topbella

الأربعاء، ٦ أكتوبر ٢٠١٠

كل سنه وانتي طيبه يا بنفسجتي



هذا البوست بوست احتفالي ....
بمناسبه مرورعام كامل علي دخولي عالم التدوين ...

مدونه....
كنت دائما أسمع الكلمه دي وكنت فاكرة ان المدونات دي بتتكلم في السياسيه وبس
وان المدونين محسوبين علي المعارضه ويلاحقهم الأمن ولاني باكرة السياسه
فكانت فكرتي عن التدوين مش ولابد ...

لكن لما ابتديت ادخل المدونات بجد واتابعها اكتشفت أن الاعتقاد ده خاطئ ....
ومن أول المدونات التي تابعتها مدونه جبهه التهييس الشعبيه لنوارة نجم
ومدونه عايزة أتجوز لغاده عبد العال واكتشفت ان فكرتي عن المدونات مش صحيحه
وعرفت ان مش كل المدونات أصحابها بيتكلموا في السياسه
لأ كل مدون بيختار الموضوع اللي بيحب يتكلم عنه منهم اللي بيكتب موضوعات شخصيه ومنهم اللي بيكتب عن مواقف اتعرض لها في حياته ومنهم اللي بيكتب شعر
ومنهم اللي بيكتب خواطر ..
والمفارقه ان المدونات المتخصصه في السياسه فقط قليله جدا ...

ببساطه عجبتني الفكرة....فكرة ان يبقي عندك صفحه مفتوحه لكل الناس
تكتب فيها كل اللي بيدور في دماغك ...كل اللي عايز تقوله في أي حاجه ...
يعني بدل ما تحاول تراسل أي جرنال علشان تحاول تنشر فيه مقال فيه خاطرة كتبتها
أو رأي عايز تقوله أو شكوي كل البيبان مقفوله ومش عارف توصلها لمسؤل
كل واحد فينا دلوقتي عنده الجريدة الخاصه بتاعته يكتب فيها اللي هو عايزة
مش بس كده انت كمان بتاخد رد فعل فوري علي رأيك ده من خلال التعليقات
وكمان هيتناقش ويتحلل من عده زوايا ...

في البدايه ترددت كثيرا قبل أن اتخذ قرارأنشاء مدونه خاصه بي
لأني كنت أخشي علي نفسي من التعلق بالعالم الافتراضي
فانا شخصيه تحب أن تعيش وتتعايش مع الواقع مهما بلغت درجه قساوته
لكن يكفي انه الحقيقه التي لابد أن تعاش...
ولكني وجدت في هذا العالم الافتراضي أناسأ ذوي فكر وثقافه
ومهمومون بقضايا الوطن وهذة الصفات قلما تجدها في العالم الحقيقي من حولك
والذي كل منشغل بذاته ولا وقت للنقاش والحوار وابداء الأراء بل لا وقت أصلا للفضفضه ...

فأصبح لي أصدقاء افتراضيون أحبهم كثيرا واستفدت من ارائهم وسعدت بمعرفتهم ...
لم أكن أتخيل حين أنشات هذه المدونه أنها ستصبح شئ هام في حياتي ...
نعم تعلقت بها ...لا يمر علي يوم من دون أن أفتحها لأتفقدها ...
وكأني أطمأن عليها..... مدونتي أصبحت تنفيس عما يجول في خاطري
والذي ربما لا أستطيع ان أبوح به لأحد ...أو لا أجد من أصارحه بما أشعر به
فهي الصديقه الموجوده دائما والتي لا أتردد اذا همني شيئأ أو ألح عليا فكرا
أن أذهب اليها لأبث فيها همومي وأشجاني وأفراحي وانفعالاتي وأحداث حياتي وارائي وأفكاري ...

وفي النهايه أود أن اشكركل متابع لما أكتب في هذة المدونه فردا فردا
والذين دائما أسعد بزيارتهم وتعليقاتهم وأستفيد من ارائهم القيمه فيما يطرح في هذة المدونه من مواضيع

رجاء خاص: يا ريت كل اللي عنده رأي خاص في المدونه
أو اي اقتراح لتطويرها يتفضل يقوله
حتي لو نقد أنا باتقبل النقد تماما ومن غير زعل ...
أشكركم

هناك ٢٢ تعليقًا:

ستيتة يقول...

كل سنة وانتي طيبة يا بنفسجة
ويارب دايما معانا

sal يقول...

كل سنه وانت بالف خير

ربنا يسعدك

البنفسج الحزين يقول...

ستيته حسب الله الحمش :
وانتي طيبه يا أجمل صديقه لكل المدونين

البنفسج الحزين يقول...

sal
بجد انت من الناس اللي باسعد قوي بارائه وتعليقاته ويشرفني انك تكون من زوار مدونتي...

غير معرف يقول...

كل سنه وانتي ومدونتك طيبه يا امل .... والى الامام دايما ..

وعلى فكره في اقتراح كنت سمعته من حد ممكن تنفذيه .... ممكن بحكم دراستك تنشري فيديوهات علميه مبسطه او حتى تنشري مقالات علميه مبسطه برضو :)

البنفسج الحزين يقول...

