topbella

الثلاثاء، ٢٣ نوفمبر ٢٠١٠

الحلم البعيد

>

يا حلم ليه دايما بعيد

كل اما أقرب تبعد بعيد

انده عليك... عندك يزيد

ولما تعند ...أبعد بعيد

ولما أبعد فجأة الاقيك

تجري تناديني من جديد

هو البعيد عنك قريب

والا القريب منك بعيد

******

يا حلم ليه دايما شريد

في الدم انت والوريد

قرب تعالي متخافش مني

عاشقك انا من صغر سني

وان كان بعادك تقل ودلال

فانا من دلالك تبت ارتويت

****

حاسب يا حلمي بحذرك

كتر الدلال بيجيب ملل

كتر الملل يعمل كسل

وساعتهايتساوي

وجودك والعدم

****

مبقيتش عارفه انت ايه

مش حلمي انت ولا ايه

ليه بتعاكسني كده بس ليه

ده انا حته منك

وانت برضه

حته مني

ولو تسألني انا هعمل ايه

هارد اقولك واخبي ليه

هاصبر عليك واستني

ده لقانا هو الجنه






هناك ٢٤ تعليقًا:

ستيتة يقول...

تعرفي يا بنفسجتي

ساعات لما الحلم يبقى عنيد قوي كده
يجيب للواحد مزيد من العند لتحقيقه
بس بعد ما يحققه
بيكون تعب قوي لدرجة انه بيزهده ويجده مكنش يستاهل كل هذا الحزن والطموح

المعنى في بطن ستيتة طبعا:)

sal يقول...

*حاسب يا حلمي بحذرك
كتر الدلال بيجيب ملل
كتر الملل يعمل كسل
وساعتهايتساوي وجودك والعدم**

عجبنى اوى الكلام دا
وعجبنى رأى د ستيتة

تحياتى

Carmen يقول...

جميلة اوي ياحبيبتي شجن ورومانسية حالمة
نهاية روعة تسلم ايدك
تحياتي

Dr/ walaa salah يقول...

جميله اوي كلماتك دي يا حبيبتي برغم ان جواها حزن وشجن

مشكور وربنا يبعد عنك اي حزن

mrmr يقول...

جميله كلماتك يا قمر
خاطره تستحق التحيه والتصفيق
ربنا يسعد قلبك
ويحقق احلامك

البنفسج الحزين يقول...

د.ستيته:
معاكي حق يا دكتورة كل ما الحلم بقي عنيد يشجع الواحد أكتر يعند فيه ويقول يانا ياانت وخصوصا لو شخصيه عنيده بطبعها زيي مانتي عارفاني
والمعني في بطن البنفسجه

البنفسج الحزين يقول...

sal

حلو اسلوب التهديد ده ...هههههههه
اهوة باستعمل مع حلمي مرة اسلوب الترغيب ومرة الترهيب بس علي الله اي اسلوب فيهم يجيب نتيجه...
مبسوطه قوي ان الفقرة دي عجبتك
أشكرك

البنفسج الحزين يقول...

karmen
متشكرة قوي ياحبيبتي علي ذوقك ومبسوطه قوي ان الخاطرة عجبتك ربنا يكرمك ويحفظك...
تحياتي

البنفسج الحزين يقول...

د.ولاء..
متشكرة قوي ومبسوطه ان الخاطرة عجبتك بس دا بعض مما عندكم انتي ما شاء الله بتكتبي شعر وخواطر جميله وعمو فاروق كمان واضح ان العيله كلها شعرا هههه

البنفسج الحزين يقول...

mmr
متشكرة قوي يا حبيبتي
ربنا يسعد قلبك ويحقق احلامك انتي كمان

غير معرف يقول...

اوقات كثيرة مو بس الحلم يبقى عنيد يبقى الانسان هو الاعند عند حلمه واوقات تانية كمان يكون الحلم بيعاند عشان هو امام صاحبه ومش عارف يوصله

البنفسج الحزين يقول...

غير معرف..
معاك حق أصعب حاجه انك تكون شايف حلمك قدام عنيك بس صعب عليك توصله ,وخصوصا لما يكون اللي واقف بينك وبينه ظروف خارجه عن ارادتك...
أشكرك

Unknown يقول...

باختصار غير ممل.. عجبتني دي قوي:

"مبقيتش عارفه انت ايه
مش حلمي انت ولا ايه
ليه بتعاكسني كده بس ليه
ده انا حته منك
وانت برضه حته مني"

بس.

تحياتي أختي الكريمة.

