topbella

السبت، ٥ يونيو ٢٠١٠

عاجل...رساله شهيد الحريه


يا أهل الأرض الكرام...
من مختلف الألسن والبلدان...
انا
شهيد الحريه....
باكلمكم من أعلي مكان...
ممكن يتصورة انسان ...
أنا في
الجنه بانعم بيها...
رب الكون كافئني بيها ..
هانت حياتي وضحيت بيها...
هددني الجندي الصهيوني ...
ومدافعه ولا خوفوني ....
من شجاعتي جن جنونه...



وقتلني الجندي الصهيوني....
برصاص الغدرالجبان...
************
يا أهل الأرض الكرام...
عارفين ليه عمل كده فيا؟؟؟
لأني ما رضيت بالهوان ...
ما رضيت بحصار أخويا الانسان ...
مانا زيه برضه انسان ...
ليه احنا ناكل ونتنعم...
وولادنا تلعب وتتعلم ...
وأسافر أتفسح برا ...
ولما أعيا أتعالج واشفي...
وأخويا الانسان الغزاوي...
متحاصر علي دماغه بلاوي...
مقطوع عنه النور والميا...
ولاأكل ولا عيشه هنيه ...
وبيوته هدوها عليه...
وأطفاله شابوا قدام عينيه...
حسيت بمعاناته ولبيت نداءاته...


ونويت وشديت الرحال ...
مع أحرار العالم الأبطال...
يا اما أساعده ياتبقي حياتي...
أغلي هديه أقدمهالوة...
************
يا أهل الأرض الكرام...
من كل بلاد العربان...
انت يا عربي يالي مثيله...
ياللي دينك نفس دينه....
ياللي كلامك هو كلامه....
ولسانك ينطق نفس حروفه ...
وحدودك بتطل عليه ...
وشايف اللي غرقان فيه ...
ليه ساكت علي حصارأخوك ...
ليه عمري ما سمعت لك صوت...
لو سكوتك ضعف منك....
انت صاحب حق ... اتكلم الحق هيقويك...
لوسكوتك خوف علي سلطان الدنيا...
سلطانك زايل زايل ...ليه تبص تحت رجليك...
أيا كان سبب سكوتك...ما في سبب يبرر سكوتك...

يا أهل الأرض الكرام... ***********
قبل مامشي هاوصيكم وصيه...
اوعوا تنسوا أهل غزة...
انا ضحيت بنفسي ......
وبدمي فتحت الطريق...
عشان تكملوا المشوار...
وتفكوا عن غزة الحصار...
أنا كده عملت اللي عليا...
جيت ووصلت الرساله...
رساله شهيد الحريه....



هناك ١٧ تعليقًا:

Haytham Alsayes يقول...

حسبنا الله ونعم الوكيل


تحياتي للكلمات الجميلة والمؤثرة

أنا - الريس يقول...

الكلمات منثورة أكثر من منظومة
وتخاطب الضمير أكثر من أن تخاطب الاحساس

ولكن

كل اللي نقدر نقول

حسبي الله ونعم الوكيل
حسبي الله ونعم الوكيل
حسبي الله ونعم الوكيل
حسبي الله ونعم الوكيل
حسبي الله ونعم الوكيل
حسبي الله ونعم الوكيل
حسبي الله ونعم الوكيل

سلمت الأنامل

فاروق سحير ( فاروق بن النيل ) يقول...

البنفسج الحزين .........
معلش كنت مسفر ثلاثة أيام ومشغول بره البيت وماعنديش نيت هناك بالمكان ولما رجعت دخلت على المدونة بتاعتى ورديت على التعليقات ثم مدونتك ووجدت فيها شيئا رائعا مس قلبى ومشاعرى سلمت يداك
أنت "أمل " فك الحصار عن غزة.....
أنت "أمل " لجبر إسرائيل على التراجع..
أنت "أمل " لصحوة العرب النائمين ...
أنت "أمل " لقيام الجند المخلصين .....
أنت "أمل " لإنطلاق كل المسلمين .......
أنت "أمل " لتكاتف الإخوة المسحيين ...
أنت "أمل " لعظمة وأصالة المصريين ...
دومتى أمل المستقبل والحاضر والماضى ..

خواطر شابة يقول...

عزيزتي والله العظيم منذ هذا الهجوم الغادر على أسطول الحرية وانا فقدت متعة الاستمتاع بكل شئ تضحيات هؤلاء النشطاء كانت كالصفعة على وجهي واكيد على وجه كل صاحب ضمير حي دماؤهم عرت واقعنا وضعفنا وتخاذلنا لااعرف بما يمكن ان نعتذر لله يوم الحساب وياويلتنا من يوم الحساب

sal يقول...

رغم مناخ القهر والتعتيم

تأبى مثل هذه المشاعر الصادقة الا ان
تظهر لنا ....

اكثر الله من امثالك
ودام احساسك المرهف الراقى

تحياتى

البنفسج الحزين يقول...

