topbella

الأحد، ١١ يوليو ٢٠١٠

مطعم أكل وبهججه (اعادة نشر)


في شخصيات مميزةومتفرده ممكن تقابلها في حياتك مفيش منها اتنين ....

الشخصيه دي بتكون عندها صفه محوريه مسيطرة عليها بتتبني عليها كل حواراتها وتصرفاتها ......

يعني لما يذكر اسم الشخصيه دي تتبادر الي الذهن علي طول الصفه الملازمه ليها...

اتعاملت في حياتك مع شخصيات زي دي ؟؟

التلفزيون والسينما قدموا لنا كتير من الشخصيات دي زي مثلا :

مستر اكس النصاب العالمي اللي مدوخ الانتربول (فؤاد المهندس)

اللمبي (الشاب المصري ابن الحارة المصريه الصايع أبو دم خفيف)

القرموطي (الفلاحالفشار قوي مدعي العلاقات مع السياسيين والناس المهمه )

أبو حفيظه (الاعلامي المغرور اللي مش فاهم حاجه )

وتهامي باشا(منتج أفلام عصر الانفتاح ) ووديع( المساعد بتاعه)

كرومبو(المحقق والمكتشف) وطبعا ده التقليد العبيط لشخصيه المحقق جيمس بوند...

طب لو اتخيلنا حوار بين كل الشخصيات دي يا تري هيبقي ازاي..


المكان:مطعم (أكل وبهججه)

الذي يملكه تهامي باشا ...ووديع بقا هو الجرسون اللي بيقدم الطلبات للزباين ...

زباين المطعم حسب ترتيب الظهور هم اللمبي وامه فرنسا– القرموطي-المفتش كورومبو...



اللمبي: اول ما دخل المطعم :مع السلام عليكوا

فرنسا:ايه يا واد المطعم النص كم ده اللي انت جايبنا فيه ماهو انت لوكنت سمعت كلامي في حدوته شرم الشيخ

كان زمانا بناكل في الهتلون دلوقتي بس اعمل فيك ايه طالع فقري زي المرحوم أبوك...

اللمبي: ليه ياما بس كده دانا بحبك ياما...

اللمبي: مش كفايه انك لسه لابسه البطلون بتاعي ياما

وانا مرضيشت اخليكي تقلعيه وبقالي اسبوع بنام بالجاكيته بس....

فرنسا:لأ قلعهوني يا واد خليني استهوي....

راحوا علي اول طرابيزة وزاحوا الكراسي وطلعوا ملايه وفرشوها وقعدوا علي الارض

وفضل اللمبي يصقف للجرسون 3 دقايق متواصله حتي بعد ماالجرسون جه استمربرضه في التصقيف...

وديع :خلاص خلاص يا باشا انا جيت...

اللمبي:أصلك جاي مبسوط افتكرتك هتتشقلبنمرة يعني افتكرتها نمرة عاملينها في قلب المحل ...

وديع:مبتسما كالعادة...أأمرني يا باشا ...

اللمبي:انا عاوز شندوشت كبده بس تكون طازة يعني لسه البقرة

مقتوله وخارجه الكبده من بطنها ع النار علي طول

وديع:حاضر يا باشا

اللمبي: أقولك انت دخل البقرة نفسها الفرن علشان نضمن ان الكبده تستوي كويس

وديع: حاضر يا باشا

اللمبي:بس وحياةوالدك اتوصي

وديع :حاضر يا باشا

حط بصل كتير ...وفلفل كتير

وديع :حاضر يا باشا

ولا تيجي تقتل البقرة انت ...

وديع دخل يجهز الطلب للمبي...


فجأة ظهر واحد دخل رجل واحده للمحل وخرجها تاني...

وبعدين دخل راسه بس من الباب والقي نظرة ع المكان وبعدين خرجها تاني...

تالت مرة وبعد ما اطمن ان المكان متأمن ... دخل المطعم ...

اتجه ناحيه الطرابيزة اللي مديه وشها للحيطه وجر الكرسي بسرعه وقعد...

كان لابس نضارة تغطي تلات اربع وشه مش باين من وشه غير الشنبات...

وصقف 3صقفات بالعدد عشان ينده ع الجرسون :

وديع:أأمرني يا باشا


القرموطي:والنبي وحياة والدك كنت بس متأخذنيش في الكلام يعني ولو مفيهاش اساءة أدب

ولا رزاله يعني كده ولا يعني ...

وديعشاخطا: لا يا باشا مفيهاش اي حاجه م اللي بتقول عليها قول وخلصني...