مروة ...
وانتي طيبه يا مروة
اقتراحك جميل وانا فكرت فيه قبل كده وهحاول أنفذة ان شاء الله
تحياتي

أندروميدا يقول...

كل سنة وانت طيبة ...وعقبال 100 سنة

وجميل ان اليوم يبقي موافق ... 6 اكتوبر ... اوعي تكوني عملتي المدونة الساعة 2 الظهر :)

تحياتي

موناليزا يقول...

كل سنة وانتِ ومدونتك طيبين

نـــــور يقول...

كل سنة وانتى ومدونتك بخير
تابعتك اوقات كتير من غير تعليق
استمرى ماتعمليش زيى وتخلى الدنيا تاخدك من ملكوتك الحلو الصغير اللى بتلاقى نفسك فيه

البنفسج الحزين يقول...

القصاص الموهوب
اندروميدا ...واللي عرفت مؤخرا انه
بحر الألوان سابقا المهم اني علي ما عرفت ودخلت المدونه الجديده لقيتك كاتب بوست انك عايز تقفلها طب ينفع كده؟
وعلي فكرة أنا بدون قصد عملت عيد ميلاد المدونه متأخر المفروض كان 1 أكتوبر ...

البنفسج الحزين يقول...

موناليزا:
وانتي كمان طيبه وبخير يا رب

البنفسج الحزين يقول...

نور:
وانتي طيبه وبخير
يسعدني زيارتك للمدونه ويا ريت تبقي تشاركينا بتعليقاتك ...واوعدك هاستمر ان شاء الله كلما سمحت الظروف ويا ريت انتي كمان تحافظي علي الحاجه الحلوة اللي بتلاقي فيها نفسك وتخصصيلها ولو جزء صغير من وقتك ...

أنا - الريس يقول...

كل سنة وانتي طيبة

وساقف خطيبا منبريا واقول كما قال الشاعر

أَهنَأ بِعامٍ قَد أَتاكَ مُبارِكاً * وَمُباشِراً بِسَعادَةٍ لا تَعبُدُ

فيهِ تَوَلّانا السُرورُ لِأَنَّهُ * عامٌ سَعيدٌ أَنتَ فيهِ أَسعَدُ

البنفسج الحزين يقول...

سيادة الرئيس:
وانت طيب ...
لا فض فوك ....طب خلي الأشعار الحلوة دي للخطب العصماء اللي هتقولها لما تتولي الرياسه...
أشكرك جدا

The illusionist يقول...

حيث كده



كل سنه وانتى طيبه

البنفسج الحزين يقول...

الروقان مع كوبايه الشاي:
حيث كده برضه
وانت طيب ...فينك مش باين
من زمان....

P A S H A يقول...

كل سنة وأنت طيبة وبألف خير وصحة وسعادة إن شاء الله ويا رب دايما تفضل مدونتك منوره عالم التدوين
بالنسبة للإقتراح :
مممممم
ممكن تعملي محل عصير على ناصية المدونة آهو لو حد دخل وما قراش ينفعك بكوباية عصير ‏D‏:‏
‏ بس تعزمينا ف الإفتتاح هه ؟
‏"باهزر على فكرة"
خالص تحياتي وعميق احترامي وتقديري وعقبال مليون سنة :-)

Tears يقول...

كل سنة و انتى و المدونة طيبيين :)

البنفسج الحزين يقول...

باشا:
وانت طيب ...ايه أخبارك مختفي كده بقالك فترة ومش بتكتب بوستات جديدة وحشتنا بوستاتك الجميله ...
وبالنسبة لمحل العصير والله فكرة بس ايه رأيك نخليه شرك يعني المحل عندي والقصب نجيبه من عندك والمكسب بالنص ...
واهو نبقي طلعنا بمكسب من التدوين...هههههه
تحياتي

البنفسج الحزين يقول...

tears
عايزة أقولك اني مبسوطه انك ابتديتي تتابعي مدونتي...بجد والله
ثانيا أشكرك وانتي كمان طيبه

فاروق سحير ( فاروق بن النيل ) يقول...

البنفسج الجديد ...
كل سنة ومدونتك طيبة بيكى
كل سنةومدونتك عامرة بالهمسات الرقيقة
كل سنةومدونتك مليئةبأصدقاء وأحباب
المدونة تعبر عن شخصية صاحبها وهو يصحح مساره وأخطاؤه بواسطة تعليقات الآخرين فلسنا ملائكة ونحن نخطأ ونصحح أخطاؤنا
كل سنة وإنتى بخير وسعادة وآن الأوان أن
تكون" البنفسج السعيد "ولا رأيك إيه

البنفسج الحزين يقول...

عمو فاروق ...
وحشتنا جدا....
ووحشتني قوي تعليقاتك يا رب تكون طيب وبخير وفي أتم صحه....
وبالنسبه للبنفسج فأتتمني من ربنا يكون فعلا ان الأوان يكون سعيد دعواتك يا عمو