البوست ده كنت كاتباة قبل البوست اللي فات...
هو صحيح البوستين بيتكلموا عن الشارع المصري ...
بس التناول مختلف تماما...
انا فضلت انشر الصور المضحكه الأول...
عشان نضحك شويه ونقعد نمدح
في نفسنا شويه ونقول المصري
دمه خفيف وابن نكته والحاجات دي ...
وخلاص ضحكنا ودلوقتي جه وقت الجد...
****أن أن أه***
أنا دايما باسأل نفسي: هو احنا ليه بنلوم دايما علي كتاب الدراما
وكتاب الافلام انهم بيظهروا الشعب المصري في الافلام المعاصرة ...
في صورة شعب عشوائي وألفاظه نابيه؟؟؟
زي أفلام خالد يوسف مثلا( حين ميسرة وهي فوضي )
مع تحفظي الشديد جدا علي أفلام هذا المخرج...
يعني السؤال هو مين اللي بيستقي معلوماته من التاني
يعني مؤلفين الدراما بياخدوا من الواقع ويكتبوا ؟؟؟
ولا الناس بتتأثر باللي بيتقال في الدراما وبتقلدة؟؟؟
يعني هل السناريست في الافلام دي بيبالغ في فجاجه الالفاظ اللي
بتتقال علي لسان الابطال اللي هما بيمثلوافي الفيلم عامه الشعب المصري...
ولا فعلا هوده الشعب المصري دلوقتي...
لما بحاول ألاقي اجابه علي السؤال ده: بقول لنفسي
طب امشي في أي شارع في اي حته في مصر النهاردة...
حتي لو في حي راقي بلاش عشوائي...
واسمعي الالفاظ اللي تلات أرباعها خادشه للحياء...
و بتتقال علنا...
*********
بلاش كده: مين فينا دلوقتي بيشوف راجل يقف ويقعد ست أوبنت
في المواصلات العامه...
نادر جدا
***********
افرض انك اتعرضت للسرقه النهارده
وانت ماشي في الشارع هل هيحصل المشهد
اللي بنشوفه في افلام زمان بتاع الناس الكتير
اللي بتجري ورا الحرامي
وبتقول حرامي حرامي ...
عشان يسلموة للشرطه...
في حد أصلا هيبص عليك
ولا يهتم باللي حصلك...
كام واحد؟؟؟
وحتي لو وقف وسألك ايه اللي حصل
هيكون علي سبيل الفضول لا أكثر
وبعدين كله هيقول وانا مالي
وانا أدخل نفسي في مشاكل ليه ...
*********
ليه اختفت بينا بعض كلمات الترحيب
والمجاملات الاجتماعيه الرقيقه
واللي مش هتكلفنا أي حاجه
اتفضل ... شكرا ...
من فضلك ... لوسمحت...
ده حتي قيم زي:
العشرة...والجيرة ...والعشم
والشهامه... والجدعنه...الخ الخ الخ...
معدش ليها أي اعتبار في مجتمعنا الحالي...
ليه بقا الاعتبار الوحيد دلوقتي للمصلحه وبس...
**********
ليه مش عايزين نعترف ان احنا كشعب اتغيرنا...
وان كتير قوي من القيم والاخلاقيات
اللي كنا بنتميز بيها زمان ضاعت مننا وانقرضت...
والباقي بيعافر وفي طريقه للانقراض...
أنا كاتبه البوست ده بجد عشان نفسي أعرف السبب
ايه اللي خلانا اتغيرنا للأوحش قوي كده...
طبعا أنا مش باعمم لسه في ناس كتير محترمه
ومهتمه قوي بالأخلاق والقيم أنا باتكلم بوجه عام
ليه حصل تراجع وانحسارللأخلاق والقيم...
في مجتمعنا المصري المعاصر...
ومحدش يقولي السبب الفقر :
ايه دخل انعدام الأخلاق في الفقر
طول عمر الشعب المصري
أغلبه والسواد الأعظم منه فقرا
ويمكن أكتر من دلوقتي كمان...
بس كانت دايما الاخلاق فوق كل اعتبار...
ومحدش يقولي الجيل الجديد والشباب:
هو اللي مش مهتم بالأخلاق:
والدليل علي كده واسألوا كل البنات
بذمتكم وانتوا ماشيين في الشارع
أكتر المعاكسات بتيجي من الشباب
ولا من الرجاله الكبار اللي متجوزين
وعيالهم قدكوا...
يا ريت لو حد فيكم عنده تفسير أو تحليل للظاهرة
دي يفهمني ويكسب فيا ثواب...
أو حتي لو حد اتعرض لمواقف تخص
موضوع الاخلاق في الشارع المصري يحكيهالنا ...
والي اللقاء في بوست جديد ان شاء الله...
