topbella

الجمعة، ١٠ سبتمبر ٢٠١٠

التلفزيون رمضان 2010

أكيد كل واحد تابع ولو جزء صغير من البرامج والمسلسلات الكتير اللي عرضها التلفزيون في رمضان
وطبيعي يكون لكل واحد رأيه في اللي اتفرج عليه ....
وأنا عن نفسي أحسن مسلسل عجبني هو مسلسل أهل كايرو
أنا صحيح ماتبعتهوش من أوله بس بجد مسلسل مكتوب كويس قوي وفيه حبكه دراميه مقنعه
وأحداثه معاصرة جدا يعني بيحكي الحياة اللي احنا عايشينها في مصر في الوقت الحالي
بيتكلم عن تزاوج المال بالسلطه ووضع وونفوذ رجال الأعمال في مصر وازاي انهم ساعات كتير
بيبقوا فوق القانون والناس اللي عاملين فيها مصلحين اجتماعيين وهما أصلا كدابين زفه
وكل ده احنا شايفينه حوالينا وفي رأيي السبب ده هو ده اللي خلي المسلسل علم قوي مع الناس ونجحه ...
برضه مسلسل قصه حب مسلسل جيد وجمال سليمان عامل دور حلو قوي ولو انه واخد التيمه القديمه بتاعه الجماعات والدقون والنقاب اللي فيها كتير من المغالطات ....
مسلسل العار : القصه مكتوبه كويس وتقدر تطلع منه بدرس مستفاد أو شئ له قيمه بس أنا عموما مش بحب مصطفي شعبان أصلا وده اللي كان مكرهني في المسلسل ...

أما مفاجأة رمضان السنه دي هند صبري في مسلسل
عايزة أتجوز
علشان احنا متعودين عليها دايما في الأدوار الجاده وهي بيتهيألي في الحقيقه أصلا شخصيه جادة ودمها مش خفيف
علشان كده انا شايفه انها بذلت مجهود كبير علشان تمثل دور دمه خفيف أو كوميدي هي الحقيقه
اجتهدت لكن في بعض الأحيان كان تمثيل خفه الدم بيبفي أوفر قوي قوي والعمليه كانت بتوصل معاها
لحد الاستظراف وربما الاستعباط...بس ده ميمنعش ان المسلسل بصفه عامه عجبني ...

أحسن تتر :تتر مسلسل أهل كايرو ولو ان ليا ملاحظه عليه طبعا الكلمات جميله ومعبرة تماما
عن كايرو وأهل كايرو في هذا العصر وأيمن بهجت قمر كاتبها بحرفيه كالعادة
وصوت حسين الجسمي رائع لكن معرفش ليه كنت كل ما أسمع الأغنيه أحس اني متغاظه
ان واحد مش مصري هو اللي بيقول الكلام ده علي بلدي يعني في رأيي لو كانوا جابوا مطرب مصري
كان هيكون أفضل وأكثر مصداقيه ....وخصوصا ان الكلمات بالعاميه المصريه المعاصرة
زي كلمه (همبكه ) (ويا عينه يا جبايرة ) وحسين الجسمي في اللهجه المصريه مش
حلو وانا بقول كده من أيام ما غني أغنيه سته الصبح ولو انها برضه أغنيه جميله
مش عارفه ده رايي انتوا رايكم ايه؟

وعايزه أقول حاجه لابراهيم عيسي بعد ماشفت كام حلقه من برنامج حمرا اللي كان بييجي علي موجه كوميدي
انت بجد خسرت كتير قوي من مكانتك عندي واحترامي ليك بعد البرنامج ده
يعني كان فيه حلقات كويسه وكان فيها ملتزم ومحترم وابراهيم عيسي اللي أنا اعرفه
لكن متعرفش ايه اللي كان بيحصله وهو مستضيف الممثلين كان بيبقي واحد تاني
هايف ومسف لأبعد الحدود وبيوحي ايحاءات خارجه وبيقول كلام خارج وخصوصا حلقات الممثلين
انتصار ودوللي شاهين وشعبولا مش عارفه انت ايه اللي يخليك تستضيف دول أصلا ؟

أما بقا أسوأ اعلان و أكثر اعلان استفزني اعلان استرجل واطفح بيريل يعني اللي مابيطفحش زفت ده ميبقاش راجل ولازم يدخل مركز تأهيل الرجال أنا مش فاهمه ازاي اعلان وقح وكله ايحاءات سافله زي ده يسمحوا بعرضه ليل ونهار وعلي كل القنوات وفي رمضان وما بالك بقا ان زفت اللي هما بيقولوا للرجاله يشربوة ده محرم شرعا ....صحيح اللي اختشوا ماتوا !!!!!

