topbella

الأحد، ١٧ أكتوبر ٢٠١٠

الشجرة الغامضه

سبحان الله .....
الصور دي وصلتني علي الايميل بتاعي وتعجبت جدا لما شوفتها
وأعجبت بها جدا ....
ما أجمل أن نري عظمه الخالق وابداعه في خلقه وعظيم صنعه
ليس فقط في خلق الأنسان وحسب بل في خلق كل كائن حي من حولنا ....
اتفرجوا عليها وقولوا سبحان الله .....


وجدت هذه الشجرة في ولايه

آندرا

برديش - الهنـــد وهي شجرة تدعي

بوباب


وتوجد بكثرة في هذه الولايه

حيث

تتميز بجذعها الكبير وهي الوحيدة من نوعها


والشجرة التي نتكلم عنها هي شجرة وجدت وعليها نقوش تجسد أكثر أنواع الحيوانات




والغريبه أن هذه النقوش متقنه بشكل عجيب....













الأربعاء، ٦ أكتوبر ٢٠١٠

كل سنه وانتي طيبه يا بنفسجتي



هذا البوست بوست احتفالي ....
بمناسبه مرورعام كامل علي دخولي عالم التدوين ...

مدونه....
كنت دائما أسمع الكلمه دي وكنت فاكرة ان المدونات دي بتتكلم في السياسيه وبس
وان المدونين محسوبين علي المعارضه ويلاحقهم الأمن ولاني باكرة السياسه
فكانت فكرتي عن التدوين مش ولابد ...

لكن لما ابتديت ادخل المدونات بجد واتابعها اكتشفت أن الاعتقاد ده خاطئ ....
ومن أول المدونات التي تابعتها مدونه جبهه التهييس الشعبيه لنوارة نجم
ومدونه عايزة أتجوز لغاده عبد العال واكتشفت ان فكرتي عن المدونات مش صحيحه
وعرفت ان مش كل المدونات أصحابها بيتكلموا في السياسه
لأ كل مدون بيختار الموضوع اللي بيحب يتكلم عنه منهم اللي بيكتب موضوعات شخصيه ومنهم اللي بيكتب عن مواقف اتعرض لها في حياته ومنهم اللي بيكتب شعر
ومنهم اللي بيكتب خواطر ..
والمفارقه ان المدونات المتخصصه في السياسه فقط قليله جدا ...

ببساطه عجبتني الفكرة....فكرة ان يبقي عندك صفحه مفتوحه لكل الناس
تكتب فيها كل اللي بيدور في دماغك ...كل اللي عايز تقوله في أي حاجه ...
يعني بدل ما تحاول تراسل أي جرنال علشان تحاول تنشر فيه مقال فيه خاطرة كتبتها
أو رأي عايز تقوله أو شكوي كل البيبان مقفوله ومش عارف توصلها لمسؤل
كل واحد فينا دلوقتي عنده الجريدة الخاصه بتاعته يكتب فيها اللي هو عايزة
مش بس كده انت كمان بتاخد رد فعل فوري علي رأيك ده من خلال التعليقات
وكمان هيتناقش ويتحلل من عده زوايا ...

في البدايه ترددت كثيرا قبل أن اتخذ قرارأنشاء مدونه خاصه بي
لأني كنت أخشي علي نفسي من التعلق بالعالم الافتراضي
فانا شخصيه تحب أن تعيش وتتعايش مع الواقع مهما بلغت درجه قساوته
لكن يكفي انه الحقيقه التي لابد أن تعاش...
ولكني وجدت في هذا العالم الافتراضي أناسأ ذوي فكر وثقافه
ومهمومون بقضايا الوطن وهذة الصفات قلما تجدها في العالم الحقيقي من حولك
والذي كل منشغل بذاته ولا وقت للنقاش والحوار وابداء الأراء بل لا وقت أصلا للفضفضه ...

