topbella

الجمعة، ١٦ أبريل ٢٠١٠

العصفور الأسير ...


كان في مرة عصفور جميل ونشيط...


بيحب يطير لفوق ويعلي بجناحاته....


وطموحه أنه يوصل لأعلي


حته في السما ....


قعد يتدرب علي الطيران فترة طويله


يقع ...ويتعلم.... ويصبر


لحد ما أتقن الطيران وبقي فيه أستاذ...


كان عايش سعيد بطموحه


حتي تعبه في الطيران


وكتر الوقوع في التدريب


مكانش بيزعله....


بالعكس متعته كانت في تعبه...


عاش يغرد ويطير...


وكل العصافيرالكسلانين


المستخبيين فوق الشجر


في العشش كانت بتحسدة


لأنه كان واثق في نفسه وفي قدراته...


كانت الحياة بالنسبه له جميله...


وفجأة...وعلي غفله جات ريح شديدة قوي


من قوتها طيرته ونزلته علي الأرض


غصب عنه ومن سوء حظه


وقع جوا قفص مفتوح...


واتقفل باب القفص عليه قفله قويه ....


وفضل العصفور المسكين جوا القفص


يدبدب برجليه علي باب القفص المتروس


ويحاول بكل قوته يفتح باب القفص


لكنه طبعا مش قادر لأن جسمه ضعيف ...


كان بيتقوي بطموحه وشغله


(بس يعمل ايه الطموح في الباب المقفول )


فضل يلف ويدور حوالين نفسه في القفص


وينده بأعلي صوته علي الناس


اللي برا القفص


يا ناس افتحولي القفص


أنا عايز أرجع من تاني أطير


القفص ده مش مكاني ....


القفص للعصفور الضعيف


أنا عندي أحلام كتيرنفسي أحققها


بس يا خسارة ...


حاول كتير... استنجد بناس كتير ...


لكن كل الناس اتخلت عنه وقالوله


هنستفيد ايه منك لو فتحنالك القفص


أسرك زي حريتك عندنا


مدام مفيش لينا فايده من وراك ....


سنين كتير مرت وهو محبوس في القفص


بيلف ويدور ويخبط ويعيط وينده ويستنجد...


قلبه بيتقطع كل مايبص للسما ويلاقي


العصافيراللي كان بيشوفها وقت طيرانه


زمان مريحه في العشه وحتي العصافير اللي


جناحها مكسور ومتعرفش أصلا تطير


في نسور وصقور شايلاها وبترفعها معاها


لفوق وبيساعدوها تطير


وهي أصلا ملهاش حق......


والعصفور أبوجناح مكسور بيبص


له ويقوله شايف ياعصفور يا محبوس


أنا فين وانت فين


أنا فوق في السما وانت تحت


علي الارض محبوس في قفص ...


لكنه مع الوقت ضعف


ومبقاش باقي له من طموحه


الا ذكري في باله لأيام جميله عاشها


قبل مايبقي أسير القفص ....


وسؤال لسه بيسأله لنفسه كل يوم جديد


ياتري ممكن ييجي اليوم


اللي يتفتح فيه باب القفص


وأخرج للدنيا اللي بحبها من تاني....

هناك ٢٥ تعليقًا:

P A S H A يقول...

‏:)


‏**
ده مجرد تحليق مبدئي


تحياتي

غير معرف يقول...

دائما يوجد الامل طالما يوجد الاصرار ..

فليبحث العصفور الحبيس عن طريقه جديده لفك الاسر :)

تحياتي

صيدلانيه طالعه نازله يقول...

طول ما هو فى دماغه انه يتحرر من الاسر
حيقدر يطير من تانى و يعلا و يعلا لفوق
و ساعتها حيبص لكل اللى شمتوا فيه و فرحوا فى ضعفه و يوريهم قد ايه هو قوى

sal يقول...

هو انا كل مرة اقعد اقولك
ما اضيق العيش لولا فسحة الامل

فكرى العصفور الجميل وقوليله
لا يأس مع الحياة
بالارادة حيحقق كل اللى يتمناه

اكيد فيه ابن حلال حيعدى جنبه ويفتح القفص

وساعتها حيستمتع بطيرانه
بطريقة رائعة اكثر من طيرانه الاولى
البدائى

تحياتى

sony2000 يقول...

