أن لا يكون لديك شيئا تخشي أن تخسرة....

أن لا يكون لديك شيئا تخشي أن تخسرة....
ذلك الاحساس الذي يجعلك تشعر بمرارة شديدة ....
وفي نفس الوقت
تشعر بحريه شديدة ......
فأنت الأن تستطيع أن تطلق لتفكيرك العنان ....
وتسمح لخيالك بالاتساع كما شاء ...
ولا تتردد في فعل أي شئ...
أي شئ .....مهما كان خطراً أو ربما مستحيلاً....
ربما هداك تفكيرك... الي أن .......
تناطح السحاب...
تسابق الرياح ...
تطير في السماء ...
وربما تراودك أفكاراًعدوانيه كالرغبه في أن ....
تقتل من قتل حلمك....
تظلم من ظلمك...
تهد المعبد عليك وعلي أعداءك ....
ولكن وبعد فترة من التفكير ...واعادة التفكير ...

والتخيل ...والامعان في التخيل ...

تقف للحظه لتتأمل ....
هل أنت بذلك تعاقب الظروف التي جعلتك شخصا

لا يملك في حياته شيئا ذا قيمه يخشي خسارته ؟؟؟

أم تعاقب نفسك لأنك لم تستطع تطويع ولا حتي مجاراة تلك الظروف ؟؟؟
فتكون النتيجه أن تكتشف انك خسرت من ضمن ما خسرت

حتي مجرد الشجاعه والاقدام علي محاوله فعل أي شئ ......

عزيزي شهر رمضان

عزيزي شهر رمضان ...
منذ أن كنت طفله وانا أكن لك مشاعر جميله....
كان مجرد ذكر اسمك أمامي في أي وقت من السنه يجعلني أشعر بحنين وشوق جارف اليك

كانت أسبابي وقتها مصبوغه بملامح الطفوله ....

مرتبطه بمشاعر الفرحه بالفوانيس والكنافه والقطايف والزينه التي نزين بها المنزل

وبرامج التلفزيون (وخصوصا الفوازير التي كنت أعشقها وأنا طفله طبعا أيام نيللي)

وغيرها من ملامح رمضان الشكليه والمظهريه....

(والتي علمت فيما بعد أن ليس لها في الحقيقه علاقه اطلاقا بشهر رمضان)
وعندما مرت بي السنوات وكبرت أحببتك أكثر وأكثر ....
وأصبحت أشتاق اليك أكثر وأكثر

ولكن طريقه حبي لك اختلفت بالطبع فهو هذة المرة مصبوغ بالعقلانيه والفهم...
كيف لا؟ وانا الان فهمت المغزي الحقيقي من وراءك....
فهمت معني أن يكون الانسان مُحَمل طوال العام بالذنوب والآثام والخطايا

ويرسل له الله الذي يحبه ويريد أن يعفو عنه شهرا كاملا كل عام

فرصه ذهبيه وموسم لغفران الذنوب ...

يأتي رمضان كل عام ولسان حاله يقول لنا هلم الي ربك أيها الانسان

فلقد حان وقت غسيل النفوس من الهموم وغسيل القلوب من الاثام
فلقد أرسلني الله اليكم فرصه ذهبيه لتتضاعف فيه حسناتكم

وتسلسل فيه الشياطين

ليهيؤ لكم كل الفرص للطاعه والغفران واكتساب الحسنات ...
فهمت معني حلاوة أن تناجي الله في جوف الليل كل ليله من ليالي رمضان

ليالي العفو... والمغفرة ...والعتق من النار...
وتدعوةوتطلب منه كل ما تطمع أن يرزقك الله به

وتشكو اليه كل ما يضيق به صدرك...

كل ذلك وانت موقن بالاجابه لأنك تدعو علام الغيوب مالك الملك ...

ولأن الأيام الجميله دائما قصيرة ولأننا اعتدنا عليك ضيفا خفيفاً
تنقضي أيامك بسرعه البرق وتنطوي....

ويأتي هذا الميعاد المحتوم ميعاد الرحيل ...رحيلك أيها الضيف الكريم

ولأن الله الذي أرسلك لنا يعلم مدي حبنا لك ...وحزننا علي فراقك بعد أن اعتدنا عليك...