فأصبح لي أصدقاء افتراضيون أحبهم كثيرا واستفدت من ارائهم وسعدت بمعرفتهم ...
لم أكن أتخيل حين أنشات هذه المدونه أنها ستصبح شئ هام في حياتي ...
نعم تعلقت بها ...لا يمر علي يوم من دون أن أفتحها لأتفقدها ...
وكأني أطمأن عليها..... مدونتي أصبحت تنفيس عما يجول في خاطري
والذي ربما لا أستطيع ان أبوح به لأحد ...أو لا أجد من أصارحه بما أشعر به
فهي الصديقه الموجوده دائما والتي لا أتردد اذا همني شيئأ أو ألح عليا فكرا
أن أذهب اليها لأبث فيها همومي وأشجاني وأفراحي وانفعالاتي وأحداث حياتي وارائي وأفكاري ...

وفي النهايه أود أن اشكركل متابع لما أكتب في هذة المدونه فردا فردا
والذين دائما أسعد بزيارتهم وتعليقاتهم وأستفيد من ارائهم القيمه فيما يطرح في هذة المدونه من مواضيع

رجاء خاص: يا ريت كل اللي عنده رأي خاص في المدونه
أو اي اقتراح لتطويرها يتفضل يقوله
حتي لو نقد أنا باتقبل النقد تماما ومن غير زعل ...
أشكركم

الخميس، ٣٠ سبتمبر ٢٠١٠

أن لا يكون لديك شيئا تخشي أن تخسرة....


أن لا يكون لديك شيئا تخشي أن تخسرة....
ذلك الاحساس الذي يجعلك تشعر بمرارة شديدة ....
وفي نفس الوقت
تشعر بحريه شديدة ......
فأنت الأن تستطيع أن تطلق لتفكيرك العنان ....
وتسمح لخيالك بالاتساع كما شاء ...

ولا تتردد في فعل أي شئ...
أي شئ .....مهما كان خطراً أو ربما مستحيلاً....
ربما هداك تفكيرك... الي أن .......

تناطح السحاب...
تسابق الرياح ...
تطير في السماء ...

وربما تراودك أفكاراًعدوانيه كالرغبه في أن ....
تقتل من قتل حلمك....
تظلم من ظلمك...
تهد المعبد عليك وعلي أعداءك ....

ولكن وبعد فترة من التفكير ...واعادة التفكير ...
والتخيل ...والامعان في التخيل ...
تقف للحظه لتتأمل ....
هل أنت بذلك تعاقب
الظروف التي جعلتك شخصا
لا يملك في حياته شيئا ذا قيمه يخشي خسارته ؟؟؟
أم تعاقب نفسك لأنك لم تستطع تطويع ولا حتي مجاراة تلك الظروف ؟؟؟
فتكون النتيجه أن تكتشف انك خسرت من ضمن ما خسرت
حتي مجرد الشجاعه والاقدام علي محاوله فعل أي شئ ......



الأربعاء، ٨ سبتمبر ٢٠١٠

عزيزي شهر رمضان



عزيزي شهر رمضان ...
منذ أن كنت طفله وانا أكن لك مشاعر جميله....
كان مجرد ذكر اسمك أمامي في أي وقت من السنه يجعلني أشعر بحنين وشوق جارف اليك

كانت أسبابي وقتها مصبوغه بملامح الطفوله ....

مرتبطه بمشاعر الفرحه بالفوانيس والكنافه والقطايف والزينه التي نزين بها المنزل

وبرامج التلفزيون (وخصوصا الفوازير التي كنت أعشقها وأنا طفله طبعا أيام نيللي)

وغيرها من ملامح رمضان الشكليه والمظهريه....

