topbella

الأحد، ١١ يوليو ٢٠١٠

مطعم أكل وبهججه (اعادة نشر)


في شخصيات مميزةومتفرده ممكن تقابلها في حياتك مفيش منها اتنين ....

الشخصيه دي بتكون عندها صفه محوريه مسيطرة عليها بتتبني عليها كل حواراتها وتصرفاتها ......

يعني لما يذكر اسم الشخصيه دي تتبادر الي الذهن علي طول الصفه الملازمه ليها...

اتعاملت في حياتك مع شخصيات زي دي ؟؟

التلفزيون والسينما قدموا لنا كتير من الشخصيات دي زي مثلا :

مستر اكس النصاب العالمي اللي مدوخ الانتربول (فؤاد المهندس)

اللمبي (الشاب المصري ابن الحارة المصريه الصايع أبو دم خفيف)

القرموطي (الفلاحالفشار قوي مدعي العلاقات مع السياسيين والناس المهمه )

أبو حفيظه (الاعلامي المغرور اللي مش فاهم حاجه )

وتهامي باشا(منتج أفلام عصر الانفتاح ) ووديع( المساعد بتاعه)

كرومبو(المحقق والمكتشف) وطبعا ده التقليد العبيط لشخصيه المحقق جيمس بوند...

طب لو اتخيلنا حوار بين كل الشخصيات دي يا تري هيبقي ازاي..


المكان:مطعم (أكل وبهججه)

الذي يملكه تهامي باشا ...ووديع بقا هو الجرسون اللي بيقدم الطلبات للزباين ...

زباين المطعم حسب ترتيب الظهور هم اللمبي وامه فرنسا– القرموطي-المفتش كورومبو...



اللمبي: اول ما دخل المطعم :مع السلام عليكوا

فرنسا:ايه يا واد المطعم النص كم ده اللي انت جايبنا فيه ماهو انت لوكنت سمعت كلامي في حدوته شرم الشيخ

كان زمانا بناكل في الهتلون دلوقتي بس اعمل فيك ايه طالع فقري زي المرحوم أبوك...

اللمبي: ليه ياما بس كده دانا بحبك ياما...

اللمبي: مش كفايه انك لسه لابسه البطلون بتاعي ياما

وانا مرضيشت اخليكي تقلعيه وبقالي اسبوع بنام بالجاكيته بس....

فرنسا:لأ قلعهوني يا واد خليني استهوي....

راحوا علي اول طرابيزة وزاحوا الكراسي وطلعوا ملايه وفرشوها وقعدوا علي الارض

وفضل اللمبي يصقف للجرسون 3 دقايق متواصله حتي بعد ماالجرسون جه استمربرضه في التصقيف...

وديع :خلاص خلاص يا باشا انا جيت...

اللمبي:أصلك جاي مبسوط افتكرتك هتتشقلبنمرة يعني افتكرتها نمرة عاملينها في قلب المحل ...

وديع:مبتسما كالعادة...أأمرني يا باشا ...

اللمبي:انا عاوز شندوشت كبده بس تكون طازة يعني لسه البقرة

مقتوله وخارجه الكبده من بطنها ع النار علي طول

وديع:حاضر يا باشا

اللمبي: أقولك انت دخل البقرة نفسها الفرن علشان نضمن ان الكبده تستوي كويس

وديع: حاضر يا باشا

اللمبي:بس وحياةوالدك اتوصي

وديع :حاضر يا باشا

حط بصل كتير ...وفلفل كتير

وديع :حاضر يا باشا

ولا تيجي تقتل البقرة انت ...

وديع دخل يجهز الطلب للمبي...


فجأة ظهر واحد دخل رجل واحده للمحل وخرجها تاني...

وبعدين دخل راسه بس من الباب والقي نظرة ع المكان وبعدين خرجها تاني...

تالت مرة وبعد ما اطمن ان المكان متأمن ... دخل المطعم ...

اتجه ناحيه الطرابيزة اللي مديه وشها للحيطه وجر الكرسي بسرعه وقعد...

كان لابس نضارة تغطي تلات اربع وشه مش باين من وشه غير الشنبات...

