topbella

الجمعة، 11 يونيو 2010

التاج السلطاني



شوفوا بقا ...
اللي بيتابع المدونه بتاعتي يعرف أني نادر جدا لما باتكلم عن نفسي
وعن شخصيتي الحقيقيه في المدونه وباحب يكون كلامي مقتصر علي الخواطر
اللي باكتبها أو ارائي وأفكاري في ما يحدث في مجتمعنا وفي بلدنا الحبيبه وبس.....
لكن بناءا علي طلب الأستاذ فاروق اللي طبعا عزيز عليا جدا ومينفعش أرفض له طلب ...
فلازم أجاوب علي أسئله التاج اللي بعتهولي وشرفني بانه اختارني من الناس اللي
(هيدبسهم فيه) قصدي هيكلفهم بالاجابه عليه ...
لأ وايه دي أسئله بتطلب منك تفضح نفسك وتقول خبايا شخصيتك بس اعمل ايه بقا
هاجاوب وأمري لله ....

بس تعرفوا ان الانسان صعب جدا عليه انه يوصف نفسه أو يتكلم عنها....

والان اليكم التاج السلطاني....

1- اذكر اسم من طلب منك حل هذا الواجب؟
اه اللي دبسني يعني ....هوالأستاذ فاروق بن النيل صاحب مدونتي (عصفور الجنه ) و(تجاربي وحكاياتي) ....
وبعدين واجب ايه...هو احنا رجعنا تاني للمدرسه والضفاير والحاجات دي طب يا ريت والله حد طايل...

2
- اذكر القوانين المتعـلقة بهذا الواجب؟

أهم قانون في رأيي لازم يتبعه اللي يجاوب علي الواجب ده هو الصدق مع النفس....ومع الناس ...

3- تحدث عن ستة أسرار قد لا يكتشفها من يقابلك للمرة الأولى؟

اول سر: ان اللي يقابلني لاول مرة بيفتكر من طريقه كلامي اني فاهمه الدنيا والناس كويس
وان صعب حد يضحك عليا... بس في الحقيقه أنا مش كده خااااااااالص بالعكس بقا
انا طيبه جدا وبافترض دايما ان اللي قدامي صادق وعشان كده ياما اتغشيت في ناس
كنت فاكرة اني فاهماهم كويس...ويمكن بالعكس بقا لما اتخدعت واتغشيت من أكتر من حد ده
خلاني بعد كده اوهم اللي قدامي اني مش طيبه وعلي نياتي علشان محدش يضحك عليا ويعرف
اني طيبه وبصدق كل اللي بيتقال لي ...

تاني سر: ناس كتير لما يشوفوني من غير ما يتعاملوا معايا بيفتكروا اني مغرورة ....
يمكن لأني مش بفضل اني انا اللي ابتدي بالكلام ....انا باتعامل عن بعد الأول لحد ما اللي قدامي
يبدي استعداده انه يتعرف عليا وبعدين من أول مرة يتكلم معايا بكتشف لوحده اني انسانه
في منتهي البساطه وأبعد ما أكون عن الغرور والعياذ بالله .....

السر التالت:
ان كل اللي يعرفني ويتعامل معايا عن قرب بيفتكروا اني انسانه اجتماعيه جدا...
بس في الحقيقه انا مش اجتماعيه بالدرجه اللي هما متصورينها
انا باكون مرتاحه أكتر وانا لوحدي في أودتي وقافله الباب كمان ...
وباتعامل مع الناس من منطلق الاحتياج والضرورة ولأني مينفعش أعتزلهم....

السر الرابع: اللي يعرفوني بيفتكروا اني انسانه عمليه جدا....
يمكن علشان طريقه تفكيري مختلفه شويه عن اللي حواليا....
ويمكن علشان يعني أنا خريجه كليه العلوم وأخدت ماجستير في تخصص دقيق
وأحلامي وطموحاتي كلها بتنصب في البحث العلمي والشغل المناسب لطموحي العلمي....
فبيفتكروا ان الحب والجواز مش من أولوياتي في الحياة ....بس الحقيقه بقا اني رومانسيه جداااا ...
وباحلم بالحب والجواز زي اي بنت في الدنيا ويمكن أكتر شويه....


