topbella

السبت، 13 مارس 2010

ترقص اة ...تطير لأ...

‏‏ هل تعلم أن:
مفيش ولا واحدة من الجامعات المصرية في قائمه أفضل 100 جامعه في العالم ...
بما فيهم جامعه القاهرة اللي عمرها دلوقتي اكتر من 100 سنه...
يا تري ايه السبب...ليه؟؟؟
سياسة التعليم الجامعي في مصر لا تهدف الي تخريج انسان محترم
قادر علي التفكير والابداع والابتكار...
‏ بل بالعكس ...
سياسة التعليم الجامعي في مصر تهدف إلي...
تخريج موظف حكومي بيروقراطي...
(عبده الروتين خبير في فنون تعقيد المصالح ووقف حال العباد) ...
أو موظف فاسد مرتشي ...
(فاتح الدرج ومادد ايديه اللي ان شاء الله هتتشوي في نار جهنم)
ولو كان صالح بحكم تربيته وتدينه (وليس بحكم تعليمه)
هيبقي موظف بيسمع الكلام فقط‏ ...
(لانه اتعلم ان طاعه رؤساءة في العمل لازم تكون عمياء وخرساء وشلاء ...
حتي لو رؤساءة دول مبيفهموش حاجه...
واحيانا بيكونوا اقل منه في التعليم والشهادة ...
بحكم انهم اترقوا ووصلوا للمنصب بحكم السن...
(حيث ان الترقيات عادة بتكون بعدد السنوات وليس بالخبرات والكفاءات ...)
ولانه عمرة ماهينجح ولا يترقي في شغله الا بالنفاق
والمحلسه لشويه القلل القناوي اللي قاعده فوق ع الكراسي...
وعلشان تتأكدوا من هذا الكلام ...
اقروا الخبرين دول...الخبرين من جريده المصري اليوم
وعددين بينهم شهور ...يعني مش ورا بعض...
بس الاتنين مفادهم نفس المعني والمغزي...
الخبر الاول ...
كتبه صحفي كبير في جريده المصري اليوم
كان بيتكلم عن مشكله واجهها ابنه الطالب في كليه الهندسه
ومجموعه كبيرة من زملاءة...اقروا وركزوا ...
(انا ناقله الخبر باسلوب الجريدة)
تقدم مجموعة من الشباب الذين يدرسون الكمبيوتر في قسم هندسة الكمبيوتر
في احدي الجامعات المحترمة جدا والغالية جدا باقتراح مبدئي لمشروع التخرج
للأستاذ المشرف عليهم ...
المجموعة الأولي لتصميم طائرة بالكامل بدون طيار ...
والمجموعة الأخري لتصميم السوفت وير للتحكم بها ...
ومن حسن حظهم هناك مسابقة عالمية سوف تقام بين طلاب كل جامعات العالم
خلال‏4‏ أشهر لنفس الموضوع ...
تحمس الطلاب والأستاذ لأن الاستفادة مزدوجة‏...
‏ مشروع تخرج‏,‏ والاشتراك في المسابقة باسم الجامعة وباسم مصر‏....
,‏وبدأت المجموعة الأولي المعنية بالتصميمات منذ شهرين العمل بجد
وبدأت المجموعة الثانية المعنية بتصميم البرامج والسوفت واير العمل
منذ أسبوعين فقط وفجأة ....دعاهم الأستاذ إلي مكتبه ...
وأبلغهم وهو مكتئب‏:‏ اصرفوا نظر هناك تعليمات محددة بعدم التفكير‏
أو وضع أي مشاريع للطلاب لتصنيع أو اختراع أي شئ يطير ...
هذا ما قاله الأستاذ بالحرف ...
خليكم علي الأرض اعملوا موقع ولا عجلة ولا حتي فيديو راقص
أو سوفت واير للفتاوي هذا المطلوب‏,‏
ثار الطلبة ثورة الشباب لماذا ونحن نريد رفع اسم مصر
نريد أن نخترع حاجة للبلد‏,‏ كان الرد ارفعوا اسم مصر في الاستاد فقط
في مباراة كرة أو في برنامج استار اكاديمي‏,‏وحاولوا مقابلة نائب رئيس الجامعة
والمطالبة برؤية تلك التعليمات مكتوبةومن أي جهة وهو علي فكرة
أستاذ فاضل ومحترم‏,‏ ولكنه لم يقابلهم وخاطبني ابني ثائرا...
لماذا لا يقابلنا قلت له هو لا يريد أن ينظر في وجوهكم
ولا تنظروا في وجهه لتروا مدي احباطه وتلك التعليمات الأمنية