لا يأس مع الحياه
ولا حياه مع اليأس
بجد قصه حلوه اوي:)

ستيتة يقول...

اه طبعا فيه كل الأمال اللي عقله يتخيلها واللي عقله لا يتخيلها
رزق ربنا ما له من نفاد

بس صورة عمرو خالد دي خلتني افكر في شيء
هو عمرو خالد لو نجح بكل شخصيته الفذة دي انه ياخد جنسية ياباني ها يوصل بالعلم والإيمان جوا قلوب الناس لفين

صورة عمرو خالد وجعت قلبي
رغم اني عارفة انه شغال زي الفل
بس ده راجل أتى غريبا في زمن الأنتخة والإنتقادات ع الفاضي والمليان

عمرو خالد أتى وسط 78 مليون ناقد من موقعه على الكرسي
وألفين فاسد من موقعهم ع الكرسي برضه
وحوالي نص مليون محبط نفسهم يعملوا شيء من موقعه ع الكرسي برضه

تحياتي

الغاردينيا يقول...

مافي شئ صعب

ومافي شئ اسمه مستحيل

ممكن يحدث شئ فجاة و يطير العصفور للحريه

هو بس يرفع راسه ويدعي رب السماء موجود

تحياتي

البنفسج الحزين يقول...

فتاة من الصعيد:
ازيك يا مروة عود أحمد للتعليق والتدوين ...

البنفسج الحزين يقول...

صيدلانيه طالعه نازله :
اهلا بيكي يا دكتورة منوراني ...

(ساعتها حيبص لكل اللى شمتوا فيه و فرحوا فى ضعفه و يوريهم قد ايه هو قوى)
أكيد العصفور أصلا هيكون عايش مستني اليوم ده

البنفسج الحزين يقول...

sal:
خلاص يا عم متزقش ههههههه
تعيش وتفكرني ...

اكيد فيه ابن حلال حيعدى جنبه ويفتح القفص
أتمني ....بس تفتكر لسه في ولاد حلال دلوقتي ؟؟؟

البنفسج الحزين يقول...

sony2000:
أشكرك الله يرحمك يا مصطفي كامل
فعلا لا حياة مع اليأس

البنفسج الحزين يقول...

دكتورة ستيته:

رزق ربنا ما له من نفاد....ونعم بالله
مهما كانت الحياة صعبه...
مش بيهونها غيرالأمل في رحمه الله التي وسعت كل شئ ...
بالنسبه لعمرو خالد الراجل ده لما باسمعه بيتكلم مش باسمعه بوداني لأ كلامه وأسلوبه بيجبروني أنصت بقلبي وعقلي ...ربنا يبرك فيه وفي مجهوداته لايقاظ الأمه النايمه في شبات عميق
التي ضحكت من جهلها الأمم

البنفسج الحزين يقول...

الغاردينيا:
ونعم بالله ...
تحياتي ليكي

خواطر شابة يقول...

اكيد مادام حيا لايجب ان يفقد الامل يوم يموت وقتها يعرف ان الامر انتهى لكن مادام فيه نفس يطلع ويهبط عليه ان يتمسك بأمله ويسعى لتحقيقه.
دمت بكل ود

البنفسج الحزين يقول...

خواطر شابه ....
أكيد مادام حيا لايجب ان يفقد الامل
معاكي حق طول ما الانسان حي ان شاء الله في أمل الاوضاع تتصلح بس هو يقول يا رب
تحياتي

فاروق سحير ( فاروق بن النيل ) يقول...

البنفسج الحزين ....
كلام له معنى ظاهر ومعنى باطن لكن كأنك تخاطبى أطفال صغيرين ياستى دانا أصغر واحد فى ولادى بآخر سنة بطب عين شمس إلا إذا كنتى قاصداها وتخلينا صغيرين فى نظرك شكرا ليكى

البنفسج الحزين يقول...

