topbella

الاثنين، 25 يناير 2010

قارئ الأفكار


أوقات كتير باتمني تبقي عندي القدرة علي قراءة أفكار الناس

اللي بتعامل معاهم في حياتي

معرفش ليه؟ يمكن علشان أنا عموما باحب اعرف الناس شايفاني ازاي...

أو أنا في عيون الأخرين...

يمكن برضه عايزة أعرفمين صادق معايا

ومين بيخدعني ...ما علينا......

طب لو تخيلنا ان أصبح عندنا الملكه دي يعني انت تقدر

تعرف اللي قدامك بيفكر في ايه ..

فهمت حاجه ...أبسطهالك

يعني هنفترض ان العلماء اخترعوا جهاز يمكنك لما تستخدمه

انك تقرا أفكار الشخص اللي قدامك وانت بتكلمه ...

تفتكروا ياتري ده هيكون تأثيرة ايه علي علاقاتك باللي حواليك؟؟؟

ياتري اللي هتكتشفه هيوطد العلاقات دي

ولا هتكتشف حاجات تخليك تنسف العلاقات دي من أساسه؟؟

دي حوارات اتخيلتها بين أشخاص هنشوفها ...

قبل وبعد استخدام الجهاز السحري بتاع قراءة الأفكار..

ده حوار بين شاب وشابه زملاء في نفس مكان العمل:


هي شابه جميله وهو شاب وقور و أمور

لكن في بدايه حياته يعني لسه مكونش نفسه....
تعالوا نشوف الحوار :

هي:صباح الخير يا أستاذ كريم..

هو :صباح النور يا انسه نيفين...

هي:ممكن لو سمحت تفهمني الشغل ده يخلص ازاي

علشان الشغل ده جديد عليا والمدير كلفني بيه...

هو :أه ممكن طبعا مفيش مشكله...

اللي هيسمع الحوار هيقول انه حوار عادي جدا

بين أي اتنين زملاء في العمل

وده الكلام اللي اتقال علي اللسان....

أما بقا لو شغلنا جهاز قارئ الأفكارهيبقا الحوار بالشكل ده:

هي:ايه ده وده جه امته المنيل علي عينه

دانا عيني اتلوحت وانا عماله

ابص علي باب الشركه عشان اشوفه وهو داخل

ايه؟ كان لابس طاقيه الاخفا...

المهم أما اروح انكشه كده

واهو شويه الشغل اللي في ايدي ده حجه

اروح له بيها يمكن يتلحلح شويه

ويتكلم بقا جاته البلا قرفني ...

هو:صباح العسل يا مزة ايه يابت الحلاوة دي ع الصبح

ارحميني بقا الله يحرقك...

قال شغل جديد عليها قال ...

بيتهيألي كده انها حجه عشان

تقف تتكلم معاك ياد يا كريم

واقعه واقعه يعني...

هو:بس البلوزة دي أحلي م اللي كانت لابساها امبارح

التانيه كانت متخناها قوي انما دي مخلياها زي المانيكان...

هي:ايوه كده كويس انك حلقت دقنك

لما مبتكونش حالقها باحس اني باتكلم مع أبو جهل..

شكلك بيبقي وحش قوي...

لما بتحلقها بقا بيتبقي قمر شبه

الواد المضروب اللي اسمه أحمد عز

هي:ايه يا بني عينك هاتطلع عليا طب ايه واكل سد الحنك ليه

متتنيل تتكلم وعليا النعمه ماهطلب منك حاجه فوق طاقتك

هو:يا شيخه الواحد كل مايشوفك بيفتكر حاله المنيل

بقا انا لو معايافلوس دلوقتي مش كنت اتجوزتك

بدل الشحططه اللي انا فيها دي ...

منكوا لله ياللي في بالي ...يالي واكلينها والعه

وسايبينا احنا نغني ظلموة...

أفتكر كده الحوار اختلف تماما ...

**********************

وده حوار بين مذيع مشهور من مذيعي التوك شو ومسئول كبير في الحكومه ...

