topbella

السبت، ١٢ فبراير ٢٠١١

انتصار شعب



يوم الجمعه 11/2/2011

يوم سيذكر كيوم تاريخي من أيام مصر المحروسه

نعم لا أصدق اني عشت في مصر

حتي أري يوما من أيام الوطن

سيذكر في التاريخ ويدرسه الطلاب في كتب التاريخ

كما درسنا نحن الثورة العرابيه وثورة 1919 وثورة 1952

هانحن اليوم في ثورة جديده

ثورة 25 يناير 2011

التي أشعل شرارتها شباب هم خيرة شباب مصر

أبطال حفروا اسمهم بحروف من نور

في تاريخ مصر الحديث والمعاصر...

ثم سرعان ما انضم اليهم جموع الشعب المصري

في كل بقعه من مصر المحروسه ...

الموقف جلل ...الفرحه غامرة....

القلب يخفق من شده السعاده بالانتصار

وبالحريه بعد طول انتظار...

ولكن لا ينبغي في غمرة فرحتنا أن ننسي


شهداءنا الأبرار



الذين فقدوا حياتهم برصاص الغدر والخيانه

في سبيل أن نحيا نحن الان في عدل وسلام وحريه وعزة وكرامه ...

نعم لن ننساكم أيها الأبطال ....لن ننساكم أيها الأحرار

كيف ننسي من هانت عليه حياته وقدمها هديه لوطنه

نعم فهذه تضحيه كبيرة لا يقدم علي فعلها

الا كل حر صادق المحبه لوطنه ولشعب بلاده

التحيه كل التحيه لأرواحكم الطاهرة

وأسأل الله العلي القدير

أن يسكنكم فسيح جناته

وأن ينزلكم منازل النبيين والصديقين والشهداء

وحسن أولئك رفيقا

وأن يجعل قبوركم روضه من رياض الجنه

وأن يتجاوز عن سيئاتكم

وأن يغفر لكم ذنوبكم

وأن يلهم أمهاتكم وذويكم جميعا الصبر والسلوان

وأن يلحقهم بكم علي خير

في جنات النعيم جزاء صبرهم

امين

الاثنين، ٧ فبراير ٢٠١١

ازاي




إزاي ترضيلي حبيبتي

أتمعشق إسمك وانتى

عماله تزيدي في حيرتي

وما انتيش حاسه بطيبتى

إزاي !
مش لاقي في عشقك دافع
ولا صدقي في حبك شافع
إزاي أنا رافع راسك

وانتي بتحني في راسي

إزاي!
أنا أقدم شارع فيكي

وآمالك م اللي باليكي
أنا طفل اتعلق بيكي

في نص السكه وتوهتيه
أنا لو عاشقك متخير
كان قلبى زمانه اتغير
وحياتك لفضل أغير فيكي

لحد ما ترضى عليه
وإزاي ترضيلي حبيبتي
إزاي سيبانى ف ضعفى

طب ليه مش واقفه ف صفى
وانا عشت حياتى بحالها
عشان مالمحش ف عينك خوف
وف بحرك ولا ف برك

إزاى احميلك ظهرك
وانا ضهرى ف اخر الليل
دايما بيبات محني ومكشوف

الاغنيه الرائعه دي تم تسجيلها قبل بداية اندلاع ثورة 25 يناير

ثورة مصر المباركه بمده وكان من المفترض انها تذاع في التلفزيون المصري

ولكن تم استبعادها ورفضها لان بها بعض الجمل التحريضيه

حسب ما قيل علي لسان كلا من منى الشاذلي ووائل الابراشي

واتذاعت امبارح حصري علي قناه دريم

بعداهداءها من المطرب محمد منير للقناة........


الخميس، ٣ فبراير ٢٠١١

أهلا ...مصر الجديدة


في بدايه كلامي لازم أوجه تحيه واعتذار

من أعماق قلبي لشباب مصر وبالذات شباب 25 يناير

التحيه واجبه لأنكم عدلتوا حال البلد اللي مقلوب بقاله 30 سنه

في أسبوع .....

والاعتذار لأني واحده من الناس اللي كنت دايما بكرر جمله ان الرجاله ماتوا في 73

وان الشباب دلوقتي أغلبهم معندهومش احساس بالمسؤليه وسطحيين في تفكيرهم ومش فاهمين حاجه الا من رحم ربي ...

(مع اني واحده من الشباب دول طبعا بس انا باتكلم عن الشباب يعني الرجاله)

بس اللي عملتوة غير فكرتي تماما وعرفت اني كنت غلطانه

وان مصر لسه فيها شباب رجاله وجدعان قوي قوي قوي ....

أيوة

لا سحر ولا شعوذه

لا خيال ولا أحلام

مصر اتغيرت يا جدعان

مصر بقا فيها النهارده رئيس وزرا مشهود له بالكفاءة ونظافه اليد

بيتكلم بصراحه وببساطه

مع الشعب

لأوالأدهي من كده انه بيعتذر

ايشي خيال يا ناس .....

