topbella

الخميس، ٣ فبراير ٢٠١١

أهلا ...مصر الجديدة


في بدايه كلامي لازم أوجه تحيه واعتذار

من أعماق قلبي لشباب مصر وبالذات شباب 25 يناير

التحيه واجبه لأنكم عدلتوا حال البلد اللي مقلوب بقاله 30 سنه

في أسبوع .....

والاعتذار لأني واحده من الناس اللي كنت دايما بكرر جمله ان الرجاله ماتوا في 73

وان الشباب دلوقتي أغلبهم معندهومش احساس بالمسؤليه وسطحيين في تفكيرهم ومش فاهمين حاجه الا من رحم ربي ...

(مع اني واحده من الشباب دول طبعا بس انا باتكلم عن الشباب يعني الرجاله)

بس اللي عملتوة غير فكرتي تماما وعرفت اني كنت غلطانه

وان مصر لسه فيها شباب رجاله وجدعان قوي قوي قوي ....

أيوة

لا سحر ولا شعوذه

لا خيال ولا أحلام

مصر اتغيرت يا جدعان

مصر بقا فيها النهارده رئيس وزرا مشهود له بالكفاءة ونظافه اليد

بيتكلم بصراحه وببساطه

مع الشعب

لأوالأدهي من كده انه بيعتذر

ايشي خيال يا ناس .....

داحنا كنا خلاص اتعودنا علي ان الوزيرده مش بشر

لا حاجه أعلي من صنف البشر من كتر ماهما

كانوا بيكلمونا من طراطيف مناخيرهم

مصر بقا فيها النهارده نائب للرئيس

مصر فيها كلام عن اصلاح الدستور وبالذات المواد اللي الترزيه فصلوها علي مقاس مبارك الابن

مصر بقا فيها اعتراف علني من الكل بحدوث تزوير في الانتخابات

طول السنين اللي فاتت

مصر بقا فيها وزارة جديده (هي مش جديده قوي يعني )

بس كل وزير دلوقتي طالع في البرامج مش عارف يخطب ود الجماهير ازاي عشان ترضي عنه ....

لا والأهم من ده كله

مصر اتهز فيها عرش حاكم كان راسخ لمده 30 سنه بيعمل ما بداله وبيسوقنا كأننا بهايم ومبيعملش حساب لكلامنا وأصلا مكانش حد يجرأ يتكلم .....

ونتيجه لكده ان شاء الله من هنا ورايح هيبقي عندنا انتخابات بجد مش كده وكده

لأول مرة في حياتي هاهتم اني اروح انتخب وأقول رأيي وانا عارفه ان صوتي مش هيتزور وهيتاخد بيه فعلا

كل دي مكاسب كسبتها مصر في أسبوع

كان لازم نكون دلوقتي فرحانين

وبنهني بعض بالمكاسب دي كلها

لكن للأسف الناس اللي اتعودت علي ان الشعب ده لازم يفضل خانع

قررت ان الشعب مادام قرر ينتزع كرامته وحريته

يبقي لازم يدفع تمن حريته غالي قوي

وادينا بندفعه من دم شبابنا الطاهر

ومن أمننا اللي تولينا مسؤليته بنفسنا

ومن حاله الهلع والقلق والكوابيس اللي بنشوفها في نومنا والكوابيس الأفظع اللي بنشوفها علي شاشات التلفزيون واحنا صاحيين

لما نشوف المصريين بيقتلوا في بعض ودمهم سايح

ولما نشوف اثار ورموز ومباني مصر الجميله بتتخرب

وبتتحرق ومحدش بيلحقها .....

يا جماعه بعترف ان أفكاري دلوقتي مشوشه

مش عارفه أبقا مع مين ضد مين

مش عارفه مين الصح ومين الغلط

فريق بيقول نسيبه يقعد الكام شهر دول

واللي خلانا استحملناعقود نستحمل الكام شهر الباقيين

وخلاص هما خدوا كل اللي عايزينه

و لازم المتظاهرين يمشوا ويفضوها سيرة

والحياة في مصر ترجع تمشي

والناس ترجع لأشغالها

عشان الاقتصاد والخساير

ولازم يكون في رئيس عشان نقدر نعدل الدستور

لأنه لومشي دلوقتي هنعمل انتخابات طبقا للدستور الحالي المنيل بنيله

(المتفصل علي مبارك الابن ويا خوفي نبقي خلصنا من الاب وهنلبس في الابن لأنه ممكن يرجع ويترشح)

وفريق تاني بيقوللااااااااا لازم يمشي فورا

لأن من واقع خبرتنا الطويله مع النظام وأعوانه القدام

وألاعيبهم اللي فشر ألاعيب وبهلونات السيرك القومي بالعجوزة مش ضامنين ان اللي اتوعد بيه يتنفذ لو فضل....