السر الخامس : أنا مريضه بداء الدقه في العمل....لدرجه الوسوسه ......
مش باعرف أكروت أي حاجه ....
ولو شيطاني وزني مرة وقالي دي حاجه صغيرة ومش مهمه فوتيها
أفضل طول الليل ضميري يحفر في نافوخي زي الشنيور من وخز الضمير .....
والنبي محدش فيكم عنده علاج كويس أنيم بيه ضميري شويه عشان أعرف أعيش في المجتمع
اللي ميعرفش يعني ايه ضمير ده....

السر السادس:
أنا شخصيه مرحه جدا باحب أهزر واضحك وبالرغم من أي هموم جوايا
مش باحب اكون نكديه في القعده مع قرايبي أو أصحابي وبقول الناس ملهاش ذنب أنكد عليها....
بس الروح المرحه دي بتخلي الناس تفتكر اني معنديش هموم أو مشاكل واني الحياة عندي بمبي بمبي ....
مع اني والله ممكن أكون قاعده مع ناس حالهم أحسن من حالي بكتير
ويرسموا الكأبه علي وشوشهم علشان خايفين من الحسد ويقولولي انا
أصلك فايقه ورايقه وانا في سري بقول ربنا يعلم مين فينا حاله أحسن من مين......

4- حّول هذا الواجب إلى ستة مدونين، واذكر أسماءهم مع روابط مدوناتهم في موضوعك؟

1-خواطر شابه
2- - فتاة من الصعيد
3-شريف باشا (مدونه هجايص)
4-sal
5-Haythem elsays
6-Mr:PRESEDENT

5-اترك تعليقًا في مدونة من حّولت الواجب عليهم؛ ليعلموا عن هذا الواجب....
علم وينفذ....







هناك 28 تعليقًا:

MR.PRESIDENT يقول...

ماشي يا ستي علي الإجابات .. ورغم إني بستندل في موضوع الواجب .. بس تحت أمرك ..
وزي كل مرة بختلف معاكي .. اظن ان الواحد بيكون إما عارف نفسه قوي ,, أو زي ما قلتي .. إن ميعرفش يوصف نفسه أو يتكلم عنها ..

نحيي الأول .. الاستاذ فاروق ..
وجاري حل الواجب

تحياتي النهائية علي الصراحة المتناهية ..

والسلام عليكو

Haytham Alsayes يقول...

علم وينفذ

الحقيقة فيه برده دعوتين مش عارف ايه حكاية التاج دة ومين اللي اخترعه بس لذيذ

تحياتي وشكرا علي الدعوة

فاروق بن النيل يقول...

أمل .......فتاة الصعيد .......
أولا أشكرك على تلبية طلبى وشخصيتك رائعة برغم إن ( أول سر وتالت سر)عكسى تماما طبعا كل واحد له شخصيته اللى بيتعامل بيها مع الناس وشكرا لك على صراحتك الذى أعتز بها

خواطر شابة يقول...

عزيزتي كانت فرصة للتعرف عليك اكثر وعلى جوانب اخرى من شخصيتك لكن صراحة هذا السؤال الثالث صعب لاأعرف هل انا التي لاأعرف نفسي جيدا او اني فقط لاأجيد الحديث عنها فصراحة لحد الان هذا هو السؤال الذي لازال يؤخرني عن الاجابة لانه صعب وان لم تستطع ان تجيب عنه بصدق فالافضل الا تفعل غير ذلك
شكرا لك عزيزتي اني كنت من ضمن من فكرت فيهم وأعدك سأفكر في اجابة لهذا السؤال واجيب على التاج ان شاء الله

Timo.. يقول...

"ناس كتير لما يشوفوني من غير ما يتعاملوا معايا بيفتكروا اني مغرورة"

ديما الناس اعداء ما يجهلون ودي سمة الناس في المجتمع المصري.. وبالنسبة للشرط الثالث انا باشترك معاك فيه (ششششش) خليه سر بيني وبينك :)

P A S H A يقول...