المذيع:ممكن حضرتك يا فندم تقولنا ايه هي أهم أولويات الحكومه في المرحله القادمه؟

المسئول: شوف أهم حاجه عند الحكومه واللي حطاها علي قمه أولوياتها

هي مراعاة محدودي الدخل ...وأظن ده واضح من تحسن أحوال محدودي الدخل

في السنوات اللي فاتت...واللي كنت باشرف فيها بتولي أعباء المسؤليه ...

المذيع:طب يا فندم تفتكر ليه محدودي الدخل مش حاسين بالتحسن اللي حضرتك بتقول عليه؟

المسؤل:التحسن تدريجي وهتظهر اثارة علي المدي البعيد ...

المشكله ان الناس دايما مستعجلين ومعندهاش بعد نظر...

المذيع: يا فندم في اشاعات بتتردد في الفترة الأخيرة ان حضرتك
بتخصص أراضي ملك الدوله لبعض أقاربك يا تري رد حضرتك ايه علي الشائعات دي؟

الوزير :لا طبعا دي اشاعات مغرضه وانا عمري في حياتي ماخالفت القانون ابدا

والشجرة المثمرة دايما هي اللي بتتحدف بالطوب

ودول ناس حاقدين عليا وعلي نجاحي...

وانا من خلال برنامجك الشهير

باهديلهم اغنيه فريد الأطرش...يا عوازل فلفلوا.....

ده طبعا كان الحوار المذاع علي الهوا....واللي اتقال علي اللسان

أمابقا لو شغلنا الجهاز العبقري بتاع قراءة الأفكار هيكون الحوار بالشكل ده:

المذيع: ارغي يا عم الأمور صدعنا بكلامك الفارغ اللي كلنا عارفين انه ضحك ع الدقون...

المسؤل:طب هاقوله ايه ده..

اذا كنت أنا نفسي من كتر ماكررت الكلام حفظته...

هواحنا خلفناهم ونسيناهم احنا فاضيين لهم

لما هنوزع فلوس البلد ع الفقرا والشحاتين احنا هيفضلنا ايه؟

جاتكوا القرف مليتوا البلد ....

المذيع: والنعمه عارف انك هتقول الاجابه دي مانا كل سنه

باعمل معاك نفس الحوار وبتقول نفس البقين دول

والحكايه بتطربق علي راس الشعب أكتر وأكتر....

المسؤل:طبعا مش حاسين بتحسن علشان مفيش أصلا تحسن...انت صدقت ولا ايه.....

المذيع: شوف بقا أنا صبرت عليك كتير وانت سايق فيها ومقضيها كدب من أول اللقاء

طب خد القاضيه بقا عشان تعرف اني كاشفك....

والنبي لافضحك وأجيب سيرة أرض الساحل اللي قاللي عليها
شبطه السكرتير بتاعك

بعد مالطش مني باكوين...
مش مهم كله عشان اجيب سبق وابقي مذيع متصيط...

الوزير : ايه ده طب وده عرف موضوع أرض الساحل ازاي دانا لسه مخصص الارض للواد ابني امبارح مافيش غير

الواد شبطه السكرتير الخصوصي بتاعي هو اللي اكيد سرب الخبر أما انك واد نتن صحيح كل ده عشان كنت واعده

ب25 باكو واديته 20 بس بتبعني عشان 5 بواكي يا معفن بس أقول ايه فيك يا شبطه يا بن بهانه هتعيش معفن

وتموت معفن عمرك ماهتبقي نصاب محترم ابدا ...

وبكده طبعا اختلف شكل الحوار تماما..

عرفتوا بقا ان عدم القدرة علي قراءة الأفكار رحمه.....




هناك 28 تعليقًا:

خواطر شابة يقول...

هذه الحالة عاشها احمد الفيشاوي في فيلم الحاسة السابعة
لكن بصراحة حتى لو كان هذا الجهاز موجود وممكن استعماله انا لن ألجأ له ابدا عالم الافكار ملك لصاحبه ومادامت الفكرة لم تخرج للعلن ولم تطبق فلا فائدة سأجنيها من الاطلاع عليها بالعكس اعتقد ان من سأخسرهم بسببه أكثر كثيرا ممن سأكسبهم فيبقى على ايه خلينا كده أحسن

فتاه من الصعيد يقول...

