topbella

الأحد، ٢١ فبراير ٢٠١٠

مطعم أكل وبهججه

في شخصيات مميزةومتفرده ممكن تقابلها في حياتك مفيش منها اتنين ....

الشخصيه دي بتكون عندها صفه محوريه مسيطرة عليها بتتبني عليها كل حواراتها وتصرفاتها ......

يعني لما يذكر اسم الشخصيه دي تتبادر الي الذهن علي طول الصفه الملازمه ليها...

اتعاملت في حياتك مع شخصيات زي دي ؟؟

التلفزيون والسينما قدموا لنا كتير من الشخصيات دي زي مثلا :

مستر اكس النصاب العالمي اللي مدوخ الانتربول (فؤاد المهندس)

اللمبي (الشاب المصري ابن الحارة المصريه الصايع أبو دم خفيف)

القرموطي (الفلاحالفشار قوي مدعي العلاقات مع السياسيين والناس المهمه )

أبو حفيظه (الاعلامي المغرور اللي مش فاهم حاجه )

وتهامي باشا(منتج أفلام عصر الانفتاح ) ووديع( المساعد بتاعه)

كرومبو(المحقق والمكتشف) وطبعا ده التقليد العبيط لشخصيه المحقق جيمس بوند...

طب لو اتخيلنا حوار بين كل الشخصيات دي يا تري هيبقي ازاي..


المكان:مطعم (أكل وبهججه)

الذي يملكه تهامي باشا ...ووديع بقا هو الجرسون اللي بيقدم الطلبات للزباين ...

زباين المطعم حسب ترتيب الظهور هم اللمبي وامه فرنسا– القرموطي-المفتش كورومبو...



اللمبي: اول ما دخل المطعم :مع السلام عليكوا

فرنسا:ايه يا واد المطعم النص كم ده اللي انت جايبنا فيه ماهو انت لوكنت سمعت كلامي في حدوته شرم الشيخ

كان زمانا بناكل في الهتلون دلوقتي بس اعمل فيك ايه طالع فقري زي المرحوم أبوك...

اللمبي: ليه ياما بس كده دانا بحبك ياما...

اللمبي: مش كفايه انك لسه لابسه البطلون بتاعي ياما

وانا مرضيشت اخليكي تقلعيه وبقالي اسبوع بنام بالجاكيته بس....

فرنسا:لأ قلعهوني يا واد خليني استهوي....

راحوا علي اول طرابيزة وزاحوا الكراسي وطلعوا ملايه وفرشوها وقعدوا علي الارض

وفضل اللمبي يصقف للجرسون 3 دقايق متواصله حتي بعد ماالجرسون جه استمربرضه في التصقيف...

وديع :خلاص خلاص يا باشا انا جيت...

اللمبي:أصلك جاي مبسوط افتكرتك هتتشقلبنمرة يعني افتكرتها نمرة عاملينها في قلب المحل ...

وديع:مبتسما كالعادة...أأمرني يا باشا ...

اللمبي:انا عاوز شندوشت كبده بس تكون طازة يعني لسه البقرة

مقتوله وخارجه الكبده من بطنها ع النار علي طول

وديع:حاضر يا باشا

اللمبي: أقولك انت دخل البقرة نفسها الفرن علشان نضمن ان الكبده تستوي كويس

وديع: حاضر يا باشا

اللمبي:بس وحياةوالدك اتوصي

وديع :حاضر يا باشا

حط بصل كتير ...وفلفل كتير

وديع :حاضر يا باشا

ولا تيجي تقتل البقرة انت ...

وديع دخل يجهز الطلب للمبي...


فجأة ظهر واحد دخل رجل واحده للمحل وخرجها تاني...

وبعدين دخل راسه بس من الباب والقي نظرة ع المكان وبعدين خرجها تاني...

تالت مرة وبعد ما اطمن ان المكان متأمن ... دخل المطعم ...

اتجه ناحيه الطرابيزة اللي مديه وشها للحيطه وجر الكرسي بسرعه وقعد...

كان لابس نضارة تغطي تلات اربع وشه مش باين من وشه غير الشنبات...

وصقف 3صقفات بالعدد عشان ينده ع الجرسون :

وديع:أأمرني يا باشا


القرموطي:والنبي وحياة والدك كنت بس متأخذنيش في الكلام يعني ولو مفيهاش اساءة أدب

ولا رزاله يعني كده ولا يعني ...

وديعشاخطا: لا يا باشا مفيهاش اي حاجه م اللي بتقول عليها قول وخلصني...

هي الCIA مراقبه المكان...

وديع :ايييييييييييييييه

القرموطي:طب البرادعي مجاش امبارح سأل عليا ...

وديع :مييييييييييييين

القرموطي:والله انت شكلك كده مش عارف انت بتتكلم مع مين...

لأ مبدهاش لازم أعرفك بنفسي ...