جعل لنا برحيلك عيداً سعيدا يملأ الأرض حتي ينسينا لوعه فراقك...
فوداعا رمضان...
ولا يسعني الا ان أبدا من الان في الدعاء اللهم بلغنا رمضان القادم ...

أخواني وأحبائي المدونين الأعزاء ....

رمضان كريم ....

كل سنه وأنتم بخير وصحه وعافيه ...

وكل عام وأنتم الي الله أقرب والي طاعته أدوم ...

موسم جني واكتساب الحسنات ابتدي يلا بينا نتسابق للحصول عليها ...

وعايزة أقولكم حاجه بجد خارجه من قلبي ...

أحبكم في الله ...

قارئ الأفكار

أوقات كتير باتمني تبقي عندي القدرة علي قراءة أفكار الناس

اللي بتعامل معاهم في حياتي

معرفش ليه؟ يمكن علشان أنا عموما باحب اعرف الناس شايفاني ازاي...

أو أنا في عيون الأخرين...

يمكن برضه عايزة أعرفمين صادق معايا

ومين بيخدعني ...ما علينا......

طب لو تخيلنا ان أصبح عندنا الملكه دي يعني انت تقدر

تعرف اللي قدامك بيفكر في ايه ..

فهمت حاجه ...أبسطهالك

يعني هنفترض ان العلماء اخترعوا جهاز يمكنك لما تستخدمه

انك تقرا أفكار الشخص اللي قدامك وانت بتكلمه ...

تفتكروا ياتري ده هيكون تأثيرة ايه علي علاقاتك باللي حواليك؟؟؟

ياتري اللي هتكتشفه هيوطد العلاقات دي

ولا هتكتشف حاجات تخليك تنسف العلاقات دي من أساسه؟؟

دي حوارات اتخيلتها بين أشخاص هنشوفها ...

قبل وبعد استخدام الجهاز السحري بتاع قراءة الأفكار..

ده حوار بين شاب وشابه زملاء في نفس مكان العمل:

هي شابه جميله وهو شاب وقور و أمور

لكن في بدايه حياته يعني لسه مكونش نفسه....
تعالوا نشوف الحوار :

هي:صباح الخير يا أستاذ كريم..

هو :صباح النور يا انسه نيفين...

هي:ممكن لو سمحت تفهمني الشغل ده يخلص ازاي

علشان الشغل ده جديد عليا والمدير كلفني بيه...

هو :أه ممكن طبعا مفيش مشكله...

اللي هيسمع الحوار هيقول انه حوار عادي جدا

بين أي اتنين زملاء في العمل

وده الكلام اللي اتقال علي اللسان....

أما بقا لو شغلنا جهاز قارئ الأفكارهيبقا الحوار بالشكل ده:

هي:ايه ده وده جه امته المنيل علي عينه

دانا عيني اتلوحت وانا عماله

ابص علي باب الشركه عشان اشوفه وهو داخل

ايه؟ كان لابس طاقيه الاخفا...

المهم أما اروح انكشه كده

واهو شويه الشغل اللي في ايدي ده حجه

اروح له بيها يمكن يتلحلح شويه

ويتكلم بقا جاته البلا قرفني ...

هو:صباح العسل يا مزة ايه يابت الحلاوة دي ع الصبح

ارحميني بقا الله يحرقك...

قال شغل جديد عليها قال ...

بيتهيألي كده انها حجه عشان

تقف تتكلم معاك ياد يا كريم

واقعه واقعه يعني...

هو:بس البلوزة دي أحلي م اللي كانت لابساها امبارح

التانيه كانت متخناها قوي انما دي مخلياها زي المانيكان...

هي:ايوه كده كويس انك حلقت دقنك

لما مبتكونش حالقها باحس اني باتكلم مع أبو جهل..

شكلك بيبقي وحش قوي...

لما بتحلقها بقا بيتبقي قمر شبه

الواد المضروب اللي اسمه أحمد عز

هي:ايه يا بني عينك هاتطلع عليا طب ايه واكل سد الحنك ليه

متتنيل تتكلم وعليا النعمه ماهطلب منك حاجه فوق طاقتك

هو:يا شيخه الواحد كل مايشوفك بيفتكر حاله المنيل

بقا انا لو معايافلوس دلوقتي مش كنت اتجوزتك

بدل الشحططه اللي انا فيها دي ...