(والتي علمت فيما بعد أن ليس لها في الحقيقه علاقه اطلاقا بشهر رمضان)
وعندما مرت بي السنوات وكبرت أحببتك أكثر وأكثر ....
وأصبحت أشتاق اليك أكثر وأكثر

ولكن طريقه حبي لك اختلفت بالطبع فهو هذة المرة مصبوغ بالعقلانيه والفهم...
كيف لا؟ وانا الان فهمت المغزي الحقيقي من وراءك....
فهمت معني أن يكون الانسان مُحَمل طوال العام بالذنوب والآثام والخطايا

ويرسل له الله الذي يحبه ويريد أن يعفو عنه شهرا كاملا كل عام

فرصه ذهبيه وموسم لغفران الذنوب ...

يأتي رمضان كل عام ولسان حاله يقول لنا هلم الي ربك أيها الانسان

فلقد حان وقت غسيل النفوس من الهموم وغسيل القلوب من الاثام
فلقد أرسلني الله اليكم فرصه ذهبيه لتتضاعف فيه حسناتكم

وتسلسل فيه الشياطين

ليهيؤ لكم كل الفرص للطاعه والغفران واكتساب الحسنات ...
فهمت معني حلاوة أن تناجي الله في جوف الليل كل ليله من ليالي رمضان

ليالي العفو... والمغفرة ...والعتق من النار...
وتدعوةوتطلب منه كل ما تطمع أن يرزقك الله به

وتشكو اليه كل ما يضيق به صدرك...

كل ذلك وانت موقن بالاجابه لأنك تدعو علام الغيوب مالك الملك ...


ولأن الأيام الجميله دائما قصيرة ولأننا اعتدنا عليك ضيفا خفيفاً
تنقضي أيامك بسرعه البرق وتنطوي....

ويأتي هذا الميعاد المحتوم ميعاد الرحيل ...رحيلك أيها الضيف الكريم

ولأن الله الذي أرسلك لنا يعلم مدي حبنا لك ...وحزننا علي فراقك بعد أن اعتدنا عليك...

جعل لنا برحيلك عيداً سعيدا يملأ الأرض حتي ينسينا لوعه فراقك...
فوداعا رمضان...
ولا يسعني الا ان أبدا من الان في الدعاء اللهم بلغنا رمضان القادم ...


الثلاثاء، ١٠ أغسطس ٢٠١٠



أخواني وأحبائي المدونين الأعزاء ....

رمضان كريم ....

كل سنه وأنتم بخير وصحه وعافيه ...

وكل عام وأنتم الي الله أقرب والي طاعته أدوم ...

موسم جني واكتساب الحسنات ابتدي يلا بينا نتسابق للحصول عليها ...

وعايزة أقولكم حاجه بجد خارجه من قلبي ...

أحبكم في الله ...

الجمعة، ٦ أغسطس ٢٠١٠

قارئ الأفكار



أوقات كتير باتمني تبقي عندي القدرة علي قراءة أفكار الناس

اللي بتعامل معاهم في حياتي

معرفش ليه؟ يمكن علشان أنا عموما باحب اعرف الناس شايفاني ازاي...

أو أنا في عيون الأخرين...

يمكن برضه عايزة أعرفمين صادق معايا

ومين بيخدعني ...ما علينا......

طب لو تخيلنا ان أصبح عندنا الملكه دي يعني انت تقدر

تعرف اللي قدامك بيفكر في ايه ..

فهمت حاجه ...أبسطهالك

يعني هنفترض ان العلماء اخترعوا جهاز يمكنك لما تستخدمه

انك تقرا أفكار الشخص اللي قدامك وانت بتكلمه ...

تفتكروا ياتري ده هيكون تأثيرة ايه علي علاقاتك باللي حواليك؟؟؟

ياتري اللي هتكتشفه هيوطد العلاقات دي

ولا هتكتشف حاجات تخليك تنسف العلاقات دي من أساسه؟؟

دي حوارات اتخيلتها بين أشخاص هنشوفها ...

قبل وبعد استخدام الجهاز السحري بتاع قراءة الأفكار..

ده حوار بين شاب وشابه زملاء في نفس مكان العمل:


هي شابه جميله وهو شاب وقور و أمور

لكن في بدايه حياته يعني لسه مكونش نفسه....
تعالوا نشوف الحوار :

هي:صباح الخير يا أستاذ كريم..

