topbella

الثلاثاء، ٢٩ يونيو ٢٠١٠

السفينه والبحار



اركب يا انسان سفينه عمرك


في بحر الحياة راح تمشي بيك


هتطلع وياها رحله


فيها العجايب ففتح عنيك


معاد قيامها معروف لك


معاد مرساها مستخبي عليك


***************

جنبك في البحر سفن كتير


علي ظهرها في ناس كتير


طالعين معاك نفس الرحله


فيهم ناس هتدلك


وناس كتير هتضلك


وناس تايهه من زمان


وناس وصلت بسلام


***************

ياما هتسمع كلام


وتشوف عجايب وأهوال


هتسمع كدب يتصدق


وصدق ما عاد بيتصدق


وحق ضايع غريب


وباطل سايد وعيب


*****************

وعشان توصل للمرسي بسلام


متصدقش كل الكلام


خليك دايما ُربان سفينتك


ودفتها دايما ماسكها في ايديك


دا الريح شديدة وأوقات عنيدة


وان ماكنتش حابكها تفلت من ايديك


******************


وخلي الكلام ده دايما في بالك .....


هاتطلع هاتنزل ...


تكافح تشاغب.....


تشرق تغرب ......


هترتاح هتتعب....


تطول تقصر ...


مسيرك تفارق....






الاثنين، ٢١ يونيو ٢٠١٠

الاعتراف




التاسعه الاخمس دقائق صباحا
هي.....وقفت كعادتها كل صباح
ترتشف من كوب النسكافيه
الذي تتعمد طلبه في هذا الميعاد من كل صباح
ليكون شرابه حجه تعطلها عن العمل خمس دقائق
حتي تتفرغ للتطلع من
نافذه مكتبها في الشركه التي تعمل بها
************
هو بالنسبه لها .... ذلك الشاب الوسيم الأنيق
الذي يعمل محاسبا في البنك المقابل للشركه التي تعمل بها
( التاسعه تماما)
هو الميعاد الثابت لوصوله يوميا لمقرعمله
يمكنك أن تضبط ساعتك علي ميعاد وصوله
هكذا كانت تصفه لأعز صديقاتها
************
عندما تراة آت من بعيد بخطواته الرشيقه الواثقه
تشعر بدقات قلبها تتسارع وكأنها في سباق...
كم تتمني أن تراة من قريب ....
هكذا وجها لوجه....
كم تتمني أن تنظر في عينيه....
تتطلع اليهما لتعرف درجه لونهما
كم تتمني أن تحادثه...........تتوق لسماع صوته....

..... ولكن.....
كيف وهو أصلا لا يعرفها....
ولا يشعر بوجودها....
ولا يراها كما تراة .......
شوقها اليه أنساها أنها تتابعه فقط
من خلال زجاج النافذة ....

**************
الثالثه الا ربع عصرا
هو... جلس كعادته كل يوم ينظر من زجاج نافذة الحافله التابعه للبنك

يتفحص الخارجين من مبني الشركه المقابله للبنك
هي.. بالنسبه له تلك الفتاة الجميله ذات الملامح الرقيقه
التي يراها كل يوم في نفس الميعاد خارجه من مبني الشركه

المجاور للبنك الذي يعمل فيه
وهو جالس في الحافله في انتظار اقلاعها في تمام الثالثه
وهو يتعمد النزول قبل الميعاد ليتثني له رؤيه من اثرت قلبه برقتها وجمالها
كم يتمني لو عرفت كم هو معجب بها
ينظر اليها وهي تتحدث مع صديقاتها
وتبتسم معهن ابتسامات غايه في العذوبه

كم يتمني لو تكون ابتساماتها الرقيقه له
....ولكن ....

كيف وهي لا تراة كما يراها
ولا تشعر بوجوده
شوقه اليها أنساة أنه ينظر اليها فقط
من خلال زجاج النافذة

*************
هو.... تأكد أن حبها ملك قلبه وأنه لن يستطيع أن يظل بعيداعنها أكثر من هذا ...

استجمع شجاعته وقرر أن يكون هذا الصباح هو صباح الاعتراف بالحب
لابد أن يذهب اليها وينتظرها قبل دخولها للشركه ويروي لها ماذا فعل به حبها

نعم سيذهب اليها وليكن ما يكون
هكذا ردد بينه وبين نفسه
***********
هي وبعد تردد طويل
قررت أن تنهي هذا الصباح حيرتها
قررت أن تصارحه بحبها وليكن ما يكون
هكذا رددت بينها وبين نفسها
لكي لا تثنيها مخاوفها عن المضي
قدما نحو ما قررت فعله
استجمعت شجاعتها....
استدعت كل الحيل الأنثويه
التي طالما سمعتها من صديقاتها
هاهو قادم ....
الان اذاً