أما بقا جايزة أسوأ مسلسل فهو مسلسل الخيال العلمي الغير مسبوق مسلسل أنثي العنكبوت وأزواجها الخمسه .....
ايشي خيال يا ناس الست زهرة ولا فله دي الانثي السوبر اللي كل الرجاله اللي بيمثلوا في المسلسل حبوها
وعايزين يتجوزوها حتي الحانوتي عبد الله مشرف ههههههه ...
والست غاده عايشه الدور قوي وعامله فيها ملكه جمال أنثي العنكبوت ومتملكها الغرور والعنظزة
لدرجه انها بطلت حتي تمثل والله كنت حاسه انها بتسمع الحوار وخلاص لا انفعالات ولا أداء ولا أي حاجه
(مع انها في ادوارها زمان قبل ماترفع برقع الحياة في الكام سنه اللي فاتوا كانت بتمثل كويس )
أما الان فاكتفت بوضع العدسات الاصقه ونفخ شفايفها والقلع قصدي اللبس المهبب الفاضح اللي كانت بتلبسه
يعني عمركوا شفتوا واحدة مثلا مرفوع عليها قضايا تعدد أزواج وهربانه ومهددة بالسجن
أومشهد تاني ابنها مخطوف ومش عارفه هو فين
أو جوزها مات في حادثه طيارة ولابسه ومتأنتكه وعامله البدع في نفسها
وبتتكلم ببرود بالشكل ده ....
مفيش غير تعليق واحد رزق الهبل ع المجانين....
اللي فات ده كله كان وجهه نظري البحته اللي مش عارفه حد مشاركني فيها منكم ولا انتوا ليكم رأي تاني ....
وكل رمضان وانتوا طيبين

هناك ٢٣ تعليقًا:

أنا - الريس يقول...

بعد السلام والتحية
الحمد لله متبعتش مسلسلات
لأنها في رأيي بتضيع الوقت
ولو بتتكلم علي الواقع مش
بتقدم حلول يعني تقديم المشكلة
طب ما الناس عارفة المشكلة
تحليل المشكلة اللي ليه فيه واللي
ملوش بيحللها سواء علمي أو مصطبي
لكن حل المشكلة ايه
والظريف في الآخر الحياة وردي
يا البطل يكسب والخير ينتصر والشر يندثر
يا البطل يموت والناس تتنكد عليه وتنسي كل المسلسل .

اللي تابعت منه 13 حلقة هوا برنامج " خواطر شاب " لأحمد الشقيري .

خواطر شابة يقول...

بالنسبة لي تابعت مسلسل باب الحارة على الامبي سي لانه كان يوافق وقت الفطور وحلقات متفرقة من برنامج خواطر شاب لانني أعرف ان امامي السنة كاملة لو لي عمر أشوف الاعادات لان القنوات تبدأ في اجترار دراما رمضان طوال السنة
كل سنة وانت طيبة عزيزتي
دمت بكل ود

sony2000 يقول...

انا والحمد لله
عملت احسن حاااجه
نفضت لكلو:)

البنفسج الحزين يقول...

MR.PRESIDENT:
والله خير ما عملت هي المسلسلات صحيح مش بتقدم حلول للواقع بس بتفهمنا أكثر خبايا وحقيقه اللي بيحصل فيه علشان اللي بيصدق ميبقاش يصدق كل اللي بيتقال له...بس انت عارف ...الحل معروف لكل الناس لكن المشكله النيه ان المشاكل تتحل أصلا...
كل سنه وانت طيب

البنفسج الحزين يقول...