هو :صباح النور يا انسه نيفين...

هي:ممكن لو سمحت تفهمني الشغل ده يخلص ازاي

علشان الشغل ده جديد عليا والمدير كلفني بيه...

هو :أه ممكن طبعا مفيش مشكله...

اللي هيسمع الحوار هيقول انه حوار عادي جدا

بين أي اتنين زملاء في العمل

وده الكلام اللي اتقال علي اللسان....

أما بقا لو شغلنا جهاز قارئ الأفكارهيبقا الحوار بالشكل ده:

هي:ايه ده وده جه امته المنيل علي عينه

دانا عيني اتلوحت وانا عماله

ابص علي باب الشركه عشان اشوفه وهو داخل

ايه؟ كان لابس طاقيه الاخفا...

المهم أما اروح انكشه كده

واهو شويه الشغل اللي في ايدي ده حجه

اروح له بيها يمكن يتلحلح شويه

ويتكلم بقا جاته البلا قرفني ...

هو:صباح العسل يا مزة ايه يابت الحلاوة دي ع الصبح

ارحميني بقا الله يحرقك...

قال شغل جديد عليها قال ...

بيتهيألي كده انها حجه عشان

تقف تتكلم معاك ياد يا كريم

واقعه واقعه يعني...

هو:بس البلوزة دي أحلي م اللي كانت لابساها امبارح

التانيه كانت متخناها قوي انما دي مخلياها زي المانيكان...

هي:ايوه كده كويس انك حلقت دقنك

لما مبتكونش حالقها باحس اني باتكلم مع أبو جهل..

شكلك بيبقي وحش قوي...

لما بتحلقها بقا بيتبقي قمر شبه

الواد المضروب اللي اسمه أحمد عز

هي:ايه يا بني عينك هاتطلع عليا طب ايه واكل سد الحنك ليه

متتنيل تتكلم وعليا النعمه ماهطلب منك حاجه فوق طاقتك

هو:يا شيخه الواحد كل مايشوفك بيفتكر حاله المنيل

بقا انا لو معايافلوس دلوقتي مش كنت اتجوزتك

بدل الشحططه اللي انا فيها دي ...

منكوا لله ياللي في بالي ...يالي واكلينها والعه

وسايبينا احنا نغني ظلموة...

أفتكر كده الحوار اختلف تماما ...

**********************

وده حوار بين مذيع مشهور من مذيعي التوك شو ومسئول كبير في الحكومه ...

المذيع:ممكن حضرتك يا فندم تقولنا ايه هي أهم أولويات الحكومه في المرحله القادمه؟

المسئول: شوف أهم حاجه عند الحكومه واللي حطاها علي قمه أولوياتها

هي مراعاة محدودي الدخل ...وأظن ده واضح من تحسن أحوال محدودي الدخل

في السنوات اللي فاتت...واللي كنت باشرف فيها بتولي أعباء المسؤليه ...

المذيع:طب يا فندم تفتكر ليه محدودي الدخل مش حاسين بالتحسن اللي حضرتك بتقول عليه؟

المسؤل:التحسن تدريجي وهتظهر اثارة علي المدي البعيد ...

المشكله ان الناس دايما مستعجلين ومعندهاش بعد نظر...

المذيع: يا فندم في اشاعات بتتردد في الفترة الأخيرة ان حضرتك
بتخصص أراضي ملك الدوله لبعض أقاربك يا تري رد حضرتك ايه علي الشائعات دي؟

الوزير :لا طبعا دي اشاعات مغرضه وانا عمري في حياتي ماخالفت القانون ابدا

والشجرة المثمرة دايما هي اللي بتتحدف بالطوب

ودول ناس حاقدين عليا وعلي نجاحي...

وانا من خلال برنامجك الشهير

باهديلهم اغنيه فريد الأطرش...يا عوازل فلفلوا.....