احم احم


مســـــــــــاء النـــــــــــور

:))

أخبارك إيه ؟؟
يا رب تكوني بألف خير إن شاء الله

بجد أحييكي على شجاعنك وصراحتك في إجاباتك على التاج اللي عرفتنا جوانب جديدة من شخصيتك :))

بالنسبة لي .. مع إني سموك اتدبست قبل كده في التاج ده عند الزميلة الفاضلة / منونه .. لكني اتشرف بإني أجاوب عليه عند حضرتك إذا سمحتي لي

:))

أما عن الستة أسرار :-

1- ما باحبش أنطق اسمي عشان حرف الفاء .. باحس إنه زي المطب الصناعي في بُقي هههههههههه

2- ما باحبش أسلم على سيدات خالص .. باسلم عليهن مجاملة .. إنما أحضان وقبلات أوك .. نو بروبليم D:

3- صموت وخجول جداً في الحقيقة .. وباتكسف لما حد يضطرني أتكلم .. لإن صوتي واطي جداً .. فباضطر أبذل مجهود عشان اللي قدامي يسمعني .. وأنا باكره الصوت العالي أصلاً والدوشة .. بيوتروني جداً .. وكمان مش باعرف أتكلم مع اتنين في نفس الوقت خالص .. باتشتت وباسرح وبافقد تركيزي

4- أكتر حاجة ممكن تلفت نظري في أي حد أقابله لأول مرة .. حذائة .. جزمته لا موأخذه !! بالذات السيدات .. أسيب الست كلها وأركز في جزمتها هههههه .. ساعات باحصل على إنطباعات من شكل الأحذية .. عشان كده كان نفسي أشتغل بتاع ورنيش (بجد مش هزار)

5- ما باحبش حد يركز في عيني وهو بيكلمني .. باحس إنه بيخترقني وبيحاصرني بنظراته .. بابقى عاوز أفقعها له أخليها له عروة جاكتة وأحسرة عليها نياهاهاها

6- أنا إنسان مزاجي جداً .. وما عنديش وسط خالص ! .. يا إما تلاقيني فرحان ومبسوط ومتفائل وديناميكي .. يا إما تلاقيني كئيب وإنطوائي ومنعزل وكسول ومع نفسي !

*****************


خالص تحياتي وعميق احترامي وتقديري وشكري لشخصك الكريم .


:))

ســـــــــلام

البنفسج الحزين يقول...

Mr presedent
باشكرك علي تلبيه الدعوة
بس تعرف ان الانسان هو أول من يستفيد لما بيتكلم عن نفسه لأنه بيعرفها أكتر ...لأن عموما الاستغراق في الشئ بيخليك متاخدش بالك من تفصيلاته فلما تعتبر نفسك حد تاني وتبتدي توصفه أو تتكلم عنه ده بيديلك الفرصه تكتشف نفسك وتفهمها أكتر ...أنا حسيت بكده
تحياتي

البنفسج الحزين يقول...

هيثم السايس..
هو فعلا تحس ان التاج ده منتشر قوي بين المدونين اليومين دول ...
ومعظمنا اتدبس فيه ...
هو بغض النظر عن الفضايح ...بس والله لذيذ فعلا بيعرفنا علي جوانب جديده من شخصيات المدونين...
وبعدين انت ناوي تهرب من الواجب والا ايييه؟
جاوب والا هابلغ الناظر؟

البنفسج الحزين يقول...

الاستاذ فاروق بن النيل....
هو احنا نقدر نرفض لك طلب يا كبير...
ربنا يكرمك يا رب

البنفسج الحزين يقول...

خواطر شابه...
لا عزيزتي بالعكس ساعات من كتر ماحنا فاهمين نفسنا بيبقي صعب علينا نبوح بأسرارها لأننا دايما عايزين نحافظ علي البرواز الجميل اللي الناس راسمينه لينا كلنا كده علي فكرة...
عزيزتي أنا لا أضغط عليكي للاجابه علي الاسئله ولكن حاولي الاجابه حتي مع نفسك من غير ما تنشري الاجابات ...هترتاحي نفسيا صدقيني...ربنا يكرمك ويفرح قلبك يا رب

البنفسج الحزين يقول...