خواطر شابه:
معاكي حق القنوات ابتدت فعلا في اعادة المسلسلات من يوم العيد..
كل سنه وانتي طيبه

البنفسج الحزين يقول...
أزال المؤلف هذا التعليق.
ستيتة يقول...

انا الأول اقول كل سنة وانتي طيبة يا قمرة وربنا يتقبل منا ومنك رمضان

انا اتغظت من تتر اهل كايرو جدا ومش بس علشان حسين الجسمي اللي باشاركك الرأي لكن علشان الكلمات عار بزيادة وحاجة جرصة يعني وتفضل في بؤ الناس وخاصة الغريب عمر بحاله ويقول لنا انتوا اللي وجهة نظركم في نفسكم كده

ملاحظتي السنة دي ان 3 مسلسلات كانت نهايتهم ليلة العيد عجب
شيخ العرب
العار
مملكة الجبل
الأولى نهاية متوقعة بس مع الفخراني عيطنا وبربرنا لما شبعنا
التاني عامل زي كارتون البوكيمون بالضبط
لأن لو ربنا كان بيعجل لكل الفاسقين كانت مصر مفيهاش النهاردة 10 مليون وزمانا مرتاحين والبلد واسعة علينا
والتالتة نهاية عاملة زي الأفلام الفاكسة بتاعة سلفستر ستالون

قصة حب مشفتهاش
وتحليلك كله زي العسل

تحياتي

البنفسج الحزين يقول...

sony2000:
أولا كل سنه وانتي طيبه
ثانيا والله خير ما عملتي ...ماخسرتيش حاجه
بالعكس كسبتي أعصابك اللي ماتحرقتش وضغطك اللي مارتفعش من كم الهبل والاسفاف اللي كان متوافر في معظم المسلسلات الا قله قليله ....

البنفسج الحزين يقول...

ست الكل دكتورة ستيته:
كل سنه وانتي طيبه يا قمر والأسرة الكريمه كلها بخير وصحه وسعادة يا رب
أنا دخلت أعلق عندك امبارح علشان أعيد عليكي بس كنتي قافله التعليقات ...معلش ملحوقه...

هي صحيح كلمات تتر أهل كايرو بتعري وبتفضح المجتمع المصري المعاصر لكن مننكرش انها حقيقيه جدا ....
واذا كان علي نشر غسيلنا المش نضيف قدام الاغراب فده حاجه احنا غاويين نعملها والتتر ده ييجي ايه جنب أفلام خالد يوسف ؟؟؟
أنا مكنتش متابعه شيخ العرب ولا مملكه الجبل ...أما العار فنهايته زي نهايه كل المسلسلات العربيه منذ فجر التاريخ وحتي يرث الله الأرض ومن عليها .....
كل النهايات تيمه واحده الغايب يرجع والشرير حاجه من الاتنين ياما يتسجن أو يتقتل أو يتقلب طيب بقدرة قادر ومن غير مقدمات ... والخير ينتصر وتحسي ان خلاص القبامه هتقوم هههههه...
نورتيني يا دكتورة

sal يقول...

كل سنه وانت طيبة وبخير

انا ما تابعتش ولا مسلسل
الا بعض الحلقات وبشكل عابر من اهل كايرو او الجماعة
ماليش فى الحاجات دى
اكثر حاجة تابعتها
البرامج الاتية
دين ودنيا د عمار على حسن
مستضيفا د محمد كمال امام وجمال البنا
2
الفاروق اميرا لابراهيم عيسى
المعجزة الكبرى لعلاء بسيونى
+++
شوية برامج تسالى
زى اثنين فى اثنين وفبريكانو
وانا لعمرو الليثى

التحفة اللى لفت انتباهى مذيعات
القناة الاولى والمصرية فى السهرة اللى تحت القلعة...المذيعات قدموا لى فكرة وافية عن ابداع الخالق فى صنعته
ليس جمالا ولكن فى القبح وسوء الخلقة
ههههههه

تحياتى وعيد سعيد

أنا - الريس يقول...

