topbella

الجمعة، ١٧ ديسمبر ٢٠١٠

حل الواجب........


الواجب التدويني ده (دبستني فيه) قصدي كلفتني بيه المدونه المغربيه العزيزة خواطر شابه

التي أكن لها حقيقه كل ود وتقدير واحترام

واعتبر مدونتها واحده من المدونات الراقيه التي أحرص دائما علي متابعتها ...

نيجي بقا لحل الواجب ...

السؤال الاول: هل انتي فضوليه؟

أنا لا أعتبر نفسي انسانه فضوليه ولا أقحم نفسي اطلاقا في أمر لا يعنيني

أو لا يخصني ولا ينتابني الشغف لمعرفه أسرار الأخرين

ولا أجهد نفسي أوأتحايل لمعرفه ما يخفيه الناس من أمور خاصه

أو ما يكرهون أن يطلع عليه احد ..

ولعل السبب في هذا اني دائما أعامل الناس بما أحب ان يعاملوني به

وأضع نفسي دائما في كل تصرفاتي مع الناس في موضع من أتعامل معه

فكما أني لا أحب أن يتطفل أحد علي حياتي أوأن يبحث وراءي ويفتش عن ما أخفيه من أسرار

أو عن ما أعتبرة أشياء خاصه بي فبالضرورة يجب الا أفعل أنا ذلك التصرف القمئ ...

ويحضرني في هذا الصدد بيتين من الشعر أحاول أن أطبق ما جاء فيهم...

اذا شئت أن تحيا سليماً من الأذي

وحظك موفورٌ وعرضُك صينٌ

لسانك لا تذكر به عورةَ امرئٍ

فكلك عوراتٌ وللناس أعينُ

وان أبدت اليك عينك للناس مساوئاً

فدعها وقل يا عيني للناس أعينُ

وأيضاً لا ننسي حديث رسول الله صلي الله عليه وسلم ...

(من تتبع عورات الناس فضحه الله في عقر دارة)....

ولكن للأسف ...

مع ذلك كثيرا ما أقابل في حياتي هؤلاء الفضوليين الكثيري الأسئله فيما لا يعنيهم معرفته....

السؤال التاني: ماهي الاسئلة التي تستفزك؟

لو حد اتكلمت معاه قبل كده واتعرف علي اسمي وقابلته تاني مرة ونسي اسمي وسألني عليه تاني وهو بيعتذر ان الاسم تاه عن باله ؟؟؟

الموقف ده بيستفزني جدا معرفش ليه بحس باهانه لكرامتي ان الشخص ده نسي اسمي وبابقي عايزة انهي الكلام معاه بل والتعامل معاه من الاساس... (مع العلم اني انا شخصيا دايما الاسامي ماتثبتتش في ذاكرتي ابدا)

سؤال تاني بيستفزني...

هو نفس السؤال اللي بيستفز خواطر وأي بنت لسه مش متجوزة...

معقوله انتي لسه مش متجوزة ؟ ليه هما عميوا؟؟؟

كثيرا ما أسمع هذا السؤال بل وأصبحت أتوقعه من أي شخص يعرفني أو يتحدث معي لأول مرة ...

وما يستفزني أكثر ان كل شخص يطلق لخياله العنان في تصور السبب ويفترض الاجابه ويصدقها ويتصرف علي اساس انها حقيقه واقعه ...

ولازم كل الاجابات تبتدي بكلمه أكيد

زي مثلا انه يقترح الاجابه التاليه

أكيد أهلك بيطلبوا مهر وشبكه غاليين...

أو

أكيد انتي حاطه مواصفات خاصه في العريس اللي انتي عايزاة....

ولا يتواني هذا الشخص بل ويسهب في ابداء النصائح الغاليه بأن

الشباب الايام دي تعبان ومش لاقي والأهل لازم يتنازلوا شويه وميكتروش الطلبات علي العريس وان البنت لازم تتنازل شويه ومش هتلاقي حد فيه كل المواصفات اللي هي عايزاها وهكذا وهكذا....

ويصبح مجرد انك توقف الشخص ده عن الكلام أمر غايه في الصعوبه....

بابقي بس عايزة أفهمه (أو أفهمها غالبا لأن معظم الناس الحشريه دي بتبقي للأسف ستات)

انك حافظ وفاهم الكلام ده كويس وانه مجبش التايهه وانك مش بتفكر بالطريقه دي

وان ولا سبب من اللي سيادته اقترحه هو السبب الحقيقي

وان السبب الحقيقي يتلخص في كلمه واحده

النصيب لسه مجاش ....

