topbella

الجمعة، ٢٦ مارس ٢٠١٠

عايزة اضحك تاني من قلبي


كنت صغير ...باحلم وابني ...
من أحلامي قصور وممالك ...
كانت قدامي الدنيا دي واسعه...
مهما أبص ماجبش الأخر ...
كنت اتعجب م اللي مكشر...
كنت أقوله يا عم اتفاءل...
كانت الضحكه ترن تسمع...
اللي مركز قوي والغافل ...
واما كبرت شويه...شويه...
اتغيرت الدنيا عليا....
وبدل الضحكه ما كانت عاليه...
صوتها وطي ...وجاب الاخر...
من التعليم وهمومه خلصت ...
ومن الشغل اتقطم الوسط...
قال ايه عن نفسي بقيت مسؤل...
وده موضوع شرحه يطول...
ياما حاوططني هموم ومشاكل ...
وبيبان مقفوله ملهاش اخر...
أتاري الدنيا لها وشين ...
وش بيضحك ...وش حزين...

زي الصورة اما تبصلها ...
وانت بعيد تلاقيها جميله...
قرب بس عليها شويه ...
هتووووة في تفاصيلها الكتيرة...

هناك ٢٣ تعليقًا:

sony2000 يقول...

كانت الضحكه ترن تسمع...
اللي مركز قوي والغافل ...
بجد كلمات رائعه جدا جدا
ومعبره فعلا
شكرا علي الكلمات الرائعه

الجواز و سنينه يقول...

جميله اوى يا بنفسجه
تحفه تسلم اديكى و معانيها جميله و عميقه
خصوصا لما قلتى ان الصوره تبان من بعيد جميله و من قريب تتوه فى التفاصيل
هيه دى الدنيا فعلا
بس احنا اللى كنا صغيرين
زى اغنيه هشام عباس اسمها زمان و انا صغير قال فيها
و لما كبرت قول ياريت ما كنت حلمت ولا اتمنيت و قلت يارتنى فضلت صغير زى زمان
تسلم اديكى مره تانيه

ستيتة يقول...

جميلة قوي
حزينة قوي
واقعية قوي قوي قوي

وبدل الضحكه ما كانت عاليه...
صوتها وطي ...وجاب الاخر...
من التعليم وهمومه خلصت ...
ومن الشغل اتقطم الوسط...
قال ايه عن نفسي بقيت مسؤل...
وده موضوع شرحه يطول

تسلم ايدك

sal يقول...

عندما ولدنا، ولدنا أحرارا، لدينا قدرات كبيرة على الدخول في المخاطرات و إحساس كبير بعدم الخوف من الفشل. كان لدينا إستعداد عظيم لخوض التجارب الجديدة، كان الفضول يوقد فينا حب التعلم و محاولة تجربة أي شيء و العبث بكل شيء يحيط بنا. نلعب طوال اليوم و نستمتع بكل أوقاتنا كيفما إتفق، بأي طريقة للعب كانت و بأي أداة للهو توفرت لدينا في ذلك اليوم،. بالنسبة لنا الحياة كانت عبارة عن تجربة ليس لها بداية و ليس لها نهاية، الهدف منها هو اللهو و الإستمتاع.
و لكنها في الحقيقة لم تكن حياة لهو و لا محاولة للمتعة لأجل المتعة. بل كانت تجربة انسانية ساحرة.

Tears يقول...

ييياه العنوان ده خلانى سرحت و الكلام قلب عليه المواجع

الحياة مش زى ما كنا شايفينها زمان و نادرا ما بيتحقق شىء حلمنا بيه و علينا التعايش بالرغم من فارق التوقعات الشاسع

أحمد الصعيدي يقول...

رحلة في نغم المشاكل

أسعدك الله

انا مش معاهم يقول...

حلوه

ســـهــــر يقول...

كلام بسيط بس معانية عميقه جدا
لدرجة الآلم أول زيارة للمدونة
شدنى اسمها اوى
وبجد مش هتكون اخر زيارة ان شاء الله تعالى
تحياتى

فشكووول يقول...

يا بنفسج .. السلام عليكم

ظماااااان وانت صغير كانت الدنيا كلها ضحك .. لا مسئوليات .. لا اخفاقات .. لا منغصات ... اما بعد الكبر .. اجارك الله .. الدنيا كلها فوق الدماغ ويا اما تكون .. ويا اما لا تكون
بس ان شاء الله لازم نكون

اشكرك على التعليق فى فشكول ودائما التواصل
تحياتى

غير معرف يقول...

بجد البوست جميل جداً
أنا تقريبا وأنا بقرأه كنت بغنيه
أول زيارة لمدونتك
و أكيد مش آخر زيارة
باذن الله
تحياتى لابداعك

البنفسج الحزين يقول...

sony2000:@الجواز وسنينه
@د.ستيته@أحمد الصعيدي
@أنا مش معاهم//
أشكركم جدا جدا علي الزيارة وعلي المجامله...
منوريني والله...