ههههههههههه

لا بجد موت من الضحك

بس قراءه الافكار دي نقمه موش نعمه

تحياتي

Wanda يقول...

اقراء قصة mid night sunهى صحيح مش كاملة بس
بطلها بيعرف يقراء افكار اللى حواليه :-))

بحر الالوان يقول...

اعتقد ان ملكة قراءةالافكار شئ صعب جدا علي الانسان ..... ولكن هنالك فئة اخطر من قارئي الافكار ... وهي الفئة التي لديها القدرة علي الايحاء للجماهير وهم صانعي الافكار.... هنا يكون البطل واحيانا يكون الشيطان .

اظن ان قراءة الافكار نقمة بالفعل وخصوصا افكار النساء ( سكاكين واكياس.. رعب حقيقي ).... وخير دليل علي ذلك فيلم ميل جيبسون

What Women Want

بوست رائع

تحياتي

ستيته حسب الله الحمش يقول...

ههههههههههههههههههههههههههههههههههه
اه هو ده اللي ها يحصل نصا في موضوع قراءة الأفكار

بس انا مش عاوزة الجهاز ده
لا ليا ولا للي حواليا
عاوزة اموت ولسه ليا صاحب

البنفسج الحزين يقول...

خواطر شابه
فعلا انا طول مانا بكتب البوست ده وانا في بالي فيلم الحاسه السابعه بتاع أحمد الفيشاوي وعجبتني فكرته قوي ...

البنفسج الحزين يقول...

فتاة من الصعيد:
كويس اني عرفت أضحكك
وانا معاكي طبعا انها مش بس نقمه
لا دي حاجه هتنغص ع الواحد حياته...

البنفسج الحزين يقول...

wanda:
اول مرة اسمع عن القصه دي بس هحاول
اقراها
تحياتي

البنفسج الحزين يقول...

بحر الألوان:
أكيد قراءة الأفكار مش بس صعبه لأ دي مستحيله لأن الله وحده هو من يطلع علي ما تحويه الصدور ودي طبعا حكمه كبيرة من الله عز وجل ...وانا باتفق معاك تماما في وصف صانعي الأفكار فهم اما أبطال(لو الأفكار مفيدة وخيرة) أو شياطين(لو العكس )...
أما أفكار الستات متظلمهمش مش كلها سكاكين وتقطيع
لأ دي أفكار كلها حب وحنان ورقه...(ده طبعا تحيز لجنسي)أشكرك جدا...

البنفسج الحزين يقول...

د:ستوته حبيبه قلبي :
شفتي والله دا احنا متحاش عنا بلاوي
احنا في رحمه...ههههههههه
والله معاكي حق لو فعلا في جهاز بيقرا الأفكار محدش فعلا مش هيفضل لنا صاحب...
دامت لي زياراتك وتعليقاتك يا قمر

أحمد الصعيدي يقول...

السلام عليكم ورحمة الله


سبحان الذي يعلم السر وأخفي

سيدتي تلك من الغيبيات التي لا يعلم الا الله
ولكن اسألي الله البصيرة وقتها ستتضح لك أمور كثير بدون أي أجهزة

السلام عليكم

اسمي أحمد .. لو مخانتنيش الذاكره !! يقول...

ما شاء الله . اييييييييييه ده ؟.. اسلوب راقي و ابداع يتجدد .. كتابه احترافيه نمسك الخشب :)

أول مره أزورك بس ان شاء الله مش آخر مره

و ياريت اتشرف بحضرتك على مدونتي و نتبادل التعليقات
الرابط
http://ra7alaat.blogspot.com/

شكرا لوقتك

sal يقول...

انا فى قراءة افكارك عن بعد
اقولك لو تستمرى فى الكتابة
بنفس هذه الطريقة وتجمعى كل البوستات اللى زى كده
والله حيكون كتاب اكثر من رائع

البنفسج الحزين يقول...

