناة التانيه والقنوات المحليه...
( اللي هي عندنا في المنيا كانت القناة السابعه اللي كانت بتصيبني أنا شخصيا متابعه برامجها التافهه
والخاليه من أدني القواعد الاعلاميه بحاله من حالات البله المغولي الوقتي التي كانت سرعان
ما تنتهي بمجرد الضغط علي زر الريموت للرجوع مضطرة للقناة الأولي برضه) ...
ولأن طبعا مكانتش الجزيرة ولا العربيه ولا غيرها من القنوات الاخباريه اللي ماليه الدنيا دلوقتي
دي ظهرت أو ممكن تكون كانت موجوده بس مكانش متاح لكل الفئات تتابعها زي دلوقتي ...
أوكنا بنعرف أخبار البلد من الجرايد القوميه الأهرام والأخبار والجمهوريه

لأن برضه جرايد المعارضه القويه الموجوده دلوقتي زي المصري اليوم والدستور مكانوش ظهروا ...
دي كانت مصادر معلوماتنا عن اللي بيجري في بلدنا زماااااااااان ...
طيب كان ايه الوضع زماان....
أنا هاتكلم عن نفسي أنا شخصيا كنت بصدق الأخبار اللي بتقولها الحكومه في التلفزيون الرسمي

وكنت شايفه الوضع مستقر والأمن مستتب وكله تحت السيطرة حسب كلام الحكومه
(عشان كنت لسه صغيرة ومش شايفه حقيقه اللي بيجري حواليا في الدنيا
أو ممكن يكون ده كان طبيعي لأني كنت بسمع وجهه نظر واحده ورأي واحد لأي خبر)...
وعمري ما كنت أتصوران الوضع في بلدي اللي باعيش فيها سئ الي هذه الدرجه....
وافتكر ان السواد الأعظم من الشعب المصري كان فاكر زيي كده
وفجأة ولان دوام الحال من المحال ولأن التغيير سنه الله في أرضه اتغيرت الأمور

والمستور انكشف وفلتت الأمور من ايدين اللي عايزين يخبوا ويضللوا ويزوقوا الأحوال والأخبار
ومعدش ينفع الكذب والتزييف في الأخبار لأن المواطن دلوقتي مبقاش مضطر يسمع منهم الأخبار
لأنه هيعرف الحقيقه يعني هيعرفها ...
خاصه بعد ظهور وانتشار الاختراع السحري المسمي ببرامج التوك شو
واللي كانت السبب في تفتيح عيون وعقول الشعب فجأة علي الحقايق كامله
وزي المثل ما بيقول كل اللي بيحصل في البلد دلوقتي بقا علي عينك يا تاجر ...
والبرامج دي في رأيي وضعت الحكومه في مأزق ....وبيتعملها ألف حساب وبيتخاف منها
لأنها بتفضح المخطئ وبتكشفه ..ده غير انها بقت ملاذ ومفر لكل صاحب حق ...
ولكل مواطن ممنوع من الدخول ومقفوله أبواب المسؤلين في وشه
(اللي نسيوا ان هما أصلا مسؤلين عن خدمته)....
والفضل يرجع لبرامج التوك شو في كشف قضايا فساد كتيرة قوي عرفناها في السنوات الأخيرة

زي صفقه بيع عمر أفندي ...وقضيه هايدلينا ...وفضايح العديد من رجال السلطه
وأعضاء مجلس الشعب زي نائب القمار وغيرة وغيرة من الصفقات والمصايب
اللي كانت بتحصل في الخفا من غير ما حد ياخد باله ....
والسؤال بقا دلوقتي..... هاااااااااااة أدينا عرفنا كل حاجه