منكوا لله ياللي في بالي ...يالي واكلينها والعه

وسايبينا احنا نغني ظلموة...

أفتكر كده الحوار اختلف تماما ...

**********************

وده حوار بين مذيع مشهور من مذيعي التوك شو ومسئول كبير في الحكومه ...

المذيع:ممكن حضرتك يا فندم تقولنا ايه هي أهم أولويات الحكومه في المرحله القادمه؟

المسئول: شوف أهم حاجه عند الحكومه واللي حطاها علي قمه أولوياتها

هي مراعاة محدودي الدخل ...وأظن ده واضح من تحسن أحوال محدودي الدخل

في السنوات اللي فاتت...واللي كنت باشرف فيها بتولي أعباء المسؤليه ...

المذيع:طب يا فندم تفتكر ليه محدودي الدخل مش حاسين بالتحسن اللي حضرتك بتقول عليه؟

المسؤل:التحسن تدريجي وهتظهر اثارة علي المدي البعيد ...

المشكله ان الناس دايما مستعجلين ومعندهاش بعد نظر...

المذيع: يا فندم في اشاعات بتتردد في الفترة الأخيرة ان حضرتك
بتخصص أراضي ملك الدوله لبعض أقاربك يا تري رد حضرتك ايه علي الشائعات دي؟

الوزير :لا طبعا دي اشاعات مغرضه وانا عمري في حياتي ماخالفت القانون ابدا

والشجرة المثمرة دايما هي اللي بتتحدف بالطوب

ودول ناس حاقدين عليا وعلي نجاحي...

وانا من خلال برنامجك الشهير

باهديلهم اغنيه فريد الأطرش...يا عوازل فلفلوا.....

ده طبعا كان الحوار المذاع علي الهوا....واللي اتقال علي اللسان

أمابقا لو شغلنا الجهاز العبقري بتاع قراءة الأفكار هيكون الحوار بالشكل ده:

المذيع: ارغي يا عم الأمور صدعنا بكلامك الفارغ اللي كلنا عارفين انه ضحك ع الدقون...

المسؤل:طب هاقوله ايه ده..

اذا كنت أنا نفسي من كتر ماكررت الكلام حفظته...

هواحنا خلفناهم ونسيناهم احنا فاضيين لهم

لما هنوزع فلوس البلد ع الفقرا والشحاتين احنا هيفضلنا ايه؟

جاتكوا القرف مليتوا البلد ....

المذيع: والنعمه عارف انك هتقول الاجابه دي مانا كل سنه

باعمل معاك نفس الحوار وبتقول نفس البقين دول

والحكايه بتطربق علي راس الشعب أكتر وأكتر....

المسؤل:طبعا مش حاسين بتحسن علشان مفيش أصلا تحسن...انت صدقت ولا ايه.....

المذيع: شوف بقا أنا صبرت عليك كتير وانت سايق فيها ومقضيها كدب من أول اللقاء

طب خد القاضيه بقا عشان تعرف اني كاشفك....

والنبي لافضحك وأجيب سيرة أرض الساحل اللي قاللي عليهاشبطه السكرتير بتاعك

بعد مالطش مني باكوين...مش مهم كله عشان اجيب سبق وابقي مذيع متصيط...

الوزير : ايه ده طب وده عرف موضوع أرض الساحل ازاي دانا لسه مخصص الارض للواد ابني امبارح مافيش غير

الواد شبطه السكرتير الخصوصي بتاعي هو اللي اكيد سرب الخبر أما انك واد نتن صحيح كل ده عشان كنت واعده

ب25 باكو واديته 20 بس بتبعني عشان 5 بواكي يا معفن بس أقول ايه فيك يا شبطه يا بن بهانه هتعيش معفن

وتموت معفن عمرك ماهتبقي نصاب محترم ابدا ...

وبكده طبعا اختلف شكل الحوار تماما..

عرفتوا بقا ان عدم القدرة علي قراءة الأفكار رحمه.....

النسر الدجاجه (اعادة نشر )

أعزائي زوار المدونه الكرام نظرا لاني أمر هذة الفترة بحاله مختلطه ما بين

نضوب الأفكار في رأسي ...بالاضافه الي الانشغال الدائم...