ده طبعا كان الحوار المذاع علي الهوا....واللي اتقال علي اللسان

أمابقا لو شغلنا الجهاز العبقري بتاع قراءة الأفكار هيكون الحوار بالشكل ده:

المذيع: ارغي يا عم الأمور صدعنا بكلامك الفارغ اللي كلنا عارفين انه ضحك ع الدقون...

المسؤل:طب هاقوله ايه ده..

اذا كنت أنا نفسي من كتر ماكررت الكلام حفظته...

هواحنا خلفناهم ونسيناهم احنا فاضيين لهم

لما هنوزع فلوس البلد ع الفقرا والشحاتين احنا هيفضلنا ايه؟

جاتكوا القرف مليتوا البلد ....

المذيع: والنعمه عارف انك هتقول الاجابه دي مانا كل سنه

باعمل معاك نفس الحوار وبتقول نفس البقين دول

والحكايه بتطربق علي راس الشعب أكتر وأكتر....

المسؤل:طبعا مش حاسين بتحسن علشان مفيش أصلا تحسن...انت صدقت ولا ايه.....

المذيع: شوف بقا أنا صبرت عليك كتير وانت سايق فيها ومقضيها كدب من أول اللقاء

طب خد القاضيه بقا عشان تعرف اني كاشفك....

والنبي لافضحك وأجيب سيرة أرض الساحل اللي قاللي عليها
شبطه السكرتير بتاعك

بعد مالطش مني باكوين...
مش مهم كله عشان اجيب سبق وابقي مذيع متصيط...

الوزير : ايه ده طب وده عرف موضوع أرض الساحل ازاي دانا لسه مخصص الارض للواد ابني امبارح مافيش غير

الواد شبطه السكرتير الخصوصي بتاعي هو اللي اكيد سرب الخبر أما انك واد نتن صحيح كل ده عشان كنت واعده

ب25 باكو واديته 20 بس بتبعني عشان 5 بواكي يا معفن بس أقول ايه فيك يا شبطه يا بن بهانه هتعيش معفن

وتموت معفن عمرك ماهتبقي نصاب محترم ابدا ...

وبكده طبعا اختلف شكل الحوار تماما..

عرفتوا بقا ان عدم القدرة علي قراءة الأفكار رحمه.....

الثلاثاء، ٢٧ يوليو ٢٠١٠

النسر الدجاجه (اعادة نشر )

أعزائي زوار المدونه الكرام نظرا لاني أمر هذة الفترة بحاله مختلطه ما بين

نضوب الأفكار في رأسي ...بالاضافه الي الانشغال الدائم...

وجدت أنه ربما يكون الحل في اعادة نشر بعض البوستات القديمه التي سبق نشرها

والتي أعتز بها عملا بالمثل القائل

التاجر لما بيفلس بيدور في دفاترة القديمه...

وهذا البوست من تلك البوستات ...

كتكوت صغير اشتراني غشيم ...
وسط الفراخ رباني ....
وأكلني حب وشعير .....
ملقيتش غيرة قمت كلت ....
وغصب عني ويا الفراخ كبرت....

عيشت وياهم نفس عيشتهم.....
مع ان أصلي في الأصل غيرهم...

في العشه ياما كتيرصعبت عليا نفسي ...
وقولت امتي ؟؟ هالقي يا رب نفسي ...


وف يوم قامت حريقه في العشه...


وبص الغشيم ليهم وليا بحسرة....
بعد ما ربانا ...
هنضيع من ايديه ...في لحظه !!!
لكنه من العجب قام فط نط ....
قال ايه استغرب اني طرت وهربت ...
وسأل نفسه ازاي قدرت ؟؟؟
أطير في السما وعن الفراخ فرقت...

لأ ...
وأنقذتله من فراخه اللي عليه قدرت...
أصل الغشيم ...
نسي اني أصلا في الاصل نسر....