هي الCIA مراقبه المكان...

وديع :ايييييييييييييييه

القرموطي:طب البرادعي مجاش امبارح سأل عليا ...

وديع :مييييييييييييين

القرموطي:والله انت شكلك كده مش عارف انت بتتكلم مع مين...

لأ مبدهاش لازم أعرفك بنفسي ...

فاكر لما أوباما جه مصر الصيفيه اللي فاتت دي واخدلي بالك انت لما خطب في الجامعه تحت القبه....

اتصل استأذني وقالي بعد اذنك يابا الحاج قرموطي محتاجين المطرح اللي تحت القبه

قد ساعتين زمن كدة...لو مفيهاش رزاله يعني ....معلش احنا بنتكلم ....

قلتله عيب تقول كده يابوالأوابيم قبه ايه اللي بتتكلم فيها ....احنا بينا كده برضوا ...

دانت لو عايز افضيلك الوطن العربي كله تقيلك فيه قد ساعتين زمن وقت العصاري ميغلاش عليك ...

بعتله رجالتي زوقوله القبه ولمعوها وخلوها تبرق أة ده كله الا أوباما ده حبيبي...

ده ميعملش حاجه ف أمريكا الا لما يشورني يا راجل داأنا اخر مرة روحت أمريكا

شالي رجل من رجول تمثال الحريه عشان الواد ابني الصغير لا مؤاخذة

كان عايز يهرش بيها معلش احنا بنتكلم يعني...

وديع:اييييييييييييييييه

طب قولي تطلب ايه عشان عندي زباين كتير في المحل...

القرموطي: والله انت شكلك مش مريحني وانا حاسس كده

انك قريب مرعي بتاع الكيليمه...

يللا ما علينا هاتلنا شويه شوربه ضفادع وكبد سحالي علي ذوقك كده

حكم أنا اصلي احب اكلي يبقي خفيف خفيف كده عشان عامل دايت ...

وذهب وديع لاحضارالطلب...

في اللحظه دي خرج تهامي باشا من مكتبه وعلي يمينه مزة بيضاء وعلي شماله مزة سمرا وألقي نظرة

سريعه ع الزباين ووجد زبون قاعد فاضي فنده علي وديع...

وديع ...يا وديع...

وجه وديع جري...

تهامي باشا:الزبون دة ايديه مش في محفظته ليه يا وديع ...

وديع:أصله يا باشا لسه داخل يا باشا وملحقتش يا باشا يعني يا باشا...

تهامي باشا :ملحقتش ؟؟؟ملحقتش ايه يا وديع...

خد ....قعد جنبه المزة دي تسليه علي ما الاكل يخلص

وديع :أستااااااااااااااااااذ

وفجأة صرخ القرموطي الحقوني ....

اه ياما اه يابا أنا كنت عارف ان الليله دي مش هتعدي علي خير....

فجري عليه تهامي باشا ووديع ....خير خير في ايه... ايه اللي حصل ...

القرموطي :أنا اتسرقت الكوفيه الصوف بتاعتي اتسرقت

دي كانت هديه من واحد صاحبي عزيز عليه قوي دي مفيش أختها في الشرق الاوسط كله ...

تهامي باشا: ليه يعني كانت هديه من مين ...

القرموطي : كانت هديه من كوفي عنان ...(مش بقولك كوفيه)

وحصلت هرجله وهيصه كبيرة قوي في المطعم ...

وعلي الفور استدعي تهامي باشا المفتش كورمبو علشان يحقق و يعرف مين اللي سرق الكوفيه ...

وانحصر الشك في ال 3أشخاص اللي كانوا موجودين في المطعم وقت السرقه

فرنسا واللمبي ووديع...

ولما سألنا الست فرنسا قالت:

كوفيه ايه دي اللي هاسرقها يا راجل يا موكوس ...

اللمبي :ياما ماتوديناش في داهيه ياما ده المفتش كورومبو لاحسن يحبسنا ...

فرنسا :اسكت يا واد بلا كورمبو بلا ابو جلمبو ...

دا انا فرنسا يعني لا أهل تلم ولا حكومه تهم ...

كورمبو : بعد ما فرنسا بعزقت كرامته ... وبعترت مواهبه الكشفيه ...

لم نفسه من سكات واستبعد فرنسا خالص وخرجها من دايرة الاشتباة ...

ولما سألنا اللمبي قال:

يا سعادة حضرت المفتش زورومبو ...

أنا اشاسا مكنتش قاعد في المطعم وقت السرقه عشان وانا قاعد لمحت واد صاحبي معدي برا المطعم

بالصتفه كان ليه عنده مبلغ كبير ...