وجدت أنه ربما يكون الحل في اعادة نشر بعض البوستات القديمه التي سبق نشرها

والتي أعتز بها عملا بالمثل القائل

التاجر لما بيفلس بيدور في دفاترة القديمه...

وهذا البوست من تلك البوستات ...

كتكوت صغير اشتراني غشيم ...
وسط الفراخ رباني ....
وأكلني حب وشعير .....
ملقيتش غيرة قمت كلت ....
وغصب عني ويا الفراخ كبرت....

عيشت وياهم نفس عيشتهم.....
مع ان أصلي في الأصل غيرهم...

في العشه ياما كتيرصعبت عليا نفسي ...
وقولت امتي ؟؟ هالقي يا رب نفسي ...

وف يوم قامت حريقه في العشه...


وبص الغشيم ليهم وليا بحسرة....
بعد ما ربانا ...
هنضيع من ايديه ...في لحظه !!!
لكنه من العجب قام فط نط ....
قال ايه استغرب اني طرت وهربت ...
وسأل نفسه ازاي قدرت ؟؟؟
أطير في السما وعن الفراخ فرقت...

لأ ...

وأنقذتله من فراخه اللي عليه قدرت...
أصل الغشيم ...
نسي اني أصلا في الاصل نسر....

مطعم أكل وبهججه (اعادة نشر)

في شخصيات مميزةومتفرده ممكن تقابلها في حياتك مفيش منها اتنين ....

الشخصيه دي بتكون عندها صفه محوريه مسيطرة عليها بتتبني عليها كل حواراتها وتصرفاتها ......

يعني لما يذكر اسم الشخصيه دي تتبادر الي الذهن علي طول الصفه الملازمه ليها...

اتعاملت في حياتك مع شخصيات زي دي ؟؟

التلفزيون والسينما قدموا لنا كتير من الشخصيات دي زي مثلا :

مستر اكس النصاب العالمي اللي مدوخ الانتربول (فؤاد المهندس)

اللمبي (الشاب المصري ابن الحارة المصريه الصايع أبو دم خفيف)

القرموطي (الفلاحالفشار قوي مدعي العلاقات مع السياسيين والناس المهمه )

أبو حفيظه (الاعلامي المغرور اللي مش فاهم حاجه )

وتهامي باشا(منتج أفلام عصر الانفتاح ) ووديع( المساعد بتاعه)

كرومبو(المحقق والمكتشف) وطبعا ده التقليد العبيط لشخصيه المحقق جيمس بوند...

طب لو اتخيلنا حوار بين كل الشخصيات دي يا تري هيبقي ازاي..

المكان:مطعم (أكل وبهججه)

الذي يملكه تهامي باشا ...ووديع بقا هو الجرسون اللي بيقدم الطلبات للزباين ...

زباين المطعم حسب ترتيب الظهور هم اللمبي وامه فرنسا– القرموطي-المفتش كورومبو...

اللمبي: اول ما دخل المطعم :مع السلام عليكوا

فرنسا:ايه يا واد المطعم النص كم ده اللي انت جايبنا فيه ماهو انت لوكنت سمعت كلامي في حدوته شرم الشيخ

كان زمانا بناكل في الهتلون دلوقتي بس اعمل فيك ايه طالع فقري زي المرحوم أبوك...

اللمبي: ليه ياما بس كده دانا بحبك ياما...

اللمبي: مش كفايه انك لسه لابسه البطلون بتاعي ياما

وانا مرضيشت اخليكي تقلعيه وبقالي اسبوع بنام بالجاكيته بس....

فرنسا:لأ قلعهوني يا واد خليني استهوي....

راحوا علي اول طرابيزة وزاحوا الكراسي وطلعوا ملايه وفرشوها وقعدوا علي الارض

وفضل اللمبي يصقف للجرسون 3 دقايق متواصله حتي بعد ماالجرسون جه استمربرضه في التصقيف...

وديع :خلاص خلاص يا باشا انا جيت...

اللمبي:أصلك جاي مبسوط افتكرتك هتتشقلبنمرة يعني افتكرتها نمرة عاملينها في قلب المحل ...

وديع:مبتسما كالعادة...أأمرني يا باشا ...