وصقف 3صقفات بالعدد عشان ينده ع الجرسون :

وديع:أأمرني يا باشا


القرموطي:والنبي وحياة والدك كنت بس متأخذنيش في الكلام يعني ولو مفيهاش اساءة أدب

ولا رزاله يعني كده ولا يعني ...

وديعشاخطا: لا يا باشا مفيهاش اي حاجه م اللي بتقول عليها قول وخلصني...

هي الCIA مراقبه المكان...

وديع :ايييييييييييييييه

القرموطي:طب البرادعي مجاش امبارح سأل عليا ...

وديع :مييييييييييييين

القرموطي:والله انت شكلك كده مش عارف انت بتتكلم مع مين...

لأ مبدهاش لازم أعرفك بنفسي ...

فاكر لما أوباما جه مصر الصيفيه اللي فاتت دي واخدلي بالك انت لما خطب في الجامعه تحت القبه....

اتصل استأذني وقالي بعد اذنك يابا الحاج قرموطي محتاجين المطرح اللي تحت القبه

قد ساعتين زمن كدة...لو مفيهاش رزاله يعني ....معلش احنا بنتكلم ....

قلتله عيب تقول كده يابوالأوابيم قبه ايه اللي بتتكلم فيها ....احنا بينا كده برضوا ...

دانت لو عايز افضيلك الوطن العربي كله تقيلك فيه قد ساعتين زمن وقت العصاري ميغلاش عليك ...

بعتله رجالتي زوقوله القبه ولمعوها وخلوها تبرق أة ده كله الا أوباما ده حبيبي...

ده ميعملش حاجه ف أمريكا الا لما يشورني يا راجل داأنا اخر مرة روحت أمريكا

شالي رجل من رجول تمثال الحريه عشان الواد ابني الصغير لا مؤاخذة

كان عايز يهرش بيها معلش احنا بنتكلم يعني...

وديع:اييييييييييييييييه

طب قولي تطلب ايه عشان عندي زباين كتير في المحل...

القرموطي: والله انت شكلك مش مريحني وانا حاسس كده

انك قريب مرعي بتاع الكيليمه...

يللا ما علينا هاتلنا شويه شوربه ضفادع وكبد سحالي علي ذوقك كده

حكم أنا اصلي احب اكلي يبقي خفيف خفيف كده عشان عامل دايت ...

وذهب وديع لاحضارالطلب...

في اللحظه دي خرج تهامي باشا من مكتبه وعلي يمينه مزة بيضاء وعلي شماله مزة سمرا وألقي نظرة

سريعه ع الزباين ووجد زبون قاعد فاضي فنده علي وديع...

وديع ...يا وديع...

وجه وديع جري...

تهامي باشا:الزبون دة ايديه مش في محفظته ليه يا وديع ...

وديع:أصله يا باشا لسه داخل يا باشا وملحقتش يا باشا يعني يا باشا...

تهامي باشا :ملحقتش ؟؟؟ملحقتش ايه يا وديع...

خد ....قعد جنبه المزة دي تسليه علي ما الاكل يخلص

وديع :أستااااااااااااااااااذ

وفجأة صرخ القرموطي الحقوني ....

اه ياما اه يابا أنا كنت عارف ان الليله دي مش هتعدي علي خير....

فجري عليه تهامي باشا ووديع ....خير خير في ايه... ايه اللي حصل ...

القرموطي :أنا اتسرقت الكوفيه الصوف بتاعتي اتسرقت

دي كانت هديه من واحد صاحبي عزيز عليه قوي دي مفيش أختها في الشرق الاوسط كله ...

تهامي باشا: ليه يعني كانت هديه من مين ...

القرموطي : كانت هديه من كوفي عنان ...(مش بقولك كوفيه)

وحصلت هرجله وهيصه كبيرة قوي في المطعم ...

وعلي الفور استدعي تهامي باشا المفتش كورمبو علشان يحقق و يعرف مين اللي سرق الكوفيه ...

وانحصر الشك في ال 3أشخاص اللي كانوا موجودين في المطعم وقت السرقه

فرنسا واللمبي ووديع...

ولما سألنا الست فرنسا قالت:

كوفيه ايه دي اللي هاسرقها يا راجل يا موكوس ...

اللمبي :ياما ماتوديناش في داهيه ياما ده المفتش كورومبو لاحسن يحبسنا ...

