topbella

السبت، 6 فبراير، 2010

البنفسجه الحكيمه



وانا ماشيه في الجنينه....


شفت زهرة بنفسج جميله ...


من قلبي حسدتها ...وقلت يا بختها...


دي أكيد طايرة من السعادة...


والزهور اللي زيها ...ايه ممكن يعكر صفوها...


عطرها بيمتع الأنوف……


وجمالها بيسعد الألوف...


تطير فوقهاالفراشات وتحوم...


وجمالها يزيد يوم ورا يوم...


قربت منها ...


قلت أمتع نفسي بريحتها...


ولما قربت ...حقيقي استغربت...


لقيت عينيها من الحزن دبلانين....


سألتها ليه يا بنفسجه عيونك حزنانين....


ايه يا تري سبب حزنك...


دا الكل حاسدك علي حسنك...


ردت عليا بصوت مخنوق ...


قالتلي امتي يا انسان هتفوق ...


انت دايما كده يا انسان ...


يغرك المظهر ...ويبهرك المنظر ...


ما البراكين بتستخبي تحت الارض المتساويه...


والتعابين بتقرص وجلودها ناعمه وقويه...


وحضن الجبال م المعادن النفيسه ياما مخبيه...


وشوش الناس ياما خافيه حقايق ...


والحكيم ما يحكمش بالشكل ع الخلايق ...


وقالت لي اتعلم مني حكمه اليوم ...


عاشر بس حاذر ...


وصاحب أبو أصل حاضر...


اوعاك يا انسان تاني تغرك المظاهر ...


دي قلوب الناس ياما شايله م المواجع شوادر…









هناك 26 تعليقًا:

نـــــــــــــور يقول...

هى حكيمه فعلا
كلامها موزون وزى الفل
وعلى فكره اكتر حد تلاقيه بيضحك هو اكتر حد قلبه شايل هموم

sal يقول...

من المهم دائما أن نسمع ، وإذا سمعنا أن نفهم ونصغي ، وسواء سمعنا أم لا ، فمن المهم أن لا نحكم

على اى شئ بالمظاهر....
"""
اوعاك يا انسان تاني تغرك المظاهر ...

ستيته حسب الله الحمش يقول...

دي حكيمة قوي البنفسجة دي
على العموم هي من زمان همست لي بنفس الكلمات
لذلك لا أعاشر الا "بني آدمين" من أبو أصل حاضر

جميلة قوي يا أم أصل :)

خواطر شابة يقول...

فعلا معها الف حق قي المغرب المثل يقول " الزين في الدفلى وهي مرة" الدفلى نبات ذو منظر رائع لكنه مر المذاق
من يحكم على الناس بالمظاهر اكيد في الاغلب الاعم لن تكون احكامه في محلها لان المظهر احيانا يكون خادع والناس اوقات يبطنون غير ما يظهرون

فتاه من الصعيد يقول...

اكيد كل الكلام مظبوط فعلا

كلمات جميله جدااا

تحياتي

حرروف يقول...

فعلا الكلام حقيقي للاسف بيغرنا المظاهر وبتجذبناا

حكمه جميلة وخاطرة اجمل

دمتي بالف خير

بحر الالوان يقول...

الحكمة تقول ليس كل ما يلمع ذهبا ...... وعلي راي كوكب الشرق ( شوف الزهور واتعلم ) وواضح انها زهرة حكيمة فعلا .

تحياتي لك

أحمد الصعيدي يقول...

ايعيبها جمالها لأنها حزينة أم يعيبني جهلي بالاشياء

وما بين هذا وذاك تختلف الظروف

اسعدك الله

البنفسج الحزين يقول...

نور:
شكرا علي ذوقك ...وفعلا متفقه معاكي اكتر ناس شايله هموم هيا أكتر ناس بتهزر ...

البنفسج الحزين يقول...

sal:
للأسف معظمنا بتغرة المظاهر..
وبنفكر اللي بيضحك سعيد
والمكشر حزين
ومش دايما ده صح
يا ريت نسمع كلام البنفسجه
ونتعلم منها...
بيسعدني دايما مرورك

البنفسج الحزين يقول...