خرجت جري من المطعم وقالتله فين ياد الخمشتاشر جنيه اللي عليك ...مبلغ كبيركبير يعني ...

وانت عارف دلوقتي الجنيه غلب الكارنيه والدنيا ضيقه ساعتك ....

يعني سياتك لو حققت حتلاقيني والله العظيم بيريئ ....

بيريئ بيريئ يعني ...

ولما جه وديع علشان كورومبو يسأله :

لاحظ كورمبو انه مخبي حاجه تحت يونيفورم المطعم اللي هو لابسه

وباين طرفها وهو مكلكع من تحت ياقه القميص ...

وهنا صرخ كورومبو وقال انا عرفت مين اللي سرق الكوفيه...

لو انتوا كمان عرفتوا محدش يتصل عشان مش هاتقابلوني قريب في اي حلقه جايه

لاني هاخد أجازة من الشغل وهاتجوز الست فرنسا اللي سحرتني وهي بتهزأني...

هي دي الست اللي كنت مستنيها من زمان ....

وهنا دخلت فرنسا مطبخ المطعم اللي اصبح بلا جرسون بعد القبض علي وديع

وخرجت بصينيه عليها كوبيات شربات ولما لقيت الكل في المطعم بيبصلها قالت في خجل :

كنت داخله أعمل كوبايتين شاي عشان نحبس بعد الاكل بس ملقيتش شاي جيبتلكوا شربات...

ولما اتكشف وديع واتعرف ان هو اللي سرق الكوفيه بتاعه القرموطي ...

حاول ينكر ورد علي المفتش كورومبو وراوغ وقال له اشمعنا...

ليه ماتهمتش تهامي باشا مهو كان معانا في المطعم وقت السرقه؟؟؟...

رد كورومبو وهوبيبص لوديع نظرة استهزاء وقال له طبعا مشكتش في تهامي لأنه صاحب المطعم وأكيد سمعته تهمه ...

وحادثه سرقه زي دي أكيد هتأثر علي سمعه المطعم وبعدين حرام منظلموش.....

( الراجل كان مشغول في مكتبه مع المزز طول الوقت يبقي هيسرق امتي )

اللمبي :انا دلوقتي عندي سؤال بعد اذنك :

كورومبو :اتفضل

اللمبي: يعني انت دلوقتي بتعاقبه عشان سرق ولا عشان معرفش يخبي اللي سرقه ...

كورومبو : شيلوا الواد ده من قدامي...

الثلاثاء، ٢٩ يونيو ٢٠١٠

السفينه والبحار



اركب يا انسان سفينه عمرك


في بحر الحياة راح تمشي بيك


هتطلع وياها رحله


فيها العجايب ففتح عنيك


معاد قيامها معروف لك


معاد مرساها مستخبي عليك


***************

جنبك في البحر سفن كتير


علي ظهرها في ناس كتير


طالعين معاك نفس الرحله


فيهم ناس هتدلك


وناس كتير هتضلك


وناس تايهه من زمان


وناس وصلت بسلام


***************

ياما هتسمع كلام


وتشوف عجايب وأهوال


هتسمع كدب يتصدق


وصدق ما عاد بيتصدق


وحق ضايع غريب


وباطل سايد وعيب


*****************

وعشان توصل للمرسي بسلام


متصدقش كل الكلام


خليك دايما ُربان سفينتك


ودفتها دايما ماسكها في ايديك


دا الريح شديدة وأوقات عنيدة


وان ماكنتش حابكها تفلت من ايديك


******************


وخلي الكلام ده دايما في بالك .....


هاتطلع هاتنزل ...


تكافح تشاغب.....


تشرق تغرب ......


هترتاح هتتعب....


تطول تقصر ...


مسيرك تفارق....






الاثنين، ٢١ يونيو ٢٠١٠

الاعتراف




التاسعه الاخمس دقائق صباحا
هي.....وقفت كعادتها كل صباح
ترتشف من كوب النسكافيه
الذي تتعمد طلبه في هذا الميعاد من كل صباح
ليكون شرابه حجه تعطلها عن العمل خمس دقائق
حتي تتفرغ للتطلع من
نافذه مكتبها في الشركه التي تعمل بها
************
هو بالنسبه لها .... ذلك الشاب الوسيم الأنيق
الذي يعمل محاسبا في البنك المقابل للشركه التي تعمل بها
( التاسعه تماما)
هو الميعاد الثابت لوصوله يوميا لمقرعمله
يمكنك أن تضبط ساعتك علي ميعاد وصوله
هكذا كانت تصفه لأعز صديقاتها
************
عندما تراة آت من بعيد بخطواته الرشيقه الواثقه
تشعر بدقات قلبها تتسارع وكأنها في سباق...
كم تتمني أن تراة من قريب ....
هكذا وجها لوجه....
كم تتمني أن تنظر في عينيه....
تتطلع اليهما لتعرف درجه لونهما
كم تتمني أن تحادثه...........تتوق لسماع صوته....