سيف علي رقبته ممنوع أي مشاريع لأي حاجة تطير....
في النهاية قال لهم الأستاذ إن شاء الله لما تهاجروا وهو قريب جدا
صمموا هناك وتفوقوا وأحصلوا علي نوبل ....
ثم مصر تكرمكم وتعمل لكم حفلة راقصة ممتازة ...
واعمل وا واخترعوا هناك وارقصوا هنا فقط في مصر‏!!!‏
أنا لا أتكلم (والكلام علي لسان الصحفي)
عن قصة خيالية أو قصة مختلقة بل هي قصة حقيقية
ولكن أرجو ألا يطلب المعلومات أحد ليعاقب الطلبة‏.‏
وقبل أن اختم‏:‏ في المقابل شاهدت علي إحدي القنوات حلقة باسم
موعد في المهجر لأستاذ جامعي مصري يرأس وحدة أبحاث
محركات الطائرات في أكبر شركة في كندا‏,‏وفي نفس الوقت
رئيس قسم في احدي الجامعات في نفس البلد‏,‏
وكان الحوار ممتعا لشخص تفوق في مصر ثم استفاد منه الغرب
وهو عضو في لجنة تطوير محركات الطائرات في حلف الناتو
بجنسيته الكندية ولخص الحلقة عن كيفية الاستفادة من طلاب الجامعات
وإشراكهم في قسم الأبحاث للشركة وبأجر‏,‏ لتقديم كل أفكارهم
وإبداعهم وحماسهم لتطوير المحركات‏,‏ وفي النهاية
تبني كل من لديه فكرة جديدة مفيدة ويشعر الطالب بتفوقه ويبدع ويخلق ويفكر
ويحلق لأبعد مدي ......
في النهاية هو المستفيد والشركة مستفيدة والجامعة مستفيدة‏,‏ لا تعليق‏!!
أما الخبر التاني ...
طلاب «هندسة القاهرة» يتظاهرون بسبب إجبارهم على مشروعات تخرج بعينها...
تظاهر العشرات من طلاب الفرقة الرابعة قسم مدنى بكلية الهندسة جامعة القاهرة
، أمس، احتجاجا على محاولة إدارة الكلية فرض مشروعات التخرج إجباريا على ما يقرب من ٨٠ طالباً وطالبة، وجعل مادتى الاختيارى إجبارياً أيضا، بينما قال الدكتور حنفى الزهيرى، وكيل الكلية، أنه تم تقسيم المشروعات وفقا لمجاميع الطلاب.
وبدأ الطلاب مظاهراتهم، أمس، أمام مدخل الباب الرئيسى للكلية،
وتضامن معهم العديد من زملائهم الطلبة، ورفع المتظاهرون لافتات ورقية تعبر عن مطالبهم كتبوا عليها
«أحلامنا بتضيع عشان التقدير، خمس سنين متبهدلين وفى مشروعنا كمان تكدير»
و«لحد إمتى هنفضل عن حقنا ساكتين ونفضل على مشاريعنا مجبرين».
وقال الطلاب إن إدارة الكلية تريد إجبارهم على مشروعات التخرج
وهو ما يخالف اللوائح بالكلية، مشيرين إلى أنهم لم يعلموا من قبل
أن اختيار مشروعات التخرج يتم وفقا لمجموع.
وهدد المتظاهرون بالاعتصام داخل مقر الكلية
والإضراب عن حضور المحاضرات
فى حالة إصرار الكلية على إجبارهم على مشروعات التخرج.
ومن جانبه، قال الدكتور حنفى الزهيرى، وكيل الكلية لشؤون البيئة
وخدمة المجتمع إن الكلية تعامل اختيار المشروعات
وفقا لمجاميع الطلاب، مثل تنسيق الثانوية العامة وهو ما يتبع أيضا
فى القبول بالأقسام المختلفة فى الكلية، مشيراً إلى أن الطلاب يفهمون
الصورة خطأ وأن هذه المادة هى التى ستحدد مستقبلهم.
وأوضح الزهيرى لـ«المصرى اليوم»، إن هناك أكثر من ١٥٠ طالباً وطالبة
يريدون أن يلتحقوا بمشروع لا يوجد به سوى ثلاثة أساتذة فقط، متسائلا:
«كيف يستطيعون أن يشرفوا على هذا الكم من الطلبة فى ظل أننا ننادى
بجودة العملية التعليمية؟».
بالنسبه لي معنديش غير تعليق واحد علي الخبرين...
(لمصلحه مين ...بتهدوا أمال وأحلام الشباب ...
وتسودوا المستقبل في عنيهم ...
حسبي الله ونعم الوكيل فيكم)...