ملحوظه هامه:كل البوستات التي تندرج تحت title
موضوع للمناقشه مثل هذا البوست هارد فيها علي تعليقات
حضارتكم في البوست التالي...عشان اقدر اقدم لحضارتكم
ملخص لما توصلت اليه حاله النقاش والحوار بيننا...
أشكركم وباتمني تواصلوا التعليق وابداء الاراء...
.jfif)
هناك ١٤ تعليقًا:
ممكن أحجز أول تعلييييييييييق
عقبال ما أقرأ ؟؟
:))
ضياع الهوية يمكن
ضياع القدوة جايز
تعرفي يعني ايه اجيال من اولنا وانتي نازلة مفيش امامها قدوة حية عدلة؟
معندهاش icon تبص عليه بتقدير
حتى لما يطلع حد عدل
تتضافر جهود الحكومة والصحف الحكومية في تهميش صورته او تشويهها علشان برضه نرجع تاني نقول محدش عدل
ربنا يستر
ها نغطس اكتر من كده ايه
ده احنا وصلنا لمثلث برمودا الغامض
تحياتي ومساءات العسل على عيونك يا جميل
القضية لا علاقة لها بالفقر او الرفاهية ....وانما لها علاقة مباشرة بالتطورات التي تحكم المجتمع ....فالقواعد التي تحكم اي مجتمع هي :
1- الشريعة
2- العرف
3- القانون
واذا نظرنا للمجتمع المصري فان تحوله من ملامح المجتمع الزراعي المطعم بملامح الدولة البيروقراطية التي تحكمها دولة الموظفين قدانهارت ملامحه القديمة التي كان يسيطر عليها العرف بشكل رئيسي حيث كانت هنالك سمات عامة وواضحة لفئة المزارعين او الموظفين او التجار ..... كما ان درجة الترابط والتقارب ما بين تلك الطبقات او علي مستوي لاسرة الصغيرة كان امرا فاعلا في تماسك هذا العرف .
وباتجاه المجتمع المصري نحو ملامح المجتمع الصناعي مع بدايات الثورة ثم نحو مجتمع الاستهلاك مع بدايات عصر الانفتاح وصولا الي مجتمع الفردية المطلقة والذي نعيشه حاليا ..... جعل هذا العرف مجرد قواعد بالية ومحصورة في نطاقات ضيقة للغاية ..... فكل فرد او فئة تستلهم الشريعة التي توافق هواها .... ويستطيع الفرد ان يلتزم بالعرف متي احب او ان يتملص من اوامره متي اراد .
كل ما سبق خلق حالة من الاحساس بغياب العدالة .... وهو شعور يغذي كل ما هو قبيح .... سواء الانتهازية او الفوضي او النعرات الطائفية او حتي الطبقية والعنصرية ....الخ
لهذا فالحل هو في قانون نابع ومتوافق مع البيئة المصرية , ومستمد من منابعها الوسطية سواء كانت عرفا او شريعة ..... والاهم بالطبع ان يكون القانون حاضرا دائما والكل امامه سواء .
تحياتي لك
انا ممكن احترم بلدى لما تكون إمكانيتها ضعيفة ... بس بتبذل أقصى ما عندها لجميع أبنائها بشكل متكافىء ... ما هو محدش بيكره أمه وأبوه لأنهم فقراء
بس مش هقدر أحترم بلدى لما تكون إمكانيتها وقدراتها ومواردها كبيرة جدا ووفيرة ولكن الوفرة دى بتتوزع توزيع غير عادل
وبالشكل ده كل واحد بيعبر عن عدم إحترامه ده بطريقته الخاصة
وبيعبر بشكل إستعاضى ( من إستعاضة ) عن عدم أخذه لحقوقه ... بأنه بياخد حتى اللى مش حقه
حتى ولو بشكل غير شرعى
ما هو مفيش شرعية لأى شىء أساسا
فتحولت أفكار كل فرد حتى ولو هذه الأفكار أخر بتنجان إلى قانونه
بحيث أضحى لكل منا قانون
حاجة كده زى قانون فارادى
قانون هوك
قانون سيد
قانون عبده
قانون شريف
قانون ...الخ زيادة عن ال70 مليون قانون
وحدد كلا منا لنفسه تشريعات ووحدود طبقا لقانونه
يخطر على بالى الان مشهد للراحلة سعاد نصر واحمد حلمى
اللى بيسرق بيروح فين
بيروح مارينا
وكذلك
جملة رئيس جمهورية نفسى
المشكلة فى موضوع الأفلام إللى طرحتيه .. إن المخرجين دول بياخدوا الحقيقة وحبشوا شوية من عندهم على شوية مبالغات على شوية مسخرات وقال إيه علشان يكون فيه مصداقية وفى الآخر بيطلع عمل متخلف ومينفعش حد يتفرج عليه علشان حرام وعيب ومفسدة للأخلاق وبيعدييييييييين الناس تدفع فلوس وتتفرج وفى الآخر العمل إللى المفروض يكون بيصلح من وجهة نظرهم بيدمر من نواحى أخرى وكله بيدمر فى كله وإللى بيصلح حاجة بيبوظ حاجة تانية وكل واحد مقتنع بإللى بيعمله
وانا مش فاهمة حاجة هههههههههه
ما بعرف اذا وصلت الامور عندكو للدرجة هادي فهو مصيبة .. !