..... ولكن.....
كيف وهو أصلا لا يعرفها....
ولا يشعر بوجودها....
ولا يراها كما تراة .......
شوقها اليه أنساها أنها تتابعه فقط
من خلال زجاج النافذة ....

**************
الثالثه الا ربع عصرا
هو... جلس كعادته كل يوم ينظر من زجاج نافذة الحافله التابعه للبنك

يتفحص الخارجين من مبني الشركه المقابله للبنك
هي.. بالنسبه له تلك الفتاة الجميله ذات الملامح الرقيقه
التي يراها كل يوم في نفس الميعاد خارجه من مبني الشركه

المجاور للبنك الذي يعمل فيه
وهو جالس في الحافله في انتظار اقلاعها في تمام الثالثه
وهو يتعمد النزول قبل الميعاد ليتثني له رؤيه من اثرت قلبه برقتها وجمالها
كم يتمني لو عرفت كم هو معجب بها
ينظر اليها وهي تتحدث مع صديقاتها
وتبتسم معهن ابتسامات غايه في العذوبه

كم يتمني لو تكون ابتساماتها الرقيقه له
....ولكن ....

كيف وهي لا تراة كما يراها
ولا تشعر بوجوده
شوقه اليها أنساة أنه ينظر اليها فقط
من خلال زجاج النافذة

*************
هو.... تأكد أن حبها ملك قلبه وأنه لن يستطيع أن يظل بعيداعنها أكثر من هذا ...

استجمع شجاعته وقرر أن يكون هذا الصباح هو صباح الاعتراف بالحب
لابد أن يذهب اليها وينتظرها قبل دخولها للشركه ويروي لها ماذا فعل به حبها

نعم سيذهب اليها وليكن ما يكون
هكذا ردد بينه وبين نفسه
***********
هي وبعد تردد طويل
قررت أن تنهي هذا الصباح حيرتها
قررت أن تصارحه بحبها وليكن ما يكون
هكذا رددت بينها وبين نفسها
لكي لا تثنيها مخاوفها عن المضي
قدما نحو ما قررت فعله
استجمعت شجاعتها....
استدعت كل الحيل الأنثويه
التي طالما سمعتها من صديقاتها
هاهو قادم ....
الان اذاً



ولكن.... فجأة رأته يتقدم نحوها
بخطواته الرشيقه التي طالما اثرتها
حاملا في يده باقه جميله من الزهور
ونظر اليها برقه وحنان نظرة لم ولن تنساها
وتحدث بصوت كأنه العندليب ونطق بكلمه واحده لم تكن تنتظر سواها


أحبك







الجمعة، ١١ يونيو ٢٠١٠

التاج السلطاني



شوفوا بقا ...
اللي بيتابع المدونه بتاعتي يعرف أني نادر جدا لما باتكلم عن نفسي
وعن شخصيتي الحقيقيه في المدونه وباحب يكون كلامي مقتصر علي الخواطر
اللي باكتبها أو ارائي وأفكاري في ما يحدث في مجتمعنا وفي بلدنا الحبيبه وبس.....
لكن بناءا علي طلب الأستاذ فاروق اللي طبعا عزيز عليا جدا ومينفعش أرفض له طلب ...
فلازم أجاوب علي أسئله التاج اللي بعتهولي وشرفني بانه اختارني من الناس اللي
(هيدبسهم فيه) قصدي هيكلفهم بالاجابه عليه ...
لأ وايه دي أسئله بتطلب منك تفضح نفسك وتقول خبايا شخصيتك بس اعمل ايه بقا
هاجاوب وأمري لله ....

بس تعرفوا ان الانسان صعب جدا عليه انه يوصف نفسه أو يتكلم عنها....

والان اليكم التاج السلطاني....

1- اذكر اسم من طلب منك حل هذا الواجب؟
اه اللي دبسني يعني ....هوالأستاذ فاروق بن النيل صاحب مدونتي (عصفور الجنه ) و(تجاربي وحكاياتي) ....
وبعدين واجب ايه...هو احنا رجعنا تاني للمدرسه والضفاير والحاجات دي طب يا ريت والله حد طايل...