داحنا كنا خلاص اتعودنا علي ان الوزيرده مش بشر

لا حاجه أعلي من صنف البشر من كتر ماهما

كانوا بيكلمونا من طراطيف مناخيرهم

مصر بقا فيها النهارده نائب للرئيس

مصر فيها كلام عن اصلاح الدستور وبالذات المواد اللي الترزيه فصلوها علي مقاس مبارك الابن

مصر بقا فيها اعتراف علني من الكل بحدوث تزوير في الانتخابات

طول السنين اللي فاتت

مصر بقا فيها وزارة جديده (هي مش جديده قوي يعني )

بس كل وزير دلوقتي طالع في البرامج مش عارف يخطب ود الجماهير ازاي عشان ترضي عنه ....

لا والأهم من ده كله

مصر اتهز فيها عرش حاكم كان راسخ لمده 30 سنه بيعمل ما بداله وبيسوقنا كأننا بهايم ومبيعملش حساب لكلامنا وأصلا مكانش حد يجرأ يتكلم .....

ونتيجه لكده ان شاء الله من هنا ورايح هيبقي عندنا انتخابات بجد مش كده وكده

لأول مرة في حياتي هاهتم اني اروح انتخب وأقول رأيي وانا عارفه ان صوتي مش هيتزور وهيتاخد بيه فعلا

كل دي مكاسب كسبتها مصر في أسبوع

كان لازم نكون دلوقتي فرحانين

وبنهني بعض بالمكاسب دي كلها

لكن للأسف الناس اللي اتعودت علي ان الشعب ده لازم يفضل خانع

قررت ان الشعب مادام قرر ينتزع كرامته وحريته

يبقي لازم يدفع تمن حريته غالي قوي

وادينا بندفعه من دم شبابنا الطاهر

ومن أمننا اللي تولينا مسؤليته بنفسنا

ومن حاله الهلع والقلق والكوابيس اللي بنشوفها في نومنا والكوابيس الأفظع اللي بنشوفها علي شاشات التلفزيون واحنا صاحيين

لما نشوف المصريين بيقتلوا في بعض ودمهم سايح

ولما نشوف اثار ورموز ومباني مصر الجميله بتتخرب

وبتتحرق ومحدش بيلحقها .....

يا جماعه بعترف ان أفكاري دلوقتي مشوشه

مش عارفه أبقا مع مين ضد مين

مش عارفه مين الصح ومين الغلط

فريق بيقول نسيبه يقعد الكام شهر دول

واللي خلانا استحملناعقود نستحمل الكام شهر الباقيين

وخلاص هما خدوا كل اللي عايزينه

و لازم المتظاهرين يمشوا ويفضوها سيرة

والحياة في مصر ترجع تمشي

والناس ترجع لأشغالها

عشان الاقتصاد والخساير

ولازم يكون في رئيس عشان نقدر نعدل الدستور

لأنه لومشي دلوقتي هنعمل انتخابات طبقا للدستور الحالي المنيل بنيله

(المتفصل علي مبارك الابن ويا خوفي نبقي خلصنا من الاب وهنلبس في الابن لأنه ممكن يرجع ويترشح)

وفريق تاني بيقوللااااااااا لازم يمشي فورا

لأن من واقع خبرتنا الطويله مع النظام وأعوانه القدام

وألاعيبهم اللي فشر ألاعيب وبهلونات السيرك القومي بالعجوزة مش ضامنين ان اللي اتوعد بيه يتنفذ لو فضل....

وبصراحه كلا الفريقين معاه حق في كلامه

بس انا بقا بأيد أكتر الفريق الأول مش ثقه في النظام لأ....

بس علشان هو وضع نفسه في موقف حرج عالميا

وخد وعد علي نفسه قدام العالم كله

وانه اصبح كمان ورقه خسرانه في ايد الغرب اللي كانوا أصدقاء أقوياء وداعمين أساسيين لحكمه واللي دلوقتي بيطالبوة بالرحيل وفورا

يعني باختصار مفيش حد هيأيده لا جوا ولا برا

وبرضه لأن وقف حال البلد بالطريقه دي مش في مصلحتنا أبدا واحنا اللي هندفع تمن الخراب والدمار اللي بيتسبب فيه كل يوم زياده من الاضرابات والاعتصامات

ده غير ما يقال عن الأيدي الخفيه والأجندات الغربيه اللي شايفه فيما يحدث مرتع خصب لتنفيذ مخططاتها فبلاش ندي أي حد فرصه يستغل انقسامنا الداخلي لصالحه ...

انا بقول الكلام ده دلوقتي لأن

بكرة الجمعه ....

جمعه الرحيل زي ما بيسموها

ومن المتوقع انه يكون يوم عصيب ودامي

انا خايفه قوي قوي من بكرة

ياجماعه ياللي نازلين بكرة سواء مؤيد أو معارض

اتقوا الله في مصر وفي شعب مصر الغلبان المقهور

ومتدوش حد فرصه يستخدمكم في الاضرار بمصلحه مصر

ربنا يستر