واجب اختياري لو مكنتوش حلتوه وأنا غيرت فيه سؤال
لمعرفة إطلاعتكم فلو عايزين تحلو خير وبركه ، ولو مش عايزين متقلقوش الواجب مش هيتحط في أعمال السنة .
ما هي كتب الطفولة التي بقيت عالقة في ذاكرتك؟
مَنْ أهم الكتاب الذين قرأتَ لهم ؟
من هم الكتاب الذين قررت ألا تقرأ لهم مجددا؟
في صحراء قاحلة ، أي الكتب تحمل معك؟
ما هو الكاتب الذي لم تقرأ له أبدا ، وتتمنى قراءة كتبه ؟
ما هي قائمة كتبك المفضلة ؟
ما هي الكتب التي تقرؤها الآن ؟
اللي بعت الدعوه ؟
أرسل الدعوة لمدون واحد علي الأقل من أجل مشاركتنا باطلاعهم في القراءة ؟

أنا - الريس يقول...
أزال المؤلف هذا التعليق.
البنفسج الحزين يقول...

sal
كل سنه وانت طيب وبخير
بالنسبه لبرنامج دين ودنيا...
أنا أصلا مش باعترف بجمال البنا ده أصلا لأنه مبيفهمش حاجه في الدين وبعدين مفيش حاجه اسمها مفكر اسلامي كل المسلمين مأمورين بالتفكير واعمال العقل بس في أمور دنياهم أما أمور دينهم فاللي مادرسهاش ومبيفهمش فيها يا ريت ميفكرش أحسن ما يجتهد بغير علم زيه كده ويطلعلنا بفتاوي غريبه ما أنزل الله بها من سلطان زي فتوي ان السجاير متفطرش الصايم في رمضان ...
وبالنسبه لمذيعات الأولي والفضائيه هما يمكن متخلفين ومش مثقفين ماشي أنا معاك في دي انما مش وحشين شكلا للدرجه دي يعني... عموما وجهات نظر ...

تحياتى وعيد سعيد

البنفسج الحزين يقول...

وMR.PRESIDENT
الحمد لله ان الواجب اختياري ومش هيدخل في درجات أعمال السنه هههههههه
لأني بصراحه مش ناويه أحله....لسبب بسيط اني زمااااان وانا صغيرة مكنتش مهتمه بالقراءة الا كتب المدرسه والجرايد والمجلات وكنت بحب أتفرج علي التلفزيون أكتر وماهتمتش بالقراءة الا من فترة قريبه يعني مثلا من خمس سنين ...وحتي لما باقرا بركز في نوعين من الكتابات الديينيه والعلميه طبعا بحكم دراستي فمش هتلاقي عندي اجابه لأسئلتلك ...وعموما شكرا ع الدعوة الكريمه

أنا - الريس يقول...

بس مش شرط والله حتي لو كتبتي عناوين كتاب لكتب علمية أو دينية .. بالعكس ممكن ينوبك ثواب ان حد يقرالهم

أحمد الصعيدي يقول...

رغم اني مشفتش اي حاجة من دول


بس حبيت أمر واقولك

كل سنة وانتي طيبة

Tears يقول...

تقدرى تتابعي اهل كايرو من اوله دلوقتى على قناة المحور الساعه خمسة و نص تقريبا

غير معرف يقول...

مااتفرجتش غير على الكبير اوي ... ووقفوه في نص رمضان :)

تلخيص كويس للمسلسلات .... هبقا اشوفها بعدين :)

تحياتي

البنفسج الحزين يقول...

أحمد الصعيدي
كل سنه وحضرتك طيب وبالصحه والسلامه

البنفسج الحزين يقول...

تيرز:
أشكرك ع التنويه وكل سنه وانتي طيبه

البنفسج الحزين يقول...

مروة:
الكبير أوي كان لذيذ شفت منه كام حلقه
ومافتكيش كتير كل المسلسلات بتتعاد بس اللي فاضي يتفرج...

خواطر شابة يقول...

عزيزتي الرجاء الاطلاع على مدونة ليالي مصرية دورك في الكتابة قد حان
انا انتظرك هناك عزيزتي
دمت بكل ود

Adabclub يقول...


السلام عليكم
بصراحة مسلسل الجماعة عندي اقوي من كل هؤلاء

يليله مسلسل العار

ايضا رائع

مدونة اكثر من رائعة والله

اردت فقط ان اسجل مروري من هنا

مدونتي هنا