اللمبي:انا عاوز شندوشت كبده بس تكون طازة يعني لسه البقرة

مقتوله وخارجه الكبده من بطنها ع النار علي طول

وديع:حاضر يا باشا

اللمبي: أقولك انت دخل البقرة نفسها الفرن علشان نضمن ان الكبده تستوي كويس

وديع: حاضر يا باشا

اللمبي:بس وحياةوالدك اتوصي

وديع :حاضر يا باشا

حط بصل كتير ...وفلفل كتير

وديع :حاضر يا باشا

ولا تيجي تقتل البقرة انت ...

وديع دخل يجهز الطلب للمبي...

فجأة ظهر واحد دخل رجل واحده للمحل وخرجها تاني...

وبعدين دخل راسه بس من الباب والقي نظرة ع المكان وبعدين خرجها تاني...

تالت مرة وبعد ما اطمن ان المكان متأمن ... دخل المطعم ...

اتجه ناحيه الطرابيزة اللي مديه وشها للحيطه وجر الكرسي بسرعه وقعد...

كان لابس نضارة تغطي تلات اربع وشه مش باين من وشه غير الشنبات...

وصقف 3صقفات بالعدد عشان ينده ع الجرسون :

وديع:أأمرني يا باشا

القرموطي:والنبي وحياة والدك كنت بس متأخذنيش في الكلام يعني ولو مفيهاش اساءة أدب

ولا رزاله يعني كده ولا يعني ...

وديعشاخطا: لا يا باشا مفيهاش اي حاجه م اللي بتقول عليها قول وخلصني...

هي الCIA مراقبه المكان...

وديع :ايييييييييييييييه

القرموطي:طب البرادعي مجاش امبارح سأل عليا ...

وديع :مييييييييييييين

القرموطي:والله انت شكلك كده مش عارف انت بتتكلم مع مين...

لأ مبدهاش لازم أعرفك بنفسي ...

فاكر لما أوباما جه مصر الصيفيه اللي فاتت دي واخدلي بالك انت لما خطب في الجامعه تحت القبه....

اتصل استأذني وقالي بعد اذنك يابا الحاج قرموطي محتاجين المطرح اللي تحت القبه

قد ساعتين زمن كدة...لو مفيهاش رزاله يعني ....معلش احنا بنتكلم ....

قلتله عيب تقول كده يابوالأوابيم قبه ايه اللي بتتكلم فيها ....احنا بينا كده برضوا ...

دانت لو عايز افضيلك الوطن العربي كله تقيلك فيه قد ساعتين زمن وقت العصاري ميغلاش عليك ...

بعتله رجالتي زوقوله القبه ولمعوها وخلوها تبرق أة ده كله الا أوباما ده حبيبي...

ده ميعملش حاجه ف أمريكا الا لما يشورني يا راجل داأنا اخر مرة روحت أمريكا

شالي رجل من رجول تمثال الحريه عشان الواد ابني الصغير لا مؤاخذة

كان عايز يهرش بيها معلش احنا بنتكلم يعني...

وديع:اييييييييييييييييه

طب قولي تطلب ايه عشان عندي زباين كتير في المحل...

القرموطي: والله انت شكلك مش مريحني وانا حاسس كده

انك قريب مرعي بتاع الكيليمه...

يللا ما علينا هاتلنا شويه شوربه ضفادع وكبد سحالي علي ذوقك كده

حكم أنا اصلي احب اكلي يبقي خفيف خفيف كده عشان عامل دايت ...

وذهب وديع لاحضارالطلب...

في اللحظه دي خرج تهامي باشا من مكتبه وعلي يمينه مزة بيضاء وعلي شماله مزة سمرا وألقي نظرة

سريعه ع الزباين ووجد زبون قاعد فاضي فنده علي وديع...

وديع ...يا وديع...

وجه وديع جري...

تهامي باشا:الزبون دة ايديه مش في محفظته ليه يا وديع ...

وديع:أصله يا باشا لسه داخل يا باشا وملحقتش يا باشا يعني يا باشا...

تهامي باشا :ملحقتش ؟؟؟ملحقتش ايه يا وديع...

خد ....قعد جنبه المزة دي تسليه علي ما الاكل يخلص

وديع :أستااااااااااااااااااذ

وفجأة صرخ القرموطي الحقوني ....

اه ياما اه يابا أنا كنت عارف ان الليله دي مش هتعدي علي خير....