P A S H A يقول...

‏:-)
مساء الأحلام

جميلة شجية
‏:-)
عجبني أسلوب الكتابة .. جميل

وبعدين الأحلام لو ما كانتش صعبة .. عنيدة .. بعيدة .. شبه مستحيلة ما كانتش هاتبقى أحلام !‏
وكنا هانزهد فيها‎ ‎‏، عشان كده عجبتني النهاية قوي ..
ده لقانا هو الجنة حلوة حلوة حلوة

ملحوظة: ولا القريب منك بعيد فيها ألف زائدة .

ربنا يحققلك كل ما تتمنيه إن شاء الله

فاروق سحير ( فاروق بن النيل ) يقول...

البنفسج الحزين.......
لو كانت دى بداية لشاعره يبقى حانخاف على أنفسنا ولالأه داحايزيد الشعراء المبدعين مبدعة جديدة والله بدون مجاملة إستمرى فشعرك حساس ورنان وموسيقى ومؤثر وواقعى وسيبك من إدخال كلمات من الأغانى" البعيد عنك قريب والقريب منك بعيد" ممكنتستعيضى عنها بكلمات موش أقل منها وتحمل نفس المعنى " ليه كل ماقرب تبعد وكل مابعد تقرب "
هوه اللى قريب من العين بعيد عن القلب والبعيد عن العين قريب من القلب" مثلا شكرا لكى عزيزتى

البنفسج الحزين يقول...

ماجد القاضي
أشكرك جدا ...ومبسوطه ان الجزء ده عجبك
تحياتي

البنفسج الحزين يقول...

باشا
شكرا يا فندم
بس احنا نيجي ايه جنبك داحنا بجد يا شريف انت الخواطر بتاعتك ملهاش زي

هي دايما كده احلامنا معذبانا ومعانده فينا بس معلش وراها وراها لحد ما تتحقق باذن الله...
وشكرا ع الملحوظه معلش مخدتش بالي ...
تحياتي

البنفسج الحزين يقول...

عمو فاروق بن النيل ..
واحشني والله انا عارفه اني مقصرة قوي
بس والله مشغوله جدا جدا الشغل والدكتوراة واخدين كل وقتي ومش بعرف اتابع المدونات زي الاول...
اما بقا شكرك في الخواطر اللي بكتبها دي شهاده كبيرة اعتز بيها قوي بس احنا هنروح فين احنا بنتعلم من حضرتك يا شاعر يا كبير ...
وعلي فكرة بالنسبه لجمله
البعيد عنك قريب
والقريب منك بعيد"
انا قاصده احطها كده زي ماهي لأني باشوف حلمي كده فعلا
اللي يقرب منه يبعد عنه ويعانده واللي يزهد فيه يجري وراة ويجي له من غير تعب ...
تحياتي

sony2000 يقول...

الله
الله
ايه التعبير الجامد دا
عما يدور بداخل الواحد
وخصوصا
وساعتهايتساوي
وجودك والعدم
دي

البنفسج الحزين يقول...

sony2000
واضح ان الناس كلها احلامها معصلجه معاها ومعانده فيها مش انا بس ههههههه
اه ماهو لما الحلم يبقي عنيد قوي كده يزهق الواحد ويخليه يفقد الامل فيه وساعتها مش هيفرق وجوده من عدمه حتي لما بييجي بييجي متأخر وتكون زهوته وفرحته راحت خلاص لأنها مجاتش في وقتها ...
شكرا يا سوني وربنا يحقق لك كل احلامك

Tears يقول...

معاكى حق و ده كتير بيحصل لما نبقى ح نموت على حاجة و بنسعى ليها و ليل نهار بندعى و ماتحصلش و نسكت و نقول خلاص ده نصيب و معلش و ربنا يعوض و ننسى و بعد فترة تلاقى شىء حصل و كان الحلم اقترب لوحده و بدون اى مجهود و لا توقع

Tamer Moghazy يقول...

الحلم عامل زي الظل..
نجري وراه..يجري منا..
نجري منه...يجري ورانا..!!

البنفسج الحزين يقول...

تيرز:
اللحظه اللي انتي بتحكيها دي لحظه جميله قوي ...بس نقول ايه هي الدنيا عموما كده تزهدي فيها تجيلك تتمنيها تبعد عنك وتتمنع وعجبي...
تحياتي ...

البنفسج الحزين يقول...

Timo
معاك حق
بس هنفضل احنا واحلامنا
نجري ورا بعض كدا كتير ...
تحياتي