topbella

الجمعة، 15 يناير، 2010

نتائج هامه جدا...

سلام عليكم...

دلوقتي جه وقت تحليل اراء حضاراتكم (اللي عرفتها طبعا من خلال تعليقاتكم)

وفرزهاعشان نوصل للسبب الحقيقي

في انحدار مستوي الأخلاق في الشارع المصري...

وبناء عليه نقترح الحلول اللي ممكن نعملها

عشان نرجع الاخلاق تاني لشارعنا ولنفوسنا...

وده طبعا علي أساس ان الشارع

ماهوالا مرايه بنشوف فيها اخلاقنا وصلت لفين ...

ممكن نلخص الاسباب اللي حضاراتكم قولتوها في الاتي:

1)ضياع الهوية ...
2):
غياب القدوة ...

3) التحولات الاجتماعيه والمعيشيه التي مر بها المجتمع المصري:

(هذا السرد الرائع ورد في تعليق بحر الالوان)

بدءا بالمجتمع الزراعيالمطعم بملامح الدولة البيروقراطيه التي تحكمها دولة الموظفين

حيث كانت هنالك سمات عامة وواضحة لفئة المزارعين او الموظفين او التجار .....

وكان هناك درجه من الترابط والتقارب ما بين تلك الطبقات و علي مستوي الاسرة الصغيرة

كان امرا فاعلا في تماسك هذا العرف ...

وباتجاه المجتمع المصري نحو ملامح المجتمع الصناعي مع بدايات الثورة

ثم نحو مجتمع الاستهلاك مع بدايات عصر الانفتاح

وصولا الي مجتمع الفردية المطلقة والذي نعيشه حاليا ...

كل ذلك أدي الي انهيار الملامح القديمة للمجتمع المصري

التي كان يسيطر عليها العرف بشكل رئيسي

وتحول هذا العرف الي مجرد قواعد بالية ومحصورة في نطاقات ضيقة للغاية .....

4):الاحساس بغياب العدالة ....

وهو شعور يغذي كل ما هو قبيح ....

سواء الانتهازية او الفوضي او النعرات الطائفية او حتي الطبقية والعنصرية

واحساسنا ان بلدنا عندها إمكانيتها وقدراتها ومواردها كبيرة جدا ووفيرة

ولكن الوفرة دى بتتوزع توزيع غير عادل

وعشان كده كل واحد بيحاول ياخد حقه بطريقته الخاصة

بأنه بياخد حتى اللى مش من حقه حتى ولو بشكل غير شرعى

واصبح لكل منا له قانونه وحدد كلا منا لنفسه تشريعات ووحدود طبقا لقانونه

(وده كان كلام Eng:elsayed)

وكل فرد او فئة تستلهم الشريعة التي توافق هواها ....

ويستطيع الفرد ان يلتزم بالعرف متي احب او ان يتملص من اوامره متي اراد...

يعني زي مابيقول Eng:elsayed كل واحد فينا بقي رئيس جمهورية نفسه...

5):انغماس المصريين والعرب عموما في النزوات والشهوات:

فنسوا دينهم وسماحته وقواعده واصوله حتي العادات والتقاليد والاحترام

وكل أصناف التربية الحسنة فنزع الله الحياء من بناتنا

والشهامة والنخوة من دماء رجالنا

وأصبحنا كالعشب النئ موته يشبه حياته...

(وده كان رأي الاستاذ أحمد الصعيدي)

أما اراء الاخوة الغير مصريين في الموضوع:

جاندني من غزة : بتسأل باستغراب اذا الامور فعلا وصلت عندنا للدرجة دي

وبتقول لو فعلا كده تبقي مصيبه...

وانا بدوري باجاوبها اه للأسف يا جاندني واكتر كمان وطبعا

اوافقك الرأي انها مصيبه...

مستر حازم من غزة... علق علي فكرة تقديرنا وتعظيمنا للممثلين وتجاهل العلماء والناس اللي بجد تستحق التكريم

وقال ان المشكلة ان احنا بشكل عام نعطي من لا يستحق الاهمية اكثر مما هو يستحق...