وبصراحه كلا الفريقين معاه حق في كلامه

بس انا بقا بأيد أكتر الفريق الأول مش ثقه في النظام لأ....

بس علشان هو وضع نفسه في موقف حرج عالميا

وخد وعد علي نفسه قدام العالم كله

وانه اصبح كمان ورقه خسرانه في ايد الغرب اللي كانوا أصدقاء أقوياء وداعمين أساسيين لحكمه واللي دلوقتي بيطالبوة بالرحيل وفورا

يعني باختصار مفيش حد هيأيده لا جوا ولا برا

وبرضه لأن وقف حال البلد بالطريقه دي مش في مصلحتنا أبدا واحنا اللي هندفع تمن الخراب والدمار اللي بيتسبب فيه كل يوم زياده من الاضرابات والاعتصامات

ده غير ما يقال عن الأيدي الخفيه والأجندات الغربيه اللي شايفه فيما يحدث مرتع خصب لتنفيذ مخططاتها فبلاش ندي أي حد فرصه يستغل انقسامنا الداخلي لصالحه ...

انا بقول الكلام ده دلوقتي لأن

بكرة الجمعه ....

جمعه الرحيل زي ما بيسموها

ومن المتوقع انه يكون يوم عصيب ودامي

انا خايفه قوي قوي من بكرة

ياجماعه ياللي نازلين بكرة سواء مؤيد أو معارض

اتقوا الله في مصر وفي شعب مصر الغلبان المقهور

ومتدوش حد فرصه يستخدمكم في الاضرار بمصلحه مصر

ربنا يستر









هناك ٥ تعليقات:

Unknown يقول...

وعن جابر - رضي الله عنه - أن النبي صلى الله عليه وسلم قال : " ما من امرئ مسلم يخذل امرأ مسلما في موضع ينتهك فيه حرمته ، وينتقص فيه من عرضه إلا خذله الله تعالى في موطن يحب فيه نصرته ، وما من امرئ مسلم ينصر مسلما في موضع ينتقص فيه من عرضه ، وينتهك فيه من حرمته إلا نصره الله في موطن يحب فيه نصرته " . رواه أبو داود .

غير معرف يقول...

بصى انا هكلمك من نفس وجهة نظرك
انتى بتقولى خساير اقتصاديه كام يعنى ؟
نواب القروض المعلن عنهم فقط و اللى هما حاشيه النظام سرقو خمسين مليار دولار
بنخسر كام كل سنه فى تصدير الغاز
هشام طلعت كسب كام من اراضى الدوله
احمد عز كسب كام بالمحسوبيه وزير الإسكان ده و اللى قبله وده كله من فلوس البلد اللى هى فلوس الناس
لسه فاكره ان احنا بنخسر
انتى عارفه ان احنا ممكن نغطى الخساير بتاعت اليومين اللى فاتو ونعيد بناء مص بشكل ممتاز بالفلوس دى و الناس تبقى عايشه فى رفاهيه
بالنسبه بقى للأجندات فده البعبع اللى بيطلعوه لنا كل ما نيجى نتكلم زى ما هما مخوفين امريكا و اوروبا من الأخوان المسلمين
تحياتى

البنفسج الحزين يقول...

haa وغير معرف
أشكركما جزيل الشكر علي التعليق
يعلم الله عز وجل اني مع الشباب الثائر قلبا وقالبا لأنهم يعملون لمصلحتنا جميعاوليس لمصالحهم الشخصيه وان كنت لا أستطيع المشاركه معهم بنفسي لكني أشاركهم بالدعاء والتضرع لله عز وجل لهم بالتوفيق
وأذكر أني ذكرت اني الان في حيرة من أمري أختار أي الرأيين ؟؟

ولعلي اخترت تأييد الرأي القائل بالكف عن التظاهر فقط حقنا لدماء المصريين والله ان قلبي يتمزق عندما أري دماء الشباب تسيل وهم عزل في مواجهه بلطجيه أطلقهم عليهم من لا يعرف دين ولا رحمه...ودعوة لعودة الاستقرار والأمان
وصوت العقل الان يقول....
لنعطي أنفسنا فرصه لنري صدق من كذب هؤلاء المسؤلين بعد الحزمه الهائله من الاستجابات لمطالبنا ...
والمثل المصري الشائع يقول خليك ورا الكداب لحد باب الدار....
واحنا معانا ضمانات كفايه تجبر النظام علي الوفاء بما وعد زي ما قلت ...
ربنا هيئ لنا من أمرنا رشدا
امين

Noha Saleh يقول...

كلنا خايفين ومتلخبطين وعاوزين نعدى الازمة دى على خير
ربنا يعديها على خير

فاروق سحير ( فاروق بن النيل ) يقول...

الأخت أمل...........
إعتذارك مقبول.........
شاب من شباب 25-28 / يناير " فوق الستين من العمر