أحمد الصعيدي:
باشكرك جدا علي النصيحه الغاليه :

(ولكن اسألي الله البصيرة وقتها ستتضح لك أمور كثيرة بدون أي أجهزة)
دايما منورني

البنفسج الحزين يقول...

الباشمهندس أحمد:(اللي أكيد مش خايناة الذاكرة)
اولا بارحب بيك زائر جديد لمدونتي المتواضعه...
وثانيا بقا باشكرك جدا جدا علي مجاملتك وذوقك
وطبعا هاروح أزور مدونتك حالا ..

البنفسج الحزين يقول...

sal:
هههههههه
الله... الله ..هو اللي بنعمله في الناس هايطلع علينا ولا ايه...دا في حد هيقرا أفكاري أنا كمان ...
كتاب ايه بس وبتاع ايه الله يكرمك ويجبربخاطرك ياااااااااااا رب
أنا باكتب علي قدي خالص ...
احنا لسه بنقول يا هادي...
بس اوعدك لو حصل واتشهرت مش هانساكوا ابدا ...
وابقوا قابلوني في الحلقه الجايه (علي رأي كورومبو)

Manal E. AlNuaimi يقول...

ابصراحة انا قريت البوست وفطست ضحك ..

يعني الحوارين بيجننوا، ازاي حيكون الحوار باستخدام او بدون الجهاز ..:)

ده عدم قراءة الافكار نعمة نحمد ربنا مليون مرة عليها ...

البنفسج الحزين يقول...

منال:
وانا انبسطت كتير اني ضحكتك...
وباشكرك جدا علي ذوقك...
وشرفتني زيارتك بجد ...واتمني تتكرر ...
تحياتي

sal يقول...

طب والله العظيم انى جاد وصادق فيما قلت
اسلوب هذا البوست وفكرته مبتكرة تستحق البناء عليها....احلف تانى؟؟؟

البنفسج الحزين يقول...

sal
لا خلاص مفيش داعي للحلفان ...
اشكرك جداعلي تشجيعك...

blue-wave يقول...

ههههههههههههههههه
اة والله رحمه
فكرتنى بفيلم الحاسه السابعه:)

البنفسج الحزين يقول...

blue wave
منورني يا فندم...
وانا كمان باحب الفيلم ده جدا...

Lady E يقول...

ياه كل ده على التعليق :)

حاضر يا بنفسجة هعلق مش همشي من غير تعليق :)

عجبتني الحوارات اللي تخيلتيها

ولو عندي جهاز قراءة الافكار هستخدمه في اوقات معينة مش دايما

بوست جميل تسلم ايدك

اول زيارة وان شاء الله مش هتبقى الأخيرة

البنفسج الحزين يقول...

lady:
نورتيني في اول زيارة ويا ريت متكونش الاخيرة...

صفــــــاء يقول...

ههههههههههههههههه
ههههههههههههههههه
يخرب عقل كدة جهاز
الحمدلله ان مفيش كدة بجد والا كنا انفضحنا
واسلوب الكلام بيتناقض تماما مع الشخصيات وكله بيضحك على كله
ربنا يحظك ضحكتينى بجد

البنفسج الحزين يقول...

صفاء:
نورتيني جدا
ومبسوطه قوي اني ضحكتك
والحمد لله حكمه ربنا منقراش أفكار بعض عشان منتفضحش وعشان نفضل حبايب هههههههه

ENG./ELSAYED,PMP يقول...

تانى بوست اقراه
وتانى مرة اقولك خيال خلاق

أتنباء ليكى بحياة ثرية ... على المستوين ... العملى ... والخاص

سيد

غير معرف يقول...

والله يا سيدتى انتى مبدعة وكلامك جميل ومقنع ودمه خفيف
انا من راييى تعملى كتاب وتجمعى فيه ارائك
لانها ممكن نصنفها تحت الاراء الضاحكة الناقدة للمجتمع بشكل هزلى يؤدى الى قارئها بفهم عميق لما هو يحدث الى جانب احداث البسمة اللطيفة على وجهه
اشكرك