خواطر شابه من المغرب :

لا تري اختلاف بين ما يحدث في شارعنا والشارع المغربي

وتقول مشاكلنا واحدة والاختلافات بسيطة جدا المشكلة اننا موحدون

فقط في تخلفنا ومشاكلنا ...

هذا فقط هو الذي نجحنا في ان نتوحد فيه...

اما ما فيه الخير والمصلحة فالفرقة هي شعارنا للاسف...

ودلوقتي بعد ما عرفنا الاسباب لازم نقترح الحلول :

في حلول في ايدينا احنا يعني ممكن كل واحد فينا ينفذها ويبدأبنفسه وهي:

1):تعميق الانتماء في نفوسنا لبلدنا كل واحد فينا يراجع تاريخ بلده كويس

( ويتناسي شويه الحال اللي احنا فيه) وخصوصا اوقات العزة والانتصار والقوة

عشان يعرف أو يتذكر قيمه مصر الحقيقيه والتاريخيه

بعيدا عن محاولات التشويش والتقليل من الشأن التي نمر بها الان

فالتاريخ لا يكذب ابدا لأنه ماضي والماضي لا يعود...

2):كل واحد فينا يدور علي القدوة والمثل الأعلي اللي بجد

حواليه ويراجع تاريخه ومسيرته وازاي وصل للي هو فيه

ويحاول يمشي في نفس طريقه...

وصدقوني أكيد هنلاقي كتير مصر مليانه ناس زي الفل ...

3):استرجاع فكرة العمل الجماعي وروح الفريق اللي فقدناها

(يد الله مع الجماعه)

والحلين الجايين دول طبعا مش بايدينا دول بايدين اللي حاكمينا

ومش هيحصلوا الا لو خلصت النوايا بتاعتهم للمصلحه العامه

للوطن مش لكراسيهم ...

4):قانون نابع ومتوافق مع البيئة المصرية , ومستمد من منابعها الوسطية سواء عرفا او شريعة .....

والاهم بالطبع ان يكون القانون حاضرا دائما والكل امامه سواء .

5):شئ أساسي ومهم وضروري جدا هو فكرة الهدف القومي

صدقوني المصريين كلهم هيتوحدوا وهيرجعوا يحبوا بعض ويخافوا علي بعض

من تاني لو في هدف واحد بيجمعهم علشان في الحاله دي هتبقي المصلحه واحده...

وفي النهايه باشكركم علي اثراء الحوار

بارائكم الجميله اللي انا شخصيا استفدت منها جدا ...




هناك 18 تعليقًا:

خواطر شابة يقول...

لايكفي فقط ان نعرف الحلول نحن نعرف المشاكل ونعرف الحلول لكن أليات التطبيق هي المفقودة هذه هي المعضلة

أم .. بوبه يقول...

حلو أوى تحليل بحر الألوان .. المختصر المفيد

emymony يقول...

موضوعك جميل اوى فعلا احنا نعرف الحلول ونسبب المشاكل ولكن اين القدرة على الحل والمواجهه فاحيانا تصادمنا الظروف

P A S H A يقول...

الله ينور عليكي بجد .. موضوع حلو حلو حلو وثري وبسيط .. ربنا يبارك فيكي وفي جميع السادة الزملاء الأفاضل اللي شاركوا برأيهم في الموضوع القيم ده .. حقيقي موضوع جميل .. وبعد الكلام اللي فوق ده كله اسمحيلي أقول :

تعظيم سلام

:))

البنفسج الحزين يقول...

خواطر شابه:
معاكي حق بس حتي لو عارفين المشاكل وعارفين الحلول محتاجين نفكر بيهم بعض كل شويه وبعدين احنا قلنا ان في بعض الحلول احنا نقدر نعملها بنفسنا طب يللا مستنيين ايه كل واحد يبدأ بنفسه...

البنفسج الحزين يقول...

ام بوبه:
معاكي حق انا شخصيا عجبني تعليق بحر الالوان جدا جدا وعشان كده نشرته بالنص مرضيتش اكتبه باسلوبي او اختصرة لأنه بجد جدير بالقراءة...واضح انه مثقف ومطلع ...

البنفسج الحزين يقول...

emymony
متشكرة قوي قوي علي ذوقك
اما بالنسبه للقدرة علي المواجهه فاحنا نقدر ونقدر قوي بس احنا نشجع بعض ونبتدي...