شريف باشا...
اولا انت مختفي ليه؟؟؟
بقالك كتير مش بتنشر حاجه
غير اني دخلت مدونتك من كام يوم لقيتك شايل كل البوستات القديمه...
ليه بقا الحركات دي؟؟؟
ده كان العتاب...

نرد بقا ع التعليق ...

مســـــــــــاء الفل
انا بخير الحمد لله وباشكرك جدا جدا علي تلبيه الدعوة وعلي الصراحه المتناهيه ....
مش قادرة أفهم حرف الفاء مزعلك في ايه ..بس لو مضايفك نشطبه خالص من حروف من اللغه العربيه يا كبير....
ههههههههه

وفعلا معاك حق انا برضه شايفه ان
مفيش اي داعي للسلام باليد بين الرجال والسيدات ....

صوتك واطي امممممممم هي نادرة شويه بين الرجال....
رقم 3 دي فيها جزء مشترك معايا...
(مش باعرف أتكلم مع اتنين في نفس الوقت خالص .. باتشتت وباسرح وبافقد تركيزي)
أنا بقا مش بعرف أعمل حاجتين في وقت واحد عموما....

موضوع الجزمه ده لطيف قوي فكرني بالفيلم بتاع فؤاد المهندس وشويكار
فاكر الفيلم ده...
سلام ومن فضلك ما تقفلش المدونه وارجع اكتب فيها تاني

*****************

البنفسج الحزين يقول...

Timo
اه...اه
قصدك يعني تقول انك زيي مش اجتماعي وبتتعامل مع الناس للضرورة والناس فاكرينك اجتماعي وكده...
(ششششش) شفت انا بحفظ الأسرار ازاي ...
تحياتي سلااام

sal يقول...

البنفسج المبهج
شكرا لدعوتك الكريمة
اقدر واثمن علاقاتى فى مجتمع التدوين
ولذا فلا زلت فى حيرة من امرى

ربنا يسهل
تحياتى وتقديرى

حاجات جوايا يقول...

ما شاء الله
انتى انسانة جميلة وبسيطة يا بنفسج
ربنا يبارك فيكى

دمتى بكل الخير

غير معرف يقول...

ثقافة الهزيمة .. حلوة يا بلدى

فى كتاب داخل مصر"Inside Egypt": أرض الفراعنة على شفا الثورة الذى صدر عام 2008 يقول كاتبه الصحفي الأنجليزي جون برادلي عن مستقبل مصر أنه على رغم من بعض النجاحات الاقتصادية ألا أن توزيعها تم على من أرتبطوا بالنظام فقط دون أن يصل ذلك لباقي الشعب مما أدى"زيادة الحنق" بين المصريين. ويشير الكاتب إلى رؤيته في زياراته المتكررة لمصر كيف مثلا أن عدة ملايين من الثروة المصرية تنفق لأنشاء المصارف وتقديم المياه للقرى السياحية والفنادق الفاخرة التي يستخدمها السياح الأجانب والأغنياء المصريون فقط "في حين يموت الألاف المصريين كل عام نتيجة تلوث المياه التي تصل لهم"...

باقى المقال ضمن مقالات ثقافة الهزيمة بالرابط التالى www.ouregypt.us

و لايفوتك زيارة صفحة من الشرق و الغرب فى نفس الرابط و به الكثير من المقالات الجيدة.

المجاهد الصغير يقول...

السلام عليكم
اجوبه جميله
دمتى فى رعايه الله حبيبتى

البنفسج الحزين يقول...

sal
اقدر تقديرك لعلاقاتك فى مجتمع التدوين...
واللي انا بالتالي جزء منها
بس ليه بقا انت في حيرة من امرك
توكل علي الله يا بطل دا مجرد تاج
الدنيا مش تتهد يعني.....

تحياتى وتقديرى

البنفسج الحزين يقول...

حاجات جوايا:
أشكرك جدا...
انتى الأجمل ....
ربنا يكرمك يا رب...
أتمني تتكرر الزيارة ان شاء الله

البنفسج الحزين يقول...