2
- اذكر القوانين المتعـلقة بهذا الواجب؟

أهم قانون في رأيي لازم يتبعه اللي يجاوب علي الواجب ده هو الصدق مع النفس....ومع الناس ...

3- تحدث عن ستة أسرار قد لا يكتشفها من يقابلك للمرة الأولى؟

اول سر: ان اللي يقابلني لاول مرة بيفتكر من طريقه كلامي اني فاهمه الدنيا والناس كويس
وان صعب حد يضحك عليا... بس في الحقيقه أنا مش كده خااااااااالص بالعكس بقا
انا طيبه جدا وبافترض دايما ان اللي قدامي صادق وعشان كده ياما اتغشيت في ناس
كنت فاكرة اني فاهماهم كويس...ويمكن بالعكس بقا لما اتخدعت واتغشيت من أكتر من حد ده
خلاني بعد كده اوهم اللي قدامي اني مش طيبه وعلي نياتي علشان محدش يضحك عليا ويعرف
اني طيبه وبصدق كل اللي بيتقال لي ...

تاني سر: ناس كتير لما يشوفوني من غير ما يتعاملوا معايا بيفتكروا اني مغرورة ....
يمكن لأني مش بفضل اني انا اللي ابتدي بالكلام ....انا باتعامل عن بعد الأول لحد ما اللي قدامي
يبدي استعداده انه يتعرف عليا وبعدين من أول مرة يتكلم معايا بكتشف لوحده اني انسانه
في منتهي البساطه وأبعد ما أكون عن الغرور والعياذ بالله .....

السر التالت:
ان كل اللي يعرفني ويتعامل معايا عن قرب بيفتكروا اني انسانه اجتماعيه جدا...
بس في الحقيقه انا مش اجتماعيه بالدرجه اللي هما متصورينها
انا باكون مرتاحه أكتر وانا لوحدي في أودتي وقافله الباب كمان ...
وباتعامل مع الناس من منطلق الاحتياج والضرورة ولأني مينفعش أعتزلهم....

السر الرابع: اللي يعرفوني بيفتكروا اني انسانه عمليه جدا....
يمكن علشان طريقه تفكيري مختلفه شويه عن اللي حواليا....
ويمكن علشان يعني أنا خريجه كليه العلوم وأخدت ماجستير في تخصص دقيق
وأحلامي وطموحاتي كلها بتنصب في البحث العلمي والشغل المناسب لطموحي العلمي....
فبيفتكروا ان الحب والجواز مش من أولوياتي في الحياة ....بس الحقيقه بقا اني رومانسيه جداااا ...
وباحلم بالحب والجواز زي اي بنت في الدنيا ويمكن أكتر شويه....


السر الخامس : أنا مريضه بداء الدقه في العمل....لدرجه الوسوسه ......
مش باعرف أكروت أي حاجه ....
ولو شيطاني وزني مرة وقالي دي حاجه صغيرة ومش مهمه فوتيها
أفضل طول الليل ضميري يحفر في نافوخي زي الشنيور من وخز الضمير .....
والنبي محدش فيكم عنده علاج كويس أنيم بيه ضميري شويه عشان أعرف أعيش في المجتمع
اللي ميعرفش يعني ايه ضمير ده....

السر السادس:
أنا شخصيه مرحه جدا باحب أهزر واضحك وبالرغم من أي هموم جوايا
مش باحب اكون نكديه في القعده مع قرايبي أو أصحابي وبقول الناس ملهاش ذنب أنكد عليها....
بس الروح المرحه دي بتخلي الناس تفتكر اني معنديش هموم أو مشاكل واني الحياة عندي بمبي بمبي ....
مع اني والله ممكن أكون قاعده مع ناس حالهم أحسن من حالي بكتير
ويرسموا الكأبه علي وشوشهم علشان خايفين من الحسد ويقولولي انا
أصلك فايقه ورايقه وانا في سري بقول ربنا يعلم مين فينا حاله أحسن من مين......

4- حّول هذا الواجب إلى ستة مدونين، واذكر أسماءهم مع روابط مدوناتهم في موضوعك؟

1-خواطر شابه
2- - فتاة من الصعيد
3-شريف باشا (مدونه هجايص)
4-sal
5-Haythem elsays
6-Mr:PRESEDENT

5-اترك تعليقًا في مدونة من حّولت الواجب عليهم؛ ليعلموا عن هذا الواجب....
علم وينفذ....