د.ستيته
هههه أتاريكي انتي والبنفسجه الحكيمه
أصحاب من زمان وهيا مقالتليش ...وانا أقول الحكمه دي كلها جايباها منين أكيد من صاحبتها الجميله د.ستيته...

البنفسج الحزين يقول...

خواطر شابه :
(الزين في الدفلي وهو مر)ادينا اتعلمنا مثل مغربي
عندنا في مصر مثل يحمل نفس المعني تقريبا (من شاف الباب وتزويقه دخل جوا نشف ريقه)
وفي مثل تاني (من برا هالله هالله ومن جوا يعلم الله)
حلو قوي جو التبادل الثقافي دة...ههههههه

البنفسج الحزين يقول...

فتاة من الصعيد& حروف:
أشكركم جدا علي ذوقكم

البنفسج الحزين يقول...

بحر الألوان:
شوف الزهور واتعلم ...
فعلا الزهور مدرسه بنتعلم منها الفن والذوق والجمال وتناسق الألوان...
أما بقا البنفسجه بتاعتي عندها ميزة زياده هي الحكمه...

البنفسج الحزين يقول...

أحمد الصعيدي:
لأ طبعا حزنها لا يعيبها ولكن جهل الانسان دائما هو ما يعيبه ...
مرورك الكريم يسعدني دائما تحياتي لك ...

الشعب لابد له من حكومه تشكمه يقول...

والحكيم ما يحكمش بالشكل ع الخلايق ...


وقالت لي اتعلم مني حكمه اليوم ...


عاشر بس حاذر ...


وصاحب أبو أصل حاضر...


اوعاك يا انسان تاني تغرك المظاهر ...


دي قلوب الناس ياما شايله م المواجع شوادر…


حلوه اوىىىىىىىىى بجد وكلامك فظيع

نهر الحب يقول...

بجد حلوة واسلوبك رائع رغم الحزن والمواجع
تحياتى لك

ENG./ELSAYED,PMP يقول...

خيال جميل
خيال خلاق

ما احوجنا للخيال فى كل حياتنا ... العملية منها ... والشخصية

السعادة نفسها محتاجة خيال

فلو لم نفتعل إحساسنا بالسعادة ... لن نشعر بها - رأى مكون من بعض القراءات بالإضافة الى بعض التجارب الحياتية - أرى ان ما نحس به من مشاعر واحاسيس تجاه الاشياء وتجاه العالم من حولنا يتوقف بالقدر الكبير على نظرتنا تجاه هذه الاشياء وهذا العالم

سيد

البنفسج الحزين يقول...

الشعب لابد له من حكومه تشكمه:
أشكرك جدا علي ذوقك...

البنفسج الحزين يقول...

نهر الحب:
شكرا يا فندم علي تشريفك وعلي ذوقك ..
المواجع دايما هي مفتاح الابداع...  

البنفسج الحزين يقول...

الباشمهندس سيد:
اولا نورتني وشرفتني:
معاك حق الخيال عموما شئ جميل وسر من أسرار السعادة...بس أنا عموما مش بحب الاسراف في الخيال بحب أعيش في الواقع وأتكيف معاة حتي لو مش لطيف...
تحياتي

Manal E. AlNuaimi يقول...

الاسلوب جدا جميل ..

والفكرة ايضا جميلة ..

صفــــــاء يقول...

ماكدبتش البنفسجه
بس هى جابت الحكمه دى كلها منين
انت كاتبه كلام حلو أوى وموزون
زجل او شعر عامى جميل جدااا

البنفسج الحزين يقول...

منال:
أشكرك جدا
دمتي بخير

البنفسج الحزين يقول...

صفاء:
صاحبتي البنفسجه جابت الحكمه من اللي شايفاة حواليها مش مزروعه في جنينه وكل الناس بتورد عليها هههههههه...
أشكرك جدا علي ذوقك
ورأيك في اللي انا كاتباة
وان كان في نظري
لا يرقي الي الشعر أو الزجل
هو خواطر ليس الا...

Mano يقول...

جميلة خالص
بس للأسف مهما قولتي برضو بنتخدع في المظاهر
تحياتي عالبوست الجميل
واتمني زياتك بمدونتي الجديدة
http://samtelghrob.blogspot.com