topbella

الجمعة، 6 أغسطس، 2010

قارئ الأفكار



أوقات كتير باتمني تبقي عندي القدرة علي قراءة أفكار الناس

اللي بتعامل معاهم في حياتي

معرفش ليه؟ يمكن علشان أنا عموما باحب اعرف الناس شايفاني ازاي...

أو أنا في عيون الأخرين...

يمكن برضه عايزة أعرفمين صادق معايا

ومين بيخدعني ...ما علينا......

طب لو تخيلنا ان أصبح عندنا الملكه دي يعني انت تقدر

تعرف اللي قدامك بيفكر في ايه ..

فهمت حاجه ...أبسطهالك

يعني هنفترض ان العلماء اخترعوا جهاز يمكنك لما تستخدمه

انك تقرا أفكار الشخص اللي قدامك وانت بتكلمه ...

تفتكروا ياتري ده هيكون تأثيرة ايه علي علاقاتك باللي حواليك؟؟؟

ياتري اللي هتكتشفه هيوطد العلاقات دي

ولا هتكتشف حاجات تخليك تنسف العلاقات دي من أساسه؟؟

دي حوارات اتخيلتها بين أشخاص هنشوفها ...

قبل وبعد استخدام الجهاز السحري بتاع قراءة الأفكار..

ده حوار بين شاب وشابه زملاء في نفس مكان العمل:


هي شابه جميله وهو شاب وقور و أمور

لكن في بدايه حياته يعني لسه مكونش نفسه....
تعالوا نشوف الحوار :

هي:صباح الخير يا أستاذ كريم..

هو :صباح النور يا انسه نيفين...

هي:ممكن لو سمحت تفهمني الشغل ده يخلص ازاي

علشان الشغل ده جديد عليا والمدير كلفني بيه...

هو :أه ممكن طبعا مفيش مشكله...

اللي هيسمع الحوار هيقول انه حوار عادي جدا

بين أي اتنين زملاء في العمل

وده الكلام اللي اتقال علي اللسان....

أما بقا لو شغلنا جهاز قارئ الأفكارهيبقا الحوار بالشكل ده:

هي:ايه ده وده جه امته المنيل علي عينه

دانا عيني اتلوحت وانا عماله

ابص علي باب الشركه عشان اشوفه وهو داخل

ايه؟ كان لابس طاقيه الاخفا...

المهم أما اروح انكشه كده

واهو شويه الشغل اللي في ايدي ده حجه

اروح له بيها يمكن يتلحلح شويه

ويتكلم بقا جاته البلا قرفني ...

هو:صباح العسل يا مزة ايه يابت الحلاوة دي ع الصبح

ارحميني بقا الله يحرقك...

قال شغل جديد عليها قال ...

بيتهيألي كده انها حجه عشان

تقف تتكلم معاك ياد يا كريم

واقعه واقعه يعني...

هو:بس البلوزة دي أحلي م اللي كانت لابساها امبارح

التانيه كانت متخناها قوي انما دي مخلياها زي المانيكان...

هي:ايوه كده كويس انك حلقت دقنك

لما مبتكونش حالقها باحس اني باتكلم مع أبو جهل..

شكلك بيبقي وحش قوي...

لما بتحلقها بقا بيتبقي قمر شبه

الواد المضروب اللي اسمه أحمد عز

هي:ايه يا بني عينك هاتطلع عليا طب ايه واكل سد الحنك ليه

متتنيل تتكلم وعليا النعمه ماهطلب منك حاجه فوق طاقتك

هو:يا شيخه الواحد كل مايشوفك بيفتكر حاله المنيل

بقا انا لو معايافلوس دلوقتي مش كنت اتجوزتك

بدل الشحططه اللي انا فيها دي ...

منكوا لله ياللي في بالي ...يالي واكلينها والعه

وسايبينا احنا نغني ظلموة...

أفتكر كده الحوار اختلف تماما ...

**********************

وده حوار بين مذيع مشهور من مذيعي التوك شو ومسئول كبير في الحكومه ...

المذيع:ممكن حضرتك يا فندم تقولنا ايه هي أهم أولويات الحكومه في المرحله القادمه؟

المسئول: شوف أهم حاجه عند الحكومه واللي حطاها علي قمه أولوياتها

هي مراعاة محدودي الدخل ...وأظن ده واضح من تحسن أحوال محدودي الدخل

في السنوات اللي فاتت...واللي كنت باشرف فيها بتولي أعباء المسؤليه ...