فرنسا :اسكت يا واد بلا كورمبو بلا ابو جلمبو ...

دا انا فرنسا يعني لا أهل تلم ولا حكومه تهم ...

كورمبو : بعد ما فرنسا بعزقت كرامته ... وبعترت مواهبه الكشفيه ...

لم نفسه من سكات واستبعد فرنسا خالص وخرجها من دايرة الاشتباة ...

ولما سألنا اللمبي قال:

يا سعادة حضرت المفتش زورومبو ...

أنا اشاسا مكنتش قاعد في المطعم وقت السرقه عشان وانا قاعد لمحت واد صاحبي معدي برا المطعم

بالصتفه كان ليه عنده مبلغ كبير ...

خرجت جري من المطعم وقالتله فين ياد الخمشتاشر جنيه اللي عليك ...مبلغ كبيركبير يعني ...

وانت عارف دلوقتي الجنيه غلب الكارنيه والدنيا ضيقه ساعتك ....

يعني سياتك لو حققت حتلاقيني والله العظيم بيريئ ....

بيريئ بيريئ يعني ...

ولما جه وديع علشان كورومبو يسأله :

لاحظ كورمبو انه مخبي حاجه تحت يونيفورم المطعم اللي هو لابسه

وباين طرفها وهو مكلكع من تحت ياقه القميص ...

وهنا صرخ كورومبو وقال انا عرفت مين اللي سرق الكوفيه...

لو انتوا كمان عرفتوا محدش يتصل عشان مش هاتقابلوني قريب في اي حلقه جايه

لاني هاخد أجازة من الشغل وهاتجوز الست فرنسا اللي سحرتني وهي بتهزأني...

هي دي الست اللي كنت مستنيها من زمان ....

وهنا دخلت فرنسا مطبخ المطعم اللي اصبح بلا جرسون بعد القبض علي وديع

وخرجت بصينيه عليها كوبيات شربات ولما لقيت الكل في المطعم بيبصلها قالت في خجل :

كنت داخله أعمل كوبايتين شاي عشان نحبس بعد الاكل بس ملقيتش شاي جيبتلكوا شربات...

ولما اتكشف وديع واتعرف ان هو اللي سرق الكوفيه بتاعه القرموطي ...

حاول ينكر ورد علي المفتش كورومبو وراوغ وقال له اشمعنا...

ليه ماتهمتش تهامي باشا مهو كان معانا في المطعم وقت السرقه؟؟؟...

رد كورومبو وهوبيبص لوديع نظرة استهزاء وقال له طبعا مشكتش في تهامي لأنه صاحب المطعم وأكيد سمعته تهمه ...

وحادثه سرقه زي دي أكيد هتأثر علي سمعه المطعم وبعدين حرام منظلموش.....

( الراجل كان مشغول في مكتبه مع المزز طول الوقت يبقي هيسرق امتي )

اللمبي :انا دلوقتي عندي سؤال بعد اذنك :

كورومبو :اتفضل

اللمبي: يعني انت دلوقتي بتعاقبه عشان سرق ولا عشان معرفش يخبي اللي سرقه ...

كورومبو : شيلوا الواد ده من قدامي...

هناك ١٧ تعليقًا:

Haytham Alsayes يقول...

هههههههههههههههههههههه

لابجد جميلة
وكاتبة كل شخصية بنفس الحوار بتاعها
بس اللي عجبني جامد القرموطي
هي شخصية اساسا ملهاش حل


تحياتي علي الموضوع المبهجج

خواطر شابة يقول...

صح وحتى في حياتنا العادية هناك شخصيات مميزة ومتميزة حلوة المعشر وللتعامل معها نكهة خاصة بحيث تعطي للحياة وللتعامل مذاق خاص
دمت بود

sony2000 يقول...

هههههههههههههههههههههههههه
بجد افتكرتها
وفالاعاده افاااااده:)

أنا - الريس يقول...

دا انتي حافظة الشخصيات كلها شخصية شخصية وحتي حفظا الحتت المميزة بتاعت كل شخصية .
خخخخخخخخخخخخخخخهههههههههههههههههههه
لا بس بجد الحوار جامد جداً .
لأنك عرفتي تركبي الشخصيات مع بعض
وعلي فكرة مش ينفع حد يتكلم علي فرنسا
عشان عمي بخ متكلم مع اللمبي عليها .. ولا هو فرده وكتك كتاك

فاروق سحير ( فاروق بن النيل ) يقول...