وأنا برأيي نحن نفتقد للإنسانية . . ننسى انسانيتنا للأسف ..
عجبنى اوى موضوعك وفعلا دى مش مشكله شعب مصر بس
دى بقت مشكله اخلاق
يعنى التربيه والاخلاق مبقتش موجوده زى زمان بس بيختلف تصرفات الشعوب ف الغلط بس الاخلاق وحب ربنا اوى والضمير بقى قليل
تقبلى مرورى
تحياتى ايمى
السلام عليكم
أسف سيدتي لما سأمتبه ولمني أراه واقع
تفرغ العرب لشهوتي الفرج والبطن فنسوا دينهم وسماحته وقواعده واصوله حتي العادات والتقاليد والاحترام وكل أصناف التربية الحسنة فنزع الله الحياء من بناتنا والشهامة والنخوة من دماء رجالنا وأصبحنا كالعشب النئ موته يشبه حياته
يابلاد الهلس يا بلاد
يا بلاد نجوي فؤاد
اشكر لك حماستك
السلام عليكم ورحمة الله
د.ستيته:
الله ينور عليكي ...هياغياب القدوة دي ...
المصيبه انهم بيصوروالنا الممثلين ولعيبه الكورة علي انهم نوابغ هذا الزمان وبكده ينطبق علينا قول القائل:
اذا كانت القدوةبالدف ضاربه ..فشيمه أهل مصرالرقص...
وسلميلي ع الشيكا بيكا...
دى حاجه بقت عاديه انعدام الاخلاق تلاشى المبادئ وكل حاجه اتربينا عليها بتتلاشى مع الوقت
التغير ده ابتدى يحصل من عشرين سنه بس او ابتدى يزيد اوى
بس انا شايف برضه ان زى ما فى وحش برضه فى حلو
مش شرط نعلق على مواقف معينه بأن فيها سلبيه ومافيهاش ايجابيه ونقول ان كل ده بيحصل بشكل عام
احنا فرد واحد فى مجتمع كبير
انتا بتشوف حاجه وفى غيرك بيشوف حاجه وكلنا بنشوف حاجات مختلفه
يمكن انتا كل اللى اتعرضله خلاك تقول كده
ويمكن انا شوفت حاجه خلتينى اوافق رأيك فى حاجات واعترض فى حاجات
انا عارف ان الدنيا بقت مش تمام وبيحصل تلاشى فى حاجات كتير
اكيد انحدار الاخلاق له عامل كبير جدآ
وانعدام المبادأ عامل مساعد لكل ده
يمكن رائى مشتت شويه
لكن فى الكويس وفى الوحش
زى ما الوحش موجود بكتره هنلاقى الحلوه أكتر منه
----------------------------------
تعالى تاني .. في الدور التحتاني.
تعالى تاني في الدور التحتاني..
ناكل لحمة ضاني و نحلي بسوداني..
----------------------------------
ما جتش ليه ؟ :D
المشكلة انه احنا بشكل عام نعطي من لا يستحق الاهمية اكثر مما هو يستحق
يعطيكي العافية ياااارب
تعرفي انا لست مصرية انا مغربية لكن وانا اقرأ لم اشعر بغربة كأنك تتكلمين عن بلدي مشاكلنا واحدة الاختلافات بسيطة جدا المشكلة اننا موحدون فقط في تخلفنا ومشاكلنا هذا فقط هو الذي نجحنا في ان نتوحد فيه اما ما فيه الخير والمصلحة فالفرقة هي شعارنا للاسف
كلنا عارفين ومتاكدين ان الشعب المصرى اتغير جدا وللاسف بقى يتحرك من السى للاسواء الشارع دلوقتى بقى مرايه بنشوف فيها اخلاقنا وصلت لفين
معدش فيه رجولة ولانخوة ولاحياء من بنت ولاراجل ربنا يرحمنا
ما نعيشه الان ما هو الا نتيجة لثقافة الاستبداد
الذى نحيا تحت تأثيراته منذ عقود
هذا هو واقع القطيع
هذا هو حال الرعية المقهورة
إرسال تعليق