وبيبقي جوايا كلمه ذوقي بس هو اللي بيمنعني اني أقولها للي بتكلمني ....

وانتي مالك يا حشريه .....

السؤال الثالث: الى من تمررين الواجب؟

لا مش هامررة لأي حدلأن

ممكن أكلف بيه حديكون مشغول

أو معندوش وقت يحل واجبات......




هناك ٢٢ تعليقًا:

Dr/ walaa salah يقول...

اجابات عشره على عشره

بس على فكره انا نسايه اوي

وبنسى اسامي الناس كتير

تعرفي انا بكتب اسامي البنات اللي مضافه عندي في الماسنجر جنب ايميل كل واحده عشان افتكره

يعني متزعليش من اللي بينسوا الاسامي السن بقى يا بنتي ^-^

اما بخصوص السؤال الرزل اللي بيتسأل دايما

هو انتي لسه متجوزتيش


بصراحه انا بقيت اغلس في الرد عشان اللي يسأل ميسألش تاني

يعني بقولهم انا حره مش عايزه اتجوز

يتكبسوا ويتخرسوا على طول ^-^

سؤال قبل ما امشي

هو انتي ليه متجوزتيش هههههههههههههههه

أنا - الريس يقول...

ازيك يا نفسج ..

ماشي يا حجة وربنا يكرمك بابن الحلال ويكرمني ببنت الحلال قادر يا كريم .

بس والله مبدأك في عدم تتبع عورات الناس محترم صعب انك تلاقيه في انسان حاليا بسبب إن الناس من وقت فراغها في حياتها بقت تشغل نفسها بحيوات الأخرين .

تحياتي ليكي وأحسن نصحية عملتها عدم تمرير الواجب

Carmen يقول...

اجابات تمام جدا ^_*
تسلم ايدك

ستيتة يقول...

مش واخدة بالك يا بنفسجتي من حاجة
انا مصدقاها مش بتريق على فكرة
انا لم اجد مدونة واحدة حلت الواجب وقالت انها فضولية
امال مناخير النسوان اللي طويلة في كل شئون العالم دي تبع مين؟ إي تي
وتاني انا مش بتريق
دي حاجة استرعت انتباهي مع اني عارفة يقينا انك وخواطر وناس تانين مش كده
بس ها اتجنن واعرف النسبة الكبيرة بقى امتى واحدة منهن ها تعترف بالحق وتقول ده انا اموت لو معرفتش ومتتبعتش اللي عاوزاة
تحياتي وجمعة مباركة يا جميلة ولا تنسيني من دعوة كده بعد العصر

تحياتي

R-H-S يقول...

سؤال
ليه بتزعلي لما حد بينسي اسمك في حين ان الاسامي مبتثبتش في دماغك انتي شخصيا

مش المفروض تلتمسي العذر للي قدامك ؟؟

خواطر شابة يقول...

بداية الشكر واجب لك على كلماتك الطيبة في حقي وتأكدي ان الشعور متبادل
عزيزتي انا عكسك لا يزعجني ابدا ان ينسى احد اسمس ولان اسمي غير متداول بكثرة الكثيرون ينسونه وينادونني باسماء مختلفة اوقات اصحح الاسم واوقات لاافعل
بخصوص سؤال الزواج واضح ان هذه مسألة عامة وخير حل لها هو تجاهلهم
مرة اخرى شكرا لك على الاستجابة
ودمت بكل الود

خواطر شابة يقول...

دكتورة ستيتة
صح عزيزتي طب ولما كلنا مش فضوليين مين بيقعد بينقي الرز بقى هههه
تعرفي هي بتبقى القاعدة العامة انك مش فضولي ومش بتحب تتتبع عورات الناس بس في النهاية احنا بشر ولسنا ملائكة احنا مش لون ابيض على طول الخط لحظات الضعف الانساني موجودة ولا احد منا يستطيع تزكية نفسه او الزعم انه معصوم
دمت بكل الود والمحبة عزيزتي

البنفسج الحزين يقول...

دكتورة ولاء:
صدقيني انا نفسي مش عارفه ليه انا بضايق من اللي بينسي اسمي ...
(جايز لأني شخصيه بتعتز بنفسها قوي)الله أعلم...
عموما انا دلوقتي وبعد ما أنا شخصيابقيت نسايه جدا بقيت بالتمس العذر للي ينسي الاسم ...
بخصوص السؤال الرزل اياة
في ناس يا حبيبتي مهما غلستي مفيش فايده في مناخيرهم الحشريه
وخصوصا انهم بيلبسواتدخلهم الفظيع في خصوصياتك توب النصيحه ...
تحياتي

البنفسج الحزين يقول...