وعرفنا الفساد وصل لحد فين ولحد مين ايه بقا اللي كسبناة ؟؟؟ايه اللي اتغير فينا؟؟؟....
هل يا تري دورنا يقتصر علي اننا نعرف وضغطنا يرتفع ونقول حسبي الله ونعم الوكيل
ونتقهر وننام مقهورين ونصحي الصبح نواصل حياتنا عاااااااادي ...
أو لو كنت ايجابي شويه ولا مثقف حبتين بالكتير نحكي لبعض اللي عرفناة وتنناقش فيه مع بعض ....
طبعا المخطئ لازم يتحاسب لكن محاسبه المخطئ مش شغلتنا احنا كشعب ...
احنا كشعب وكمواطنين لينا دور كبير جدا في مواجهه ومحاربه الفساد المستشري في كل حته في البلد ....
امبارح وانا باتفرج علي العاشرة مساءا كالعاده ....
لقيت رد باعتاة أكاديميه مبارك للعلوم رد اعلي اتهامات مديرها السابق لوزير التعليم العالي
(بأنه كان بيجبر العلماء علي التعاون مع العلماء الاسرائيليين وانه السبب في تأخر البحث العلمي في مصر وغيرها وغيرها )
واللي أقاله الشهر اللي فات بعد خناقه كبيرة بينهم ...
بصرف النظر مين المحق ومين اللي مخطئ ...ومع عدم تعاطفي مع أي واحد من ال2
لأني واثقه ومتأكده ان محدش فيهم بيقول الكلام ده الا لمصلحته الشخصيه
ولتصفيه حسابات شخصيه بحته بين المدير والوزير...
لقيت الرد المبعوث من المدينه والموقع من أكبر 5 أساتذة دكاترة
(أو علماء كما يسموهم مع انهم لا يمتوا للعلماء بأي صله) في المدينه
كله اتهامات للمدير السابق بتاعهم انه نصاب وحرامي وكان بيكتب اسمه ع الأبحاث بدون ما يشترك فيها ...
وبيستغل فيلات وعربيات المدينه العلميه اللي هي بتاعه الحكومه لأغراض شخصيه و...و...و...
ييجي 20 اتهام واضح جدا انها متستفه ومتظبطه ومتفصله بأوامر عليا لرد اعتبار الوزير قدام الاعلام
والرأي العام ....وممكن يكون كده فعلا الله أعلم بس السؤال بقا
يعني الدكاترة الأفاضل دول لما هو المدير بتاعهم كده كانوا ساكتين عليه ليه؟؟؟
ماهو ياما مصالح وكانوا مستفيدين منه ولما طار من المنصب معدش يلزمهم ففضحوة ...
ياما الراجل كويس وهما بيكدبوا ويلفقوله التهم علشان يتمحلسوا للسيد الوزير عشان يردوا اعتبارة قدام الرأي العام ...
وده مثال واضح علي اللي انا عايزة أقوله.....
يا جماعه لازم منستناش حد يصلحنا....
لازم كل واحد فينا يقابل حاجه فيها فساد يقاومها...
لوكنت مدرس امنع الغش في الامتحانات اللي مالي مدارسنا.....
لو كنت موظف حكومي انصح زميلك اللي بياخد رشاوي علشان يخلص مصالح الناس

وان مارتدعش بلغ عنه رؤساؤة....
لو كنت بتشتغل في أي مكان في حي في مصنع في شركه بلاش تعلي مصلحتك الشخصيه

علي مصالح الأمه والمجتمع والبلد ....
متسمعش كلام رؤساؤك حتي لو غلط علشان تترقي وتكسب ثقتهم فيك ...

انشالله ما عنهم وثقوا فيك ولا حبوك اشتغل لله راعي ربنا بس ....
ربنا هو اللي هيرقيك مش اللي بتتمحلس له وتزور علشانه ....
رئيسك (في العمل متودوناش في داهيه) مهما كان فاسد وطاغي ومتجبر وماسك في ايدة مصالحك

مش دايم ...مش مخلد لا في الدنيا ولا حتي علي كرسيه ...
هيطلع معاش ....هيتنقل .... ربنا هيوقعه في شر أعماله ....وحد هيبلغ عن عمايله السوده
وهيتكشف ....متغضبش ربنا أبدااااا علشان ترضي المخلوق .....
رزقك مكتوب ومقدر محدش من البشر يملك يمنعه عنك أو يديلك حاجه مش مكتوبالك.....
أنا عرفت ان كان في حمله عنوانها لا تفسد كانت يوم 17 مايو اللي فات علي ما أذكر
حبيت أشارك في الدعوة وادعوا لاستمرارها ومدها....
هي مشاركه متأخرة شويه بس معلش....

هناك ١١ تعليقًا:

Haytham Alsayes يقول...

السلام عليكم

انا مؤيد كل الكلام اللي قلتيه بس وبعدين احنا تعبنا من الكلام والحديد ونفسي انا شخصيا اعمل حاجة غير الكلام بس اعمل طيب

علي فكرة بفكر من شوية وقت كدة ان اعمل مدونة مشتركة بين المدونين اللي اعرفهم وتكون متخصصة في كدة بمعني ان نعمل مدونة تجتمع فيها الدعوات علي المدونين كلها يعني دعوة للتبرع لمستشفي الاطفال دعوة مثلا لمنع الفساد الاخلاقى
وهكذا وشوية شوية تكبر المدونة وتنتشر بس مش عارف ابدأ منين فانتي ايه رأيك

تحياتي للبوست الجميل

البنفسج الحزين يقول...