الاستاذ الفاضل فاروق بن النيل :
أولا يا فندم ربنا يديك الصحه ويباركلك في أولادك ...
ثانيا ... أنا معاك طبعا ان الكلام له معني باطن .وايه المانع في كده....
أنا عامله المدونه دي لغرض أساسي وهو اني أقول رأيي لما احب اقوله وأعبر عن اللي باحسه واللي مضايقني واللي بيفرحني ...يعني مدونتي انعكاس لحالتي النفسيه والمزاجيه ...
وكلامي في البوست ده ما هو الا وصف تعبيري عن حاله أنا حاسه بيها ومش لازم أحكي التفاصيل الواقعيه للحاله دي لأن ده هيتطلب كلام كتير وتفاصيل كتير قوي مش حابه أحكيها...وبالعكس في أحيان كتير الكلام المجرد بيوصل أكتر الاحساس والمعني أكتر من الكلام الواقعي اللي مليان تفاصيل ...
والموضوع ملهوش علاقه أبدا بسن المخاطب أنا عارفه اني مش بخاطب أطفال ..أنا بخاطب ناس واعيين وناضجين وعلشان كده هيقدروا يحسوا بالمعني اللي ورا الكلام ...المهم عندي ان المعني والمغزي من القصه يتحس
باشكرك جدا وبعتذر عن سوء الفهم اللي حصل ...

فاروق سحير ( فاروق بن النيل ) يقول...

البنفسج الحزين ...
آسف ماقصدتش أجرحك والله ولكن كما قلتى عندك أحاسيس ومشاعر لازم تطلعيها وماتكبتيهاش عشان الإنسان ماينفجرش ولكن إقبلى رأيى وكونى صريحة إلى حد ما كما أنتى صريحة بردك دون الدخول فى تفاصيل وماتزعليش ياستى حقك عليا المهم الإختلاف فى الرأى لايفسد للود قضية وأنا لم أتهمك بشيئ إلا أنك طفلة كبيرة وورده صغيرة وشكرا لك

انت تسال والكمبيوتر يجيب يقول...

سعدنا فعلا بالمرور وبالحس المرهف وجمال التعبير ولذلك نوجه لك هذه الدعوه
نحن اول برنامج أذاعى عن النت والمدونات ويذاع يوميا عدا الجمعه التاسعه وعشر دقائق صباحا على موجات الأذاعه الرئيسيه لمصر
نحن نطرح موضوعات الحلقات قبل اذاعتها فى مدونتنا لبعلق عليها اصحاب المدونات او غيرهم من الزائرين
ونذيع هذه الموضوعات مع التعليقات ومقتطفات من مدونات اصحابها اذا رغبوا
وبذلك نجمع لأول مره بين الأعلام التقليدى والنت
مدونتنا
http://netonradio.blogspot.com

دعاء العطار يقول...

اكيييييييييد هيقدر بس اهم حاجه انه مايياسش

اهم حاجه انه مايفقدش الامل

دمتى بكل ود

Tamer Moghazy يقول...

السؤال الاهم..
يا ترى لو جه اليوم ده وخرج بره القفص ها يقدر يستعيد قدرته على الطيران ولا الـ (الحبسة ) الطويلة دي علمته انه يطير بس ع (الارض)..؟؟

حاسس انه القصة فيها تمثيل للواقع..!!

-_- يقول...

لسة قاري مقال عن العصافير

https://www.blogger.com/comment.g?blogID=929703395459020374&postID=6340758317285730720

فاروق سحير ( فاروق بن النيل ) يقول...

الأخت الفاضلة /البنفسج الحزين
إزيك وأزى صحتك عندى قصيدة جديدة حاتعجبك وعنوانها هو " قدساه لاتحزنى " ياريت تشوفيه وتعلقى عليها وشكرا لك وإلى لقاء

فاروق سحير ( فاروق بن النيل ) يقول...

البنفسج الحزين ...
آسف غلطت بإسم القصيدة الإسم الصحيح هو :
" قداساه لاتنتظرينى" وشكرا لك

رحاب صالح يقول...

صباح الورد
اول مرة ادخل المدونة ويمكن دخلتها عشان لفت نظري الاسم وانا كمان بحب البنفسج اوووي اوووي اوووي
بالنسبة للبوست ده فبيفكرني بفيلم الجميلة جدا والرقيقة والمقنعة فاتن حمامة " الباب المفتوح" هتلاقي هنا في تشابه يعنني احنا اللي بنرضي بالحبس ومعتقدش اني اكون حرة وارضي بالسجن لازم اقاوم ولازم اعاني واحاول عشان اخرج للحرية وميهمنيش حد بتمني للعصفور يلاقي حل ويخرج ويساعد نفسه وميستناش حد يساعده
دمت بخير وتقبلي مروري
رحاب صالح