البنفسج الحزين يقول...

سعادة الباشا:

ايه يا فندم يعني ينفع كده حجزنالك أول تعليق وبعدين ماجيتش وطلع اتوبيس التعليقات ناقص مكان...
طب مين يدفع حق التذكرة دلوقتي وانت عارف اليومين دول التذاكر شاحه قد ايه...
هههههههه...
أما بخصوص الموضوع:
انا باشكرك جدا جدا علي كلامك ...
وربنا بس يجعله بفايدة لينا كلنا يا رب...
احنا كان نفسنا تدلي بدلوك معانا(حلوة تدلي بدلوك دي مش كده) وتفيدنا باراءك وتجاربك القيمه في الشارع المصري
(أعتقد انك خبير مش كده)
بس ملناش نصيب ...

Sharm يقول...

اعتقد ان تعميق الانتماء لن يأتي بين عشية و ضحاها

mohamed ghalia يقول...

ممممممم
موضوع كبير فعلا
غياب هوية
غياب هدف
غياب التزام حقيقى بدون تعصب أو تفريط
غياب قدوة
تقليد أعمى
صعب نحصر كل الأسباب بس متهيألى ده اهمهم
وعلى فكرة عمر مكان الحالة الإقتصادية المتدنية سبب التدهور الأخلاقى

Mr.Hazem يقول...

فعلاً هذه هي رسالتي التي اود ايصالها
ودعيني ايضاَ أووكد ان الاعلام له دور باااالغ الاهمية في تسليط الضوء على ممثل معين ورفع شهرته ,
ولكن للأسف اعلامنا هابط يركز على ما هو رذيل وسيئ

بحر الالوان يقول...

مثقف !!!! بلاش الكلمة دي والنبي ... لاني تحضرني مقولة جوبلز (وزير الدعاية السياسية في عهد هتلر)حيث قال :

كلما سمعت كلمة مثقف تحسست مسدسى

ثانيا : اشكرك علي المجاملات الكتير دي ..... انا مش واخد علي كده

ثالثا : بالنسبة للحل ..... فاعتقد انني املك جزء من الحل ... تجديه هنا

http://melo-dramma.blogspot.com/2010/01/blog-post_2246.html

واشكرك مرة ثانية ...... علي هذه المجاملة التي تفوق قدري المتواضع .

تحياتي لك

البنفسج الحزين يقول...

sharm
فعلا معاك حق هياخد وقت بس المهم نبتدي...
أهلا بيك منورني...

البنفسج الحزين يقول...

محمد غاليه:
دايما منورني

مستر حازم:
اكيد الاعلام مسئول عن اعلاء شأن توافه المجتمع ووضعهم في الصدارة...ولكن لا ننسي اننا كشعوب نشارك ايضا في هذا الخطأ أحيانا عن قصد واحيان كثيرة عن دون قصد ألسنا نحن من يسموة بالجمهور الذي يدفع من قوته ويذهب للسينمات ويشتري السيديهات ...

البنفسج الحزين يقول...

بحر الألوان:
يا فندم لا شكر علي واجب وهي مش مجامله
بجد تعليقات واراء حضرتك دايما بتعمل اثراء للنقاش...
وفعلا بتنم علي اطلاع واسع ورؤيه لدي حضرتك
(مقولتش ثقافه أهوة عشان الكلمه دي بتنرفزك
هههههههه)
أشكرك ودامت لنا تعليقاتك

انا مش معاهم يقول...

من الاخر اكتر حاجه شدتني اسم المدونه

فتاه من الصعيد يقول...

اعتقد ان زوارك لخصوا كتير من امراض المجتمع ... واقترحوا حلول معقوله :)

اسفه ع التأخير ... الريدر بيخرف :)

بوست جميل

تحياتي

البنفسج الحزين يقول...

أنا مش معاهم:
هو انا مش عارفه
ده مدح ولا ذم
هههههههه
(يعني الاسم بس اللي عاجبك
والمواضيع مش عاجباك
ولا الاتنين عاجبينك ولاايه...)
بس المهم في كل الاحوال انك نورتني

فتاة من الصعيد:
ولا يهمك حمدلله ع السلامه