ولكن.... فجأة رأته يتقدم نحوها
بخطواته الرشيقه التي طالما اثرتها
حاملا في يده باقه جميله من الزهور
ونظر اليها برقه وحنان نظرة لم ولن تنساها
وتحدث بصوت كأنه العندليب ونطق بكلمه واحده لم تكن تنتظر سواها


أحبك







الجمعة، ١١ يونيو ٢٠١٠

التاج السلطاني



شوفوا بقا ...
اللي بيتابع المدونه بتاعتي يعرف أني نادر جدا لما باتكلم عن نفسي
وعن شخصيتي الحقيقيه في المدونه وباحب يكون كلامي مقتصر علي الخواطر
اللي باكتبها أو ارائي وأفكاري في ما يحدث في مجتمعنا وفي بلدنا الحبيبه وبس.....
لكن بناءا علي طلب الأستاذ فاروق اللي طبعا عزيز عليا جدا ومينفعش أرفض له طلب ...
فلازم أجاوب علي أسئله التاج اللي بعتهولي وشرفني بانه اختارني من الناس اللي
(هيدبسهم فيه) قصدي هيكلفهم بالاجابه عليه ...
لأ وايه دي أسئله بتطلب منك تفضح نفسك وتقول خبايا شخصيتك بس اعمل ايه بقا
هاجاوب وأمري لله ....

بس تعرفوا ان الانسان صعب جدا عليه انه يوصف نفسه أو يتكلم عنها....

والان اليكم التاج السلطاني....

1- اذكر اسم من طلب منك حل هذا الواجب؟
اه اللي دبسني يعني ....هوالأستاذ فاروق بن النيل صاحب مدونتي (عصفور الجنه ) و(تجاربي وحكاياتي) ....
وبعدين واجب ايه...هو احنا رجعنا تاني للمدرسه والضفاير والحاجات دي طب يا ريت والله حد طايل...

2
- اذكر القوانين المتعـلقة بهذا الواجب؟

أهم قانون في رأيي لازم يتبعه اللي يجاوب علي الواجب ده هو الصدق مع النفس....ومع الناس ...

3- تحدث عن ستة أسرار قد لا يكتشفها من يقابلك للمرة الأولى؟

اول سر: ان اللي يقابلني لاول مرة بيفتكر من طريقه كلامي اني فاهمه الدنيا والناس كويس
وان صعب حد يضحك عليا... بس في الحقيقه أنا مش كده خااااااااالص بالعكس بقا
انا طيبه جدا وبافترض دايما ان اللي قدامي صادق وعشان كده ياما اتغشيت في ناس
كنت فاكرة اني فاهماهم كويس...ويمكن بالعكس بقا لما اتخدعت واتغشيت من أكتر من حد ده
خلاني بعد كده اوهم اللي قدامي اني مش طيبه وعلي نياتي علشان محدش يضحك عليا ويعرف
اني طيبه وبصدق كل اللي بيتقال لي ...

تاني سر: ناس كتير لما يشوفوني من غير ما يتعاملوا معايا بيفتكروا اني مغرورة ....
يمكن لأني مش بفضل اني انا اللي ابتدي بالكلام ....انا باتعامل عن بعد الأول لحد ما اللي قدامي
يبدي استعداده انه يتعرف عليا وبعدين من أول مرة يتكلم معايا بكتشف لوحده اني انسانه
في منتهي البساطه وأبعد ما أكون عن الغرور والعياذ بالله .....

السر التالت:
ان كل اللي يعرفني ويتعامل معايا عن قرب بيفتكروا اني انسانه اجتماعيه جدا...
بس في الحقيقه انا مش اجتماعيه بالدرجه اللي هما متصورينها
انا باكون مرتاحه أكتر وانا لوحدي في أودتي وقافله الباب كمان ...
وباتعامل مع الناس من منطلق الاحتياج والضرورة ولأني مينفعش أعتزلهم....

السر الرابع: اللي يعرفوني بيفتكروا اني انسانه عمليه جدا....
يمكن علشان طريقه تفكيري مختلفه شويه عن اللي حواليا....
ويمكن علشان يعني أنا خريجه كليه العلوم وأخدت ماجستير في تخصص دقيق
وأحلامي وطموحاتي كلها بتنصب في البحث العلمي والشغل المناسب لطموحي العلمي....
فبيفتكروا ان الحب والجواز مش من أولوياتي في الحياة ....بس الحقيقه بقا اني رومانسيه جداااا ...
وباحلم بالحب والجواز زي اي بنت في الدنيا ويمكن أكتر شويه....