غير معرف...
أشكرك جدا علي المقال اللي باتفق تماما علي الكلام الوارد فيه وان شاء الله هحاول ادور علي الكتاب واقراة بالتفصيل لأن واضح انه كتاب قيم...
وشكرا علي الرابط القيم
تحياتي

البنفسج الحزين يقول...

المجاهد الصغير:
أشكرك جدا وان شاء الله يدوم التواصل
تحياتي

فتاه من الصعيد يقول...

ابصم بالعشره انه كله حقيقي :)

وصل التاج وجاوبت يا ستي :)

تحياتي

ali younes يقول...

الاخت الفاضلة
ارفع لسعادتك كل احترام وتقدير وشكر وعرفان و و ...
وذلك لتشريفك لي بمدونتى المتواضعة
سيدتي كنت انظر واشاهد كثير اسم مدونتك وكنت لا أستطيع ان اطاوع نفسي بالدخول اليها , لية بقة دة طبعا سر بس هاقولة.
انا طول عمري بين وبين اللون البنفسج سر غريب وخطير ولا اعلم ما هو كل ما اعلمة انني اذا كنت في طريق ورئيت اي زهرة لونة بنفسج تشدني اليها بطريقو تحكمية تسلطية وتقودني ولا اعمل السبب ولا السر , حتي اذا كنت مع اى صاحب لي في الطريق او مجموعة اصحاب اراها تنظر الى وتكلمني ولكن لا أحد من زملائي يشر بذلك وكأنها تدخل في اعماقي الداخلية بدون اذن ولا استطيع ان اتجكم في ذلك .
المهم هذا هو السبب لخوفي من الدخول لمدونتك عشان انتم اصحاب وانا ما أحبش حد يتحكم فية وهى الوحيدة بتتحكم فية .
كمان عاوز اقول حاجة تاني كل المعلومات التي ذكرت في التصريح بشخصيتك انا ها أنسخة واحط اسمي عليها مع تغيير طفيف

ارجوا من حضرتك وجميع الزوار ابداء الرئي والمشاركة في الموضوع الطروح والمهم في مدونتي الثانية الحقيقة

الحقيقة
ali-younes.blogspot.com
مصر هى ..
ali-younes2.blogspot.com

م/علي يونس

البنفسج الحزين يقول...

الأستاذ الفاضل
م/علي يونس

اولا باشكرك انك قولتلي علي السر الخطير اللي كان مخوفك تفتح المدونه بتاعتي...
هههههه....

وباطمنك بالنيابه عن صاحبتي زهرة البنفسج اللي بتقولك انها بتجذبك اليها علشان هي زهرة رقيقه بتحب الناس مش علشان تتحكم فيك لاسمح الله ....خدت بالك أنا جايه أهدي النفوس بينكم أهوة وأوضح وجهات النظر ...
هههههه

بس معقول في حد في الدنيا مشترك معايا في كل الصفات والله دي حاجه أسعدتني ...حسيت اني مش لوحدي اللي كده ....

وبالنسبه للموضوع المطروح في مدونه حضرتك أنا ابديت رأيي فيه بالفعل ..
تحياتي لحضرتك واتمني دوام التواصل

البنفسج الحزين يقول...

فتاة من الصعيد

شهادتك علي صراحتي أسعدتني
لانك عرفتيني عن قرب
وباشكرك تاني علي تلبيه الدعوة
تحياتي

(ست* جنى* الحسن) يقول...

سلامو عليكو..
واضح انك شخصية علمية معملية جدعة.
احييكى على صراحتك.
ربنا يفرح قلبك ويسعد ايامك ويعزك.
انى احبك فى الله

البنفسج الحزين يقول...

ست*جني*الحسن:

وعليكم السلام
اشكرك جداعلي التعليق الجميل ده...
وعلي الدعاء ليا ...
واهلا وسهلا بيكي في المدونه
أحبك الله الذي أحببتني فيه...
أتمني دوام التواصل

Sharm يقول...

اجابات جميلة

البنفسج الحزين يقول...

sharm
أشكرك جدا
نورتني