البنفسج الحزين .....
والله تنفعى تكتبى حوار جيد لفيلم كلامك ضحكنى أوى وشكرا لك وحشتنا تعليقاتك

(ست* جنى* الحسن) يقول...

سلامو عليكو..
بجد حلو اوى
زكلامك بيرسم صورة لكل شخصية زى ما هية بالظبط
وتحياتى للاسلوب المعبر

لك تحياتى

sal يقول...

ايه يا وديييييييع
دا احنا اكتشفنا سيناريست
هايله ....
خلاص الفيلم اللى جاى
حيكسر الدنيا

*******
بوست جمييييل
تحياتى وتقديرى

Unknown يقول...

الاخت البنفسج
جميلة جميلة
بس نفسي اسئل هل فعلا انت كتبتيها وانت نفسيتك جميلة وفرحانة ولا دة من الهموم اليومية ؟؟
تحياتي لك وياريت تكرريها الاسلوب جميل
م / علي يونس

البنفسج الحزين يقول...

هيثم السايس
متشكرة قوي لذوقك
وانا كمان بحب شخصيه القرموطي
قوي من وانا طفله من ايام ما كان بييجي في مسلسل سر الأرض اللي كان بيتذاع بعد صلاة الجمعه زمااااان...
تحياتي

البنفسج الحزين يقول...

خواطر شابه...
أكيد كل مجتمع هتلاقي فيه شخصيات مميزة كده...بتدي لحياتنا بهجه
تحياتي

البنفسج الحزين يقول...

sony2000
أشكرك جدا

البنفسج الحزين يقول...

سياده الريس:
أصلي بعيد عنك عندي عاده مهببه
عاده حفظ حوارات الأفلام اللي بتعجبني ساعات بلاقيني حافظاها بالنص كمان....وساعات من كتر مانا حافظاها بالاقي نفسها باستخدم كلمات منها في حواري العادي مع الناس وساعات مش بيفهموا ان اللي بقوله ده كان موقف في فيلم واضطر عشان اوضح كلامي احكي له الفيلم كله ...
هههههههه
ادعيلي اعرف ابطل العادة المهببه دي

وبالنسبه لفرنسا ماهو بخ اللي مش راضي يكتك كتاكه عليها ويخلص عشان كلام الناس فخلي كويس كده أهو كورومبو طمع فيها ...هههه
تحياتي

البنفسج الحزين يقول...

أستاذ فاروق:
حمدلله ع السلامه فينك من فترة طويله ..
يا رب تكون بخير وحشتنا تعليقاتك...
متشكرة قوي لذوقك ...أهو حاجه كده علي قدنا
مبسوطه اني ضحكتك
حكم الضحك غالي قوي اليومين دول ...

البنفسج الحزين يقول...

ست الحسن حني:
وعليكم السلام يا قمر
ربنا يكرمك متشكرة قوي لذوقك
وتعليقك

البنفسج الحزين يقول...

sal
المفكر العبقري ...
سيناريست ايه ...الله يكرمك
ويسمع منك هههههههههه
بس الدنيا مش محتاجني انا عشان أكسرها
هي مكسورة جاهزة من غير ماجي جنبها...
أشكرك علس ذوقك
تحياتى وتقديرى

البنفسج الحزين يقول...

م / علي يونس
أشكرك علي ذوقك ربنا يكرمك يا رب
بالنسبه للاجابه علي سؤال حضرتك ...

نفسي اسئل هل فعلا انت كتبتيها وانت نفسيتك جميلة وفرحانة ولا دة من الهموم اليومية ؟؟

بسم الله الرحمن الرحيم
الأجابه تونس ...هههههههه

والله أنا كتبتها من فترة طويله ونشرتها قبل كده ومش فاكرة وقتها كنت فرحانه فعلا ولا ايه...
بس أنا ارجح الاجابه التانيه...لأني زي كل الشعب المصري اللي بيعالج مشاكله بالسخريه منها وكأنها ماتخصهوش هو ....

تحياتي لك

مصر اليوم يقول...

بوست جميل جدا