البنفسج الحزين يقول...

الجواز وسنينه:
أهلا بيكي... منوراني ...
انا باحب أغنيه هشام عباس بتاعه (زمان وانا صغير )وباضم صوتي لصوته وبقول
واما كبرت قولت يا ريت ما كنت كبرت ولا اتمنيت...

البنفسج الحزين يقول...

sal

عندما ولدنا، ولدنا أحرارا، لدينا قدرات كبيرة على الدخول في المخاطرات و إحساس كبير بعدم الخوف من الفشل. كان لدينا إستعداد عظيم لخوض التجارب الجديدة، كان الفضول يوقد فينا حب التعلم و محاولة تجربة أي شيء و العبث بكل شيء يحيط بنا.

بجد تسلم ايديك كلامك سليم وفي الجووون...
يا ريت نعرف نعيش الحاضر بروح الماضي...بس تفتكر ممكن؟

البنفسج الحزين يقول...

tears
أهلا بيكي واسفه ان كلامي قلب عليكي المواجع ههههه بس أكيد مش لوحدك ...
منوراني

البنفسج الحزين يقول...

سهر:
متشكرة يا قمر علي ذوقك
منوراني في أول زيارة للمدونة بس يا ريت متكونش الاولي والاخيرة ...

البنفسج الحزين يقول...

فشكوول ...
أنا بتابع مدونه حضرتك من زمان...
بس مش دايما كنت باعلق ...
نورتني يا فندم وشرفتني بجد ...
واتمني تتكرر الزيارة

البنفسج الحزين يقول...

منار:
أشكرك جدا علي ذوقك...
هو الكلام الكئيب ده ينفع يتغن برضه ؟
ربنا يكرمك ...منوراني

P A S H A يقول...

قرب بس عليها شويه ...
هتووووة في تفاصيلها الكتيرة

قرب بس عليها شويه ...
هتووووة في تفاصيلها الكتيرة

قرب بس عليها شويه ...
هتووووة في تفاصيلها الكتيرة


بجد مش هالاقي تعليق أجمل من كده :))

وجعتني شويتين تلاته أربعه قولى سبعتاشر
بس بجد تسلم إيدك

تحياتي
:))
سلام

البنفسج الحزين يقول...

باشا:
يا أهلا وسهلا يا 100مرحبا...
اسفه اني وجعتك ...بس احب اطمنك واقولك وجع الدنيا ومشاكلها ده وجع جماعي ...
م الاخر كده هيا مش سايبه حد في حاله ...
ربنا يرحمنا جميعا ويلطف بينا ويقوينا علي تحمل الدنيا ومصاعبها ويخرجنا منها علي خير ...
منورني ومتغيبش علينا كتير...

صفــــاء يقول...

دة كان ظماااان أيام الطفوله
والبرائه
والقلب الخالى
ومافيش أى مسؤلييييه

دلوقت يا قلبى عشان الضحكه ترن تسمع محتاجه حاجات كتير مش موجودة

حلو قوى الكلام وقوى جدا ومؤثر

تحياتى لك

البنفسج الحزين يقول...

صفاء
دلوقت يا قلبى عشان الضحكه ترن تسمع محتاجه حاجات كتير مش موجودة......
اه ثم اة ثم اة وجعتيني بجد يا صفاء....
مش بس محتاجه حاجات كتيرة...
لأ يا حبي دي عشان ترجع فعلا ترن زي زمااااان محتاجه معجزة....
نورتي يا صفاء...
بس ......
الا هو انتي دايما تيجي متأخرة كده ليه؟؟؟دانا بابقي فقدت الأمل ان حد يعلق تاني ع البوست لأنه بقي قديم ...علي كل حال تعليقك بجد بيسعدني ...
تحياتي  

micheal يقول...

كلام فيه عمق في المعنى
عجبني البوست
تحياتي

فاروق سحير ( فاروق بن النيل ) يقول...

البنفسج احزين ...
شعرك العامى بسيط وجيد وسهل ممتنع بعبر عن صدمة إنسان من الواقع الذى رآه عكس مكان يظن ـو هو يتوقع فكان يظن أن الدنيا بخير وكلها سعادة وتفاؤل وليس بها حزن ولكن الصدمة أن بها وجهان لعملة واحدة الدنيا( حلو- ومر و سعادة - شقاء و صحة - ضعف أومرض و حياة- وموت و فقر-وغنى و حب -وكره و راحة - عذاب وعلم -جهل و صغر - كبر و عالى - منخفض ...إلخ ) مقطوعة جيدة زورينى فأنا شاعر لكى نتبادل الخبرات تعلمينى وأعلمك لابأس
farouksam.blogspot.com(عصفور الجنة)