السر الخامس : أنا مريضه بداء الدقه في العمل....لدرجه الوسوسه ......
مش باعرف أكروت أي حاجه ....
ولو شيطاني وزني مرة وقالي دي حاجه صغيرة ومش مهمه فوتيها
أفضل طول الليل ضميري يحفر في نافوخي زي الشنيور من وخز الضمير .....
والنبي محدش فيكم عنده علاج كويس أنيم بيه ضميري شويه عشان أعرف أعيش في المجتمع
اللي ميعرفش يعني ايه ضمير ده....

السر السادس:
أنا شخصيه مرحه جدا باحب أهزر واضحك وبالرغم من أي هموم جوايا
مش باحب اكون نكديه في القعده مع قرايبي أو أصحابي وبقول الناس ملهاش ذنب أنكد عليها....
بس الروح المرحه دي بتخلي الناس تفتكر اني معنديش هموم أو مشاكل واني الحياة عندي بمبي بمبي ....
مع اني والله ممكن أكون قاعده مع ناس حالهم أحسن من حالي بكتير
ويرسموا الكأبه علي وشوشهم علشان خايفين من الحسد ويقولولي انا
أصلك فايقه ورايقه وانا في سري بقول ربنا يعلم مين فينا حاله أحسن من مين......

4- حّول هذا الواجب إلى ستة مدونين، واذكر أسماءهم مع روابط مدوناتهم في موضوعك؟

1-خواطر شابه
2- - فتاة من الصعيد
3-شريف باشا (مدونه هجايص)
4-sal
5-Haythem elsays
6-Mr:PRESEDENT

5-اترك تعليقًا في مدونة من حّولت الواجب عليهم؛ ليعلموا عن هذا الواجب....
علم وينفذ....







السبت، ٥ يونيو ٢٠١٠

عاجل...رساله شهيد الحريه


يا أهل الأرض الكرام...
من مختلف الألسن والبلدان...
انا
شهيد الحريه....
باكلمكم من أعلي مكان...
ممكن يتصورة انسان ...
أنا في
الجنه بانعم بيها...
رب الكون كافئني بيها ..
هانت حياتي وضحيت بيها...
هددني الجندي الصهيوني ...
ومدافعه ولا خوفوني ....
من شجاعتي جن جنونه...



وقتلني الجندي الصهيوني....
برصاص الغدرالجبان...
************
يا أهل الأرض الكرام...
عارفين ليه عمل كده فيا؟؟؟
لأني ما رضيت بالهوان ...
ما رضيت بحصار أخويا الانسان ...
مانا زيه برضه انسان ...
ليه احنا ناكل ونتنعم...
وولادنا تلعب وتتعلم ...
وأسافر أتفسح برا ...
ولما أعيا أتعالج واشفي...
وأخويا الانسان الغزاوي...
متحاصر علي دماغه بلاوي...
مقطوع عنه النور والميا...
ولاأكل ولا عيشه هنيه ...
وبيوته هدوها عليه...
وأطفاله شابوا قدام عينيه...
حسيت بمعاناته ولبيت نداءاته...


ونويت وشديت الرحال ...
مع أحرار العالم الأبطال...
يا اما أساعده ياتبقي حياتي...
أغلي هديه أقدمهالوة...
************
يا أهل الأرض الكرام...
من كل بلاد العربان...
انت يا عربي يالي مثيله...
ياللي دينك نفس دينه....
ياللي كلامك هو كلامه....
ولسانك ينطق نفس حروفه ...
وحدودك بتطل عليه ...
وشايف اللي غرقان فيه ...
ليه ساكت علي حصارأخوك ...
ليه عمري ما سمعت لك صوت...
لو سكوتك ضعف منك....
انت صاحب حق ... اتكلم الحق هيقويك...
لوسكوتك خوف علي سلطان الدنيا...
سلطانك زايل زايل ...ليه تبص تحت رجليك...
أيا كان سبب سكوتك...ما في سبب يبرر سكوتك...

يا أهل الأرض الكرام... ***********
قبل مامشي هاوصيكم وصيه...
اوعوا تنسوا أهل غزة...
انا ضحيت بنفسي ......
وبدمي فتحت الطريق...
عشان تكملوا المشوار...
وتفكوا عن غزة الحصار...
أنا كده عملت اللي عليا...
جيت ووصلت الرساله...
رساله شهيد الحريه....