Haytham Alsaya
يا هيثم أنا قولت في كلامي ان كل واحد فينا عليه دور لازم يعمله وينفذة من موقعه صدقني كل واحد فينا لو حارب الفساد في المكان اللي بيشتغل فيه الفساد هيقل أو علي الأقل هنحد شويه من انتشارة ...
وبخصوص المدونه اللي بتفكر فيها هي فكرة كويسه
وان كان كتير من المدونين بيعملوا كده بالفعل وكل واحد بيعلن في مدونته عن الدعوة اللي بيدعوالها بس فكرة توحيد الجهود دي فكرة كويسه قوي وانا معاك واوعدك اني هشارك فيها ....تحياتي

غير معرف يقول...

حمد الله ع السلامه

انا كمان شفت حلقه العاشره مساءا اللي اصابتني بالقرف

واكيد بتوع مدينه مبارك دول كلهم متعينين واسطه وكوسه وقرع وكله ... وده نتاج الواسطه... فساد واستغلال نفوذ

لنا الله

بوست جميل

تحياتي

البنفسج الحزين يقول...

فتاة من الصعيد
الله يسلمك يا مروة
وحمدلله علي سلامتك انتي كمان
طبعا بتوع مدينه مبارك دول
كوسه وقرع وبرسيم وكل حاجه خضرا
انتي مش شايفه عمايلهم
دول لو عوالم مش علماء ميعملوش اللي بيعملوه ده حسبي الله ونعم الوكيل في اللي جابهم
وقعدهم علي كراسي مش من حقهم
واللي يستاهلوا بجد مركونين علي الرف...
وهي دي اخرة الواسطه ...

خواطر شابة يقول...

حمد الله على السلامة عزيزتي
موضوعك مهم وفعلا التكلونوجيا لانستطيع ان ننكر انها غيرت حياتنا للافضل بشكل كبير
بالنسبة لبرامج لتوك شو احيانا والله اجدها هي فقط نقطة للتنفيس عن الشعوب فالشعب كطنجرة الضط لو لم تكن له نقطة يتنفس منها سينفجر وهذا ما تنبهت له الحكومات
فكرة حملة لاتفسد ينبغي ان لا نحصرها بزمن معين هي ينبغي ان تصبح منهج حياة ان اردنا ان نتطور ونرتقي
تحياتي وودي عزيزتي

البنفسج الحزين يقول...

خواطر شابه:
الله يسلمك يا خواطر
طبعا التكنولوجيا غيرت حياتنا بس في حاجات للأفضل وحاجات تانيه غيرتها للأسوأ...
معاكي حق التوك شو باب للتنفيس
بس أشك تماما ان الحكومات هي اللي فتحته
أو هي اللي تنبهت ليه زي ما قولتي...
لا يا عزيزتي ...
ده شئ فرضته عليهم تكنولوجيا العصر
ومعملهوش برضاهم
وهما أول الناس اللي متضررة منه ...
الشكر الجزيل لمرورك اللي دايما بيسعدني ...

sal يقول...

البنفسج ال
مبهج والا حزين
عودة حميدة اولا
::::::::

طبعا البث الفضائى - الدش- وتكنولوجيا الاتصالات
ليها دور كبير فى توضيح "الصورة"

اما بخصوص التوك شو
انا شايف انو تقليد سمج وباهث لبرامج اجنبية

لا نملك من مناخ الحرية المتاح لديهم الا القليل
انا مش باحب عمر اديب ولا معتز
منى ومحمود ماشى الحال
ربنا يصلح الحال والاحوال
لك تحيتى وتقديرى

البنفسج الحزين يقول...

sal
يا عزيزي سول وايه في مجتمعنا المصري بل والعربي كله مش تقليد...
احنا أمه لا ترعي الابداع والابتكار في أي شئ...
طبعا التوك شو تقليد لشئ ناجح في الغرب بس هما بقا لما قلدوة طبعوة وولفوة علي ظروف مجتمعنا وسقف الحريه الواطي بتاعنا...
وبصراحه انا شايفه انهم بيؤدوا واجبهم
في حدود المتاح ليهم
بل هما كانوا السبب في اجبار الحكومه
علي رفع سقف حريه التعبير بعض الشئ...
بس ليه مش بتحب عمرو أديب
احنا كده هنختلف بقا...
بس ولا يهمك الخلاف في الرأي لا يفسد للود قضيه
تحياتي ليك ودائما يسعدني مرورك

-_- يقول...

برامج التوك شو غيرت كثيرا في شخصية المواطن المصري

البنفسج الحزين يقول...

sharm:
أكيد التوك شو غير وجهه نظرنا في حاجات كتير وغير رأينا في ناس كتير كنا فاكرينهم ملايكه وطلعوا مش ملايكه خاااااااالص..
تحياتي لمرورك الكريم

Tears يقول...

صعب مقاومة الفساد بشكل فردى لانه اصبح السائد و ليس الاستثناء

السمكة تفسد من رأسها...فربما لو تخلصنا منها انصلح الباقى