المذيع:طب يا فندم تفتكر ليه محدودي الدخل مش حاسين بالتحسن اللي حضرتك بتقول عليه؟

المسؤل:التحسن تدريجي وهتظهر اثارة علي المدي البعيد ...

المشكله ان الناس دايما مستعجلين ومعندهاش بعد نظر...

المذيع: يا فندم في اشاعات بتتردد في الفترة الأخيرة ان حضرتك
بتخصص أراضي ملك الدوله لبعض أقاربك يا تري رد حضرتك ايه علي الشائعات دي؟

الوزير :لا طبعا دي اشاعات مغرضه وانا عمري في حياتي ماخالفت القانون ابدا

والشجرة المثمرة دايما هي اللي بتتحدف بالطوب

ودول ناس حاقدين عليا وعلي نجاحي...

وانا من خلال برنامجك الشهير

باهديلهم اغنيه فريد الأطرش...يا عوازل فلفلوا.....

ده طبعا كان الحوار المذاع علي الهوا....واللي اتقال علي اللسان

أمابقا لو شغلنا الجهاز العبقري بتاع قراءة الأفكار هيكون الحوار بالشكل ده:

المذيع: ارغي يا عم الأمور صدعنا بكلامك الفارغ اللي كلنا عارفين انه ضحك ع الدقون...

المسؤل:طب هاقوله ايه ده..

اذا كنت أنا نفسي من كتر ماكررت الكلام حفظته...

هواحنا خلفناهم ونسيناهم احنا فاضيين لهم

لما هنوزع فلوس البلد ع الفقرا والشحاتين احنا هيفضلنا ايه؟

جاتكوا القرف مليتوا البلد ....

المذيع: والنعمه عارف انك هتقول الاجابه دي مانا كل سنه

باعمل معاك نفس الحوار وبتقول نفس البقين دول

والحكايه بتطربق علي راس الشعب أكتر وأكتر....

المسؤل:طبعا مش حاسين بتحسن علشان مفيش أصلا تحسن...انت صدقت ولا ايه.....

المذيع: شوف بقا أنا صبرت عليك كتير وانت سايق فيها ومقضيها كدب من أول اللقاء

طب خد القاضيه بقا عشان تعرف اني كاشفك....

والنبي لافضحك وأجيب سيرة أرض الساحل اللي قاللي عليها
شبطه السكرتير بتاعك

بعد مالطش مني باكوين...
مش مهم كله عشان اجيب سبق وابقي مذيع متصيط...

الوزير : ايه ده طب وده عرف موضوع أرض الساحل ازاي دانا لسه مخصص الارض للواد ابني امبارح مافيش غير

الواد شبطه السكرتير الخصوصي بتاعي هو اللي اكيد سرب الخبر أما انك واد نتن صحيح كل ده عشان كنت واعده

ب25 باكو واديته 20 بس بتبعني عشان 5 بواكي يا معفن بس أقول ايه فيك يا شبطه يا بن بهانه هتعيش معفن

وتموت معفن عمرك ماهتبقي نصاب محترم ابدا ...

وبكده طبعا اختلف شكل الحوار تماما..

عرفتوا بقا ان عدم القدرة علي قراءة الأفكار رحمه.....

هناك 13 تعليقًا:

خواطر شابة يقول...

عزيزتي هل سبق ونشرت هذا الموضوع من قبل انا سبق وقرأته لمن لا اذكر لا اين ولا متى زهايمر بقى بعيد عنك وعن السامعين ههه
ان لا نقرأ الافكار هي رحمة من الله وعلى العموم هي رحمة عامة لانه كما سنكون مستفيدين في حالات نحن من يقرأ فيها افكار الغير اكيد سنتضرر عندما يقرأ الغير افكارنا خلينا كده الله حليم ستار ههه
دمت بود ورمضان كريم

Haytham Alsayes يقول...

ههههههههههههههههههههه
لا جامدة
يعني دلوقتي مش عارف انا بقول ايه عليكي
في عقلي
هههههههههههههه
بس فعلا عدم القدرة علي قراءة الافكار رحمة
عشان احنا بصراحة مش ناقصين
وعلي رأى خواطر ربنا حليم ستار

تحياتي علي الفكرة الجميلة
وكل سنة وانتي طيبة

ali younes يقول...