هيثم السايس:
أشكرك جداعلي ذوقك ...
وباردد معاك حسبنا الله ونعم الوكيل

البنفسج الحزين يقول...

سيدي الرئيس:
منثورة ولا منظومه بتخاطب الضمير ولا الاحساس متفرقش معايا ...
اللي يفرق عندي انها خارجه من قلبي وعايزاها توصل لقلب وعقل وضمير
كل اللي يقراها...
تحياتي ليك

البنفسج الحزين يقول...

عمو فاروق بن النيل...
أولا حمدلله علي سلامه حضرتك
ويا رب تكون سفريتك كانت موفقه ....
ثانيا أنا باشكر حضرتك جدا علي ذوقك وكلامك الجميل اللي بجد أسعدني جدا...
واللي شايفاه كتير قوي عليا...
هو أنا صحيح اسمي أمل
بس انت كده شيلتني الليله كلها علي رأي محمد سعد في فيلم عوكل لما شيلوة السلاح كله قالهم ايه هو انا هحارب لوحدي ولا ايه هههههههههههه...
تحياتي ليك ودام ليا تواصلك وتشجيعك المتواصل...

البنفسج الحزين يقول...

عزيزتي خواطر شابه...
معاكي حق تضحيه ناس معظمهم لاهما عرب ولا مسلمين بأرواحهم علشان قضيه احنا أولي الناس بيها لانها قضيتنا احنا بالأساس واحنا ولا بنعمل اي حاجه غير الشجب والتنديد صدمه وصفعه علي وجوهنا كلنا كعرب ومسلمين حكام
وشعوب...حسستنا قد ايه احنا متخاذلين
وكشفت حقيقتنا قدام نفسنا...
يا ليتنا نفيق ونتعظ قبل ان يأتي الدور علي كل واحد فينا ولا يجد من يغيثه كما لم نغيث اخواننا العرب ...
بل والأهم قبل أن يأتي يوم الحساب...

البنفسج الحزين يقول...

sal:
أضعف الايمان صياغه كلام نعبر به عما بداخلنا من ثورة وبركان...
وأشكرك جدا علي اطراؤك الذي أسعدني كثيرا...

غير معرف يقول...

شيء مخزي فعلا معظم من كان على سفينه الحريه ليسوا عربا

ولكنهم يملكون صفات الانسانيه الحقه والنبل النادر

تحياتي

لجين أبو الدهب يقول...

شهيد الحرية طوبى له ..

ياريتنا كلنا شهداء للحرية ..

جزاكِ الله خير على الكلمات ..
ِ
دمتِ بخير ..

عطش الصبار يقول...

البنفسج الحزين
تحيه منى على البوست الجميل ده
الشهيد بيخاطب العربى

انت يا عربي يالي مثيله...
ياللي دينك نفس دينه....
ياللي كلامك هو كلامه....
ولسانك ينطق نفس حروفه ...
وحدودك بتطل عليه ...
وشايف اللي غرقان فيه ...
ليه ساكت علي حصارأخوك ...
ليه عمري ما سمعت لك صوت..
ماهم بالياس يا بنفسج حاصروه
ومن حريته هو كمان منعوه
الحدود كانت بتطل على الحدود قبل ما اسوارالعزله والفرقه ما تعلى
لكن يا بنفسج لكل موقف شجاع ضحاياه يمكن اللى حصل لسفينه الحريه يصحى جوانا حاجه
بوست جميل وحسبنا الله ونعم الوكيل
تحياتى.

البنفسج الحزين يقول...

فتاة من الصعيد:
هما فعلا مكانوش عرب
وفيهم كمان مش مسلمين أصلا
بس هما بني ادمين أحرار بجد ...
تحياتي

البنفسج الحزين يقول...

لجين أبو الدهب
فعلا ياريتنا كلنا شهداء للحرية ..

أهلا بيكي في اول زيارة للمدونه
وياريت متكونش اخر زيارة
نورتيني

البنفسج الحزين يقول...

عطش الصبار
أهلاوسهلا بيكي نورتيني ...
والله يا فندم أنا مابقيت عارفه مين فينا الجاني ومين المجني عليه ...كل الأمور دخلت في بعض ربنا يلطف بينا ...

فاروق سحير ( فاروق بن النيل ) يقول...

البنفسج الحزين .....
أحيل إليكى " التاج السلطانى" شوفى بقى ونظامه هو :
1-اذكر اسم من طلب منك حل هذا الواجب.
2-اذكر القوانين المتعـلقة بهذا الواجب.
3-تحدث عن ستة أسرار قد لا يكتشفها من يقابلك للمرة الأولى.
4-حّول هذا الواجب إلى ستة مدونين، واذكر أسماءهم مع روابط مدوناتهم في موضوعك.
5-اترك تعليقًا في مدونة من حّولت الواجب عليهم؛ ليعلموا عن هذا الواجب
ماليش دعوة إتصرفى