هناك 17 تعليقًا:

فتاه من الصعيد يقول...

ودي بلد اللي لما ترقص تبقى رمز ولما تضرب الكوره شلوت تبقى زعيم قومي :(

لكن العلم ملوش لازمه .... وبقا يكيل بالبتنجان ... بل يمكن البتنجان اغلى شويه ..

تحياتي

ستيتة حسب الله الحمش يقول...

ليه يا بنفسجة
ليه
ده انا حالتي كرب

سياسة التعليم الجامعي في مصر لا تهدف الي تخريج انسان محترم

لأ يا ستي
الصحيح
سياسة مصر لا تهدف إلى تخريج إنسان يفكر
السياسة تهدف لتخريج خيال مآتة

P A S H A يقول...

والدربندوخ الدربندوخ .. تارارارارارارا

كنا شباب وبقينا شيوخ .. تارارارارارارا








أو كما قالت الزيندريللا :

كيكي كيكي كيكو يا كيكي كيكو

كيكي كيكي كيكو يا كيكي كيكو

:)))

تحياااااااااااااااااتي

أم .. بوبه يقول...

هو التعليم بس إللى فيه المشكلة

دى البلد مليانة وقربت تنقع على الجيران كمان

ربنا يصبرنا يارب

شمس النهار يقول...

علي الصبح
انا عيطت في اخر البوست
لما كنت في امريكا قابلت هناك دكتور كبير جدا يشغل منصب كبير جدا
مصري طبعا بجنسيه امريكي
طفشوه هنا من مصر بأبحاثه ببابا غنوجه
وهناك استفادوا من ده كله

الغريب ان الرجل رغم اللي اتعمل فيه هنا في مصر
حزين ان مش مصر اللي استفادت منه

اه يا دماغي

سلامي

البنفسج الحزين يقول...

فتاة من الصعيد:
علي رأيك البتنجان ممكن يتعمل مسقعه باللحمه المفرومه وشوفي كيلو اللحمه بقا بكام دلوقتي ؟؟؟
يبقي علم ايه بقا اللي هيتكيل بيه...
خلينا في المهم ...ربنا يخليلنا شوبير الاعلامي خريج معهد التعاون...
وابو تريكه وابن حسن شحاته اللي مشغلينهم في شركات البترول (واللي انا لحد دلوقتي بحاول افهم ايه العلاقه بين لعب الكورة والشغل في مجال البترول )والست فيفي بنت عبدو اللي في الكويت والخليج بيرسموها جنب الاهرامات التلاته كرمز لمصر اة والله العظيم واحد راجع من الكويت قالي كده ...
حسبي الله ونعم الوكيل...

البنفسج الحزين يقول...

د.ستيته...
معلش يا دكتورة انا عارفه ان البوست ده كله تقليب للمواجع...مش ليكي بس لألينا كلنا ...
بس اعمل ايه انا قريت الخبر ده في الجرنال وضغطي ارتفع مقدرتش انشر بوست كوميدي زي العادة...