جامدة
خطيرة
جميلة
لا فكرة جميلة بجد ومميزة وفعلا رحمة ربنا علينا أننا لا نعرف باطن من نتعامل معهم ...
بجد سعات ربنا يعطي الواحد بعض البصيره في معرفت الناس بس مش معرفت داخلهم قوى قده
ومع ذلك الواحد تعبان من الامر دة وبيدعي ربنا لو كنت ساذج أو علي نيتى كنت ارتحت من حجات كتير

بجد عمل جميل
تحياتي لك
م / علي يونس

طوبه فضه وطوبه دهب يقول...

عارفه ان الفكره حلوه اوى وجديده بس عارفه انى بعتبر عدم معرفه اللى فى بواطن الناس من نعم ربنا علينا لان لو كل واحد فينا اطلع على اللى فى قلوب الناس هيشوف الحقد والكره والغل وحاجات كتير ممكن تخلينا نظن ان ما فيش حد كويس فى الدنيا ولا حد بيحب حدا انما عدم العلم ببواطن النفوس بيخليكى الى حد كبير تتماشى مع الواقع وتصبرى نفسك وتقنعى نفسك ان ممكن يكون الناس صادقه فى مشاعرها او ان اللى جواها كويس بس تسلم ايدك وكل سنه وانتى بخير ياجميله

البنفسج الحزين يقول...

أعزائي كل زوار المدونه الكرام....

أولا وحشتوني جدا

ثانيا اسفه جداااا لسببين:

1)اني بقالي فترة باعيد نشر بوستات قديمه

2)اني برضه مش بارد علي التعليقات بقالي كام بوست ودي مش عادتي....

بس اعذروني ده مش تجاهل والله ابدا لكني مشغوله جداعلي المستوي العملي والأسري
ومحتاجه دعواتكم ربنا يعيني علي اللي انا فيه...سلاااام

رد خاص لخواطر شابه....
انتي معندكيش زهايمر ولا حاجه يا حبيبتي فعلا البوست ده سبق نشرة وانتي قريتيه عندي قبل كده....  

The illusionist يقول...

بصراحه الواحد نفسه قوى فى الحكايه دى
بس ربنا ليه حكمه اكيد
والا كان ادهالنا
لو انتى كده فعلا
مفيش انسان كامل
او مبيكرهش حد
او مشعرش مره بكره ناحيه شخص
تخيلى لو قريتى افكار شخص وعرفتى مثلا حاجات وحشه عنه قبلى ما تتعاملى
او عرفتى اسرار هو مش عاوزك تعرفيها
او حتى فرضا موقفك ده بس
قريتى كلامه وقصده فى المواقف دى
هتبقى الحياه من الاخر
كتاب مفتوح فتحه غبيه
فتحه تخلى الناس تكره بعضها
وبصراحه مش هتوطد اى علاقات
بالعكس
جهل الانسان بنفسيه غيره هو اللى بيساعد على توطيد العلاقات
ودى حكمه من ربنا الواحد يشكره عليها
بس لو عليا
انا عاوزها
عشان نفسى افقس كل الناس المنافقين

أحمد الصعيدي يقول...

السلام عليكم


وكل عام وانتم بخير

blue-wave يقول...

تصدقى ان بجد الحمد لله ان مش عندنا الميزة دى؟:))

جايدا العزيزي يقول...

موضوع جميل جدا

انا مع كل كلمه كتبت هنا

وكل عام وانت بخير


تحياتى

ستيتة حسب الله الحمش يقول...

كل عام وانتي بخير يا أجمل بنفسجة
يارب تكوني أمل
وبكرة يحمل لك كل أمل
بحبك
واساشا البوست ده انا قرأته قبل كده علشان كده معلقتش
لكن قرأته وحمدت ربنا والا ما نظرنا كلنا في عيون بعض بحب :))

بحر الالوان يقول...

كل عام وانتم بخير ......رمضان كريم

sal يقول...

كل رمضان وانت بالف خير

غربة الروح يقول...

الفكره لزيزه بس أكيد لو اتحققت حتحصل مصايب كتييييييير وعلاقات كتير حتنتهي...
خلينا كدا أحسن..
والحمد لله على ما اعطانا...
على فكرة حبيت كلامك في ملف التعريف عن الطموح..
بحيكي لطموحك وتمسكي فيه..

وكل عام وانت بخير