سياده الريس...
ازيك وازي اخبارك يا رب تكون بخير
أشكرك ع الدعوة الحلوة دي وربنا يتقبل دعاءك ياااااارب...ويرزقك انت كمان ببنت الحلال قريب
أشكرك بس والله انا كده فعلا مش بحب اتدخل في خصوصيات حد وبسيب الناس في حالها علي أمل ان الناس تسيبني في حالي
بس علي رأيك الناس عايشه في فراغعلي كل المستويات عاطفي وفراغ ديني وفراغ انساني ...
فكل واحد ماورهوش غير انه يشوف غيرة بيعمل ايه...
يا ريت كل واحد يشغل نفسه بنفسه ووالله ده كفايه عليه ساعتها هو هينصلح حاله ويشتغل احسن وينتج ومش هيلاقي وقت يتتبع حياة الناس ..
تحياتي

البنفسج الحزين يقول...

كارمن
أشكرك يا جميل
تحياتي

البنفسج الحزين يقول...

د.ستيته:
انا عارفه ان صعب الواحد يحكم علي نفسه لأنه حتي لو أخد موقف حيادي ومهما كان موضوعي في الحكم علي نفسه برضه ممكن يتهم بالتحيز لنفسه أو ممكن يكون هو من وجهه نظرة شايف نفسه فله شمعه منورة في كل حاجه ...

مبدأياأنا بأيد كلامك طبعا ان الحشريه والفضوليه والمناخير المندسه بين اي حاجتين في الدنيا واللي رافعه شعار فيها لا اخفيها صناعه أنثويه بحته وماركه مسجله للستات ولجنس حوا كلهم
بدليل اني انا شخصياوزي ما قلت في كلامي بعاني من الستات الحشريه دي وتدخلهم في ما لا يعنيهم في حياتي...

بس والله يا دكتورة انا كل كلمه قلتها صادقه جدا فيها بخصوص موضوع الفضوليه ده لدرجه اني بستغرب نفسي هو انا مش زي بقيه الستات والبنات ليه ؟؟؟؟
ولو كنت فضوليه صدقيني كنت هقر واعترف لأنه مكنش هيبقي ذنبي ده جين سائد في الجنس اللي بانتمي اليه عادي يعني ...
ولا ايه يا دكترة

تحياتي وبحبك

البنفسج الحزين يقول...

R-H-S
جواب ...هههههه
مش انت ابتديت كلامك بسؤال
بص يا سيدي هكرر الرد اللي كتبته في ردي علي د.ولاء
صدقني انا نفسي مش عارفه ليه انا بضايق من اللي بينسي اسمي ...
(جايز لأني شخصيه بتعتز بنفسها قوي)
الله أعلم...
عموما انا دلوقتي وبعد ما أنا شخصيابقيت نسايه جدا بقيت بالتمس العذر للي ينسي الاسم ..
تحياتي

البنفسج الحزين يقول...

خواطر شابه..
شفتي انا شاطرة ازاي وعملت الواجب أهوة يا أبله اديني نجمه بقا هههههههه
اولا اللي قلته في حقك ده صدقيني مفيهوش اي مجامله انا فعلا أقدرك جدا عزيزتي واحرص دائما علي متابعه ما تكتبين لأنه دائما شئ قيم ومفيد...
وبخصوص موضوع الاسم ونسيانه انا دلوقتي مبقيتش اضايق قوي زي زمان بقيت بعديها يعني هههههه
تحياتي

P A S H A يقول...

الفضول ده باكرهه عمى !
يا ساتر ع الناس الحشرية دي !
بالمناسبة صح انتوا طابخين إيه النهارده ؟
:D

غير معرف يقول...

:)

أنا كنت بقولك اسم تاني اول ما اتعرفنا على فكره :))

بس مش فاكراه الصراحه ...

اجاباتك جميله وأنا تقريبا كنت متوقعاها بحكم العشره :)

تحياتي

البنفسج الحزين يقول...

باشا...
هههههه
لا واضح انك بتكرة الفضول الحقيقه
اممممم....طابخين ايه؟؟
هو مادام الاكل هيبقي افتراضي برضه
(كده وكده ع النت يعني)
فاطلب اللي انت عايزة نطبخهولك....
شفت الكرم ...
أمال ايه صعايده يا بني ...