فجري عليه تهامي باشا ووديع ....خير خير في ايه... ايه اللي حصل ...

القرموطي :أنا اتسرقت الكوفيه الصوف بتاعتي اتسرقت

دي كانت هديه من واحد صاحبي عزيز عليه قوي دي مفيش أختها في الشرق الاوسط كله ...

تهامي باشا: ليه يعني كانت هديه من مين ...

القرموطي : كانت هديه من كوفي عنان ...(مش بقولك كوفيه)

وحصلت هرجله وهيصه كبيرة قوي في المطعم ...

وعلي الفور استدعي تهامي باشا المفتش كورمبو علشان يحقق و يعرف مين اللي سرق الكوفيه ...

وانحصر الشك في ال 3أشخاص اللي كانوا موجودين في المطعم وقت السرقه

فرنسا واللمبي ووديع...

ولما سألنا الست فرنسا قالت:

كوفيه ايه دي اللي هاسرقها يا راجل يا موكوس ...

اللمبي :ياما ماتوديناش في داهيه ياما ده المفتش كورومبو لاحسن يحبسنا ...

فرنسا :اسكت يا واد بلا كورمبو بلا ابو جلمبو ...

دا انا فرنسا يعني لا أهل تلم ولا حكومه تهم ...

كورمبو : بعد ما فرنسا بعزقت كرامته ... وبعترت مواهبه الكشفيه ...

لم نفسه من سكات واستبعد فرنسا خالص وخرجها من دايرة الاشتباة ...

ولما سألنا اللمبي قال:

يا سعادة حضرت المفتش زورومبو ...

أنا اشاسا مكنتش قاعد في المطعم وقت السرقه عشان وانا قاعد لمحت واد صاحبي معدي برا المطعم

بالصتفه كان ليه عنده مبلغ كبير ...

خرجت جري من المطعم وقالتله فين ياد الخمشتاشر جنيه اللي عليك ...مبلغ كبيركبير يعني ...

وانت عارف دلوقتي الجنيه غلب الكارنيه والدنيا ضيقه ساعتك ....

يعني سياتك لو حققت حتلاقيني والله العظيم بيريئ ....

بيريئ بيريئ يعني ...

ولما جه وديع علشان كورومبو يسأله :

لاحظ كورمبو انه مخبي حاجه تحت يونيفورم المطعم اللي هو لابسه

وباين طرفها وهو مكلكع من تحت ياقه القميص ...

وهنا صرخ كورومبو وقال انا عرفت مين اللي سرق الكوفيه...

لو انتوا كمان عرفتوا محدش يتصل عشان مش هاتقابلوني قريب في اي حلقه جايه

لاني هاخد أجازة من الشغل وهاتجوز الست فرنسا اللي سحرتني وهي بتهزأني...

هي دي الست اللي كنت مستنيها من زمان ....

وهنا دخلت فرنسا مطبخ المطعم اللي اصبح بلا جرسون بعد القبض علي وديع

وخرجت بصينيه عليها كوبيات شربات ولما لقيت الكل في المطعم بيبصلها قالت في خجل :

كنت داخله أعمل كوبايتين شاي عشان نحبس بعد الاكل بس ملقيتش شاي جيبتلكوا شربات...

ولما اتكشف وديع واتعرف ان هو اللي سرق الكوفيه بتاعه القرموطي ...

حاول ينكر ورد علي المفتش كورومبو وراوغ وقال له اشمعنا...

ليه ماتهمتش تهامي باشا مهو كان معانا في المطعم وقت السرقه؟؟؟...

رد كورومبو وهوبيبص لوديع نظرة استهزاء وقال له طبعا مشكتش في تهامي لأنه صاحب المطعم وأكيد سمعته تهمه ...

وحادثه سرقه زي دي أكيد هتأثر علي سمعه المطعم وبعدين حرام منظلموش.....

( الراجل كان مشغول في مكتبه مع المزز طول الوقت يبقي هيسرق امتي )

اللمبي :انا دلوقتي عندي سؤال بعد اذنك :

كورومبو :اتفضل

اللمبي: يعني انت دلوقتي بتعاقبه عشان سرق ولا عشان معرفش يخبي اللي سرقه ...

كورومبو : شيلوا الواد ده من قدامي...