سياسه مصر لا تهدف لتخريج انسان مفكر بل تهدف لتخريج خيال مآته...
وسؤالي اللي يبدو ساذج ومع ذلك محدش جاوبني عليه ...
لييييييييييييييييييييييييه..لمصلحه مين بيعملوا فينا كده؟؟؟

البنفسج الحزين يقول...

شريف باشا هجايص...
انت كده كسبت جايزةأبلغ تعليق ...
وسلملي ع الطبله والكورة الشراب...

البنفسج الحزين يقول...

أم بوبه...
لأ طبعا مش التعليم بس انا عارفه انها خربانه من كل ناحيه ...بس نقول ايه...
(وذكر فان الذكري تنفع المؤمنين)

البنفسج الحزين يقول...

شمس النهار...
اولا اهلا بيكي زائرة جديده للمدونه
ثانيا...اسفه اني غميتك ع الصبح بس نعمل ايه بلدنا وان مكناش احنا نتغم ونهتم بحالها اللي يغم مين اللي هيهتم...
يا ريت ترجعي للبوستات اللي قبل كده فيها حاجات دمها خفيف ومبهجه بس حظك كده معايا البوست ده ...ههههه

طوبه فضه وطوبه دهب يقول...

المصالح كتير والمستفدين كتير يا بنفسج المصلحه انهم يسودا كل حاجه فى وشنا ويهدوا اى امل فى عنينا عشان ما نشوفش غير السواد حسبنا الله ونعم الوكيل

sal يقول...

يا بنفسج يا حزين

فعلا المطلوب خلق مجتمع ما بيفكرش
ولو فكر ...يبقى فى رغيف العيش
عايزين تدوينه مبهجة وحياة ابوك
ربنا يكرمك ويسعدك
تحياتى

حامد يقول...

انت لا تتكلمين عن الجامعات فقط بل تتكلمين عن كل مصر وفى كل مجال .. حسبنا الله ونعم الوكيل

البنفسج الحزين يقول...

طوبه فضه وطوبه دهب...
ان شاء الله مش هيحصل مش هنستسلم ابدا لليأس والجبن اللي زرعوة فينا ..
تحياتي

البنفسج الحزين يقول...

عزيزي sal
واحنا هنفضل نفكر في رغيف العيش وبس لحد امتي ؟
لحد مانموت...ونسيب لهم البلد مراعي خضرا يرعوا فيها لوحدهم هما وولادهم واحفادهم الله يخرب بيوتهم هما وولادهم واللي يتشددولهم...
معلش انا عارفه ان البوست ده غم وتقليب للمواجع وبصراحه كل واحد فيه اللي مكفيه...ومش ناقص...
بس اوعدك البوست الجاي هيبقي مبهج ان شاء الله ...

البنفسج الحزين يقول...

حامد...
اهلا وسهلا بيك ...نورتني,...
انا عارفه انها خربانه من كل ناحيه ...
ربنا يولي من يصلح...

The illusionist يقول...

دى حاجه قمه الروعه
طبعا ميصمموش حاجه تطير
ليه هى البلد دى سايبه يا بنفسج
عيب قوى لما نصمم حاجه بتطير
ده حرام
ده غير ان الاسلام حرم الطيران

ههههههههههههههههههههههههههههههههه
عليا النعمه عالم مش طبيعيه
وفعلا
اللى يتعلم فى مصر
ولا يفكر يشيل اسمها فى اى شئ علمى
يبقا غلطان من ساسه لراسه ويستاهل ضرب الجزمه
مصر دى بقت بتاعه هيافه بس
ومنتخب
وستار اكاديمى
ومغنيين
وانا لو واحد من الطلبه دول
وبعد ما تعبت
واجتهدت فى مشروع محترم
وبلدى قالتلى كده
عن طيب خاطر جدا
لو اسرائيل عرضت عليا نفس الفكره
هعملهالهم
على الاقل
هبقى خدمت العلم عن طريق بلد كافره بقى ولا ملحده
بلا نيله
سورى وجعت دماغك
نسيت اقول صوباع الخير