البنفسج الحزين يقول...

مروة...
ههههههه... طب كويس اني مخدتش بالي من الموضوع ده ..
أشكرك وعلي فكرة كنت هامررلك الواجب ده بس قولت جايز تكوني مشغوله في الدبلومه وكده فلو عندك وقت يا ريت تحليه...
تحياتي

sal يقول...

الحشريين الرجالة اكثر من الهم ع القلب

ردود روعة والتانى احلى واكثر تفصيلا

وبه رؤية وتقييم واقعى وحقيقى

تحياتى

Unknown يقول...

السلام عليكم

بصراحة لم أمنع نفسي من الضحك كثيرا...

أصلي حسيت (وإحساسي طبعا مش لازم يكون صحيح) من إجاباتك إنك من النوعية المفروسة دائما وتتمنى أن يحترق نصف المجتمع!!!

طبعا أنا مدرك أختي الكريمة أن غيظك مرتبط بالظاهرة التي نتكلم عنها وهو ليس دليلا على طبيعتك الشخصية.. لكن فعلا أسلوبك طريف جدا في الكتابة وعبر بوضوح عما تريدين..

عجبني جدا الجزء بتاع الجواز.. فعلا أن أكثر ما يغيظني أن يضع شخص ما تصورا لمشكلتك ولحلها كذلك وربما يتضايق لأنك لم تأخذي بحله وكأنه على علم بكل المتغيرات والتفاصيل في حياتك...!!!

تحياتي أختي الكريمة..

البنفسج الحزين يقول...

sal
أكيد في حشريين رجاله كتير بس بالنسبه لي أنا معظم اللي بتعامل معاهم عن قرب ستات فبالتالي دول نوع الحشريين اللي بقابلهم ...
أشكرك جدا...
حقيقي بيسعدني دايما تعليقك
تحياتي

البنفسج الحزين يقول...

ماجد القاضي:
ههههههه ايه ده هي ردودي كوميديه للدرجه دي المهم انا مبسوطه قوي اني عرفت اخليك تبتسم...
بالنسبه لاحساسك يمكن يكون معاك حق انا فعلا متغاظه ومفروسه من الناس اللي بتتدخل في شئون وحياة الناس الخاصه وصدقني والله هما بيبقي فيهم اللي يكفيهم وحياتهم بايظه أكتر من اللي بينصحوة بكتير ...
بس تقول ايه بقا داء بعيد عنك
بس مش لدرجه اني باتمني يحترق نصف المجتمع كده مش هبقي مفروسه كده هبقي دراكولا...

بشكرك جدا ...أسعدني مرورك

تحياتي

حاجات جوايا يقول...

ههههههه اجاباتك فعلا شبه اجاباتى جدا
ده حتى السؤال اللعين اللى بيتسأل عندك
برضه فيه الكلمتين الغلسين
لسه ؟
وليه ؟

بجد حاجة تخنق وتنرفز
يحصل ايه يعنى لو كل واحد اهتم بنفسه وبشئونه وركز فيهم
والله كان حالنا انصلح وبقينا من دول العالم الاول
تصدقى فعلا ان اهم ملامح العالم الاول ان كل واحد فى حاله ومحدش يعرف حاجة عن حد
لكن العالم التالت بتاعنا بقى لازم يبقى فيه حشريين وفضوليين وناس تخنق وتنرفز وتنم وتغتاب
امال هو تالت لييييييه ؟

بالنسبة لسؤال لسه متجوزتيش؟
متحوطيهوش فى دماغك خالص
لان اللى بيسأل مش بيسال مستعجب ولا مستغرب ولا شايل همك ولا جايبلك عريس
اللى بيسال بيسال من باب الرخامة مش اكتر

والدليل انك لما هتتجوزى هيسألوكى
هو انتى لسه مخلفتيش
ولو اتاخرتى فى الحمل تبقى تروحى تكشفى وتشوفى العيب من مين

ولما تخلفى مش هيرحموكى
وهيتدخلوا فى كل حاجة تخصك وتخص البيبى
كان الناس كلها بقوا دكاترة اطفال
ده غير الزن على دماغك عشان تفطميه
وبعدين الزن تانى عشان تخاويه
اوووووووووف
ناس عايزة محرقة جماعية والله
تحياتى ليكى حبيبتى