فاكر لما أوباما جه مصر الصيفيه اللي فاتت دي واخدلي بالك انت لما خطب في الجامعه تحت القبه....

اتصل استأذني وقالي بعد اذنك يابا الحاج قرموطي محتاجين المطرح اللي تحت القبه

قد ساعتين زمن كدة...لو مفيهاش رزاله يعني ....معلش احنا بنتكلم ....

قلتله عيب تقول كده يابوالأوابيم قبه ايه اللي بتتكلم فيها ....احنا بينا كده برضوا ...

دانت لو عايز افضيلك الوطن العربي كله تقيلك فيه قد ساعتين زمن وقت العصاري ميغلاش عليك ...

بعتله رجالتي زوقوله القبه ولمعوها وخلوها تبرق أة ده كله الا أوباما ده حبيبي...

ده ميعملش حاجه ف أمريكا الا لما يشورني يا راجل داأنا اخر مرة روحت أمريكا

شالي رجل من رجول تمثال الحريه عشان الواد ابني الصغير لا مؤاخذة

كان عايز يهرش بيها معلش احنا بنتكلم يعني...

وديع:اييييييييييييييييه

طب قولي تطلب ايه عشان عندي زباين كتير في المحل...

القرموطي: والله انت شكلك مش مريحني وانا حاسس كده

انك قريب مرعي بتاع الكيليمه...

يللا ما علينا هاتلنا شويه شوربه ضفادع وكبد سحالي علي ذوقك كده

حكم أنا اصلي احب اكلي يبقي خفيف خفيف كده عشان عامل دايت ...

وذهب وديع لاحضارالطلب...

في اللحظه دي خرج تهامي باشا من مكتبه وعلي يمينه مزة بيضاء وعلي شماله مزة سمرا وألقي نظرة

سريعه ع الزباين ووجد زبون قاعد فاضي فنده علي وديع...

وديع ...يا وديع...

وجه وديع جري...

تهامي باشا:الزبون دة ايديه مش في محفظته ليه يا وديع ...

وديع:أصله يا باشا لسه داخل يا باشا وملحقتش يا باشا يعني يا باشا...

تهامي باشا :ملحقتش ؟؟؟ملحقتش ايه يا وديع...

خد ....قعد جنبه المزة دي تسليه علي ما الاكل يخلص

وديع :أستااااااااااااااااااذ

وفجأة صرخ القرموطي الحقوني ....

اه ياما اه يابا أنا كنت عارف ان الليله دي مش هتعدي علي خير....

فجري عليه تهامي باشا ووديع ....خير خير في ايه... ايه اللي حصل ...

القرموطي :أنا اتسرقت الكوفيه الصوف بتاعتي اتسرقت

دي كانت هديه من واحد صاحبي عزيز عليه قوي دي مفيش أختها في الشرق الاوسط كله ...

تهامي باشا: ليه يعني كانت هديه من مين ...

القرموطي : كانت هديه من كوفي عنان ...(مش بقولك كوفيه)

وحصلت هرجله وهيصه كبيرة قوي في المطعم ...

وعلي الفور استدعي تهامي باشا المفتش كورمبو علشان يحقق و يعرف مين اللي سرق الكوفيه ...

وانحصر الشك في ال 3أشخاص اللي كانوا موجودين في المطعم وقت السرقه

فرنسا واللمبي ووديع...

ولما سألنا الست فرنسا قالت:

كوفيه ايه دي اللي هاسرقها يا راجل يا موكوس ...

اللمبي :ياما ماتوديناش في داهيه ياما ده المفتش كورومبو لاحسن يحبسنا ...

فرنسا :اسكت يا واد بلا كورمبو بلا ابو جلمبو ...

دا انا فرنسا يعني لا أهل تلم ولا حكومه تهم ...

كورمبو : بعد ما فرنسا بعزقت كرامته ... وبعترت مواهبه الكشفيه ...

لم نفسه من سكات واستبعد فرنسا خالص وخرجها من دايرة الاشتباة ...

ولما سألنا اللمبي قال:

يا سعادة حضرت المفتش زورومبو ...

أنا اشاسا مكنتش قاعد في المطعم وقت السرقه عشان وانا قاعد لمحت واد صاحبي معدي برا المطعم

بالصتفه كان ليه عنده مبلغ كبير ...

خرجت جري من المطعم وقالتله فين ياد الخمشتاشر جنيه اللي عليك ...مبلغ كبيركبير يعني ...

وانت عارف دلوقتي الجنيه غلب الكارنيه والدنيا ضيقه ساعتك ....

يعني سياتك لو حققت حتلاقيني والله العظيم بيريئ ....

بيريئ بيريئ يعني ...

ولما جه وديع علشان كورومبو يسأله :

لاحظ كورمبو انه مخبي حاجه تحت يونيفورم المطعم اللي هو لابسه

وباين طرفها وهو مكلكع من تحت ياقه القميص ...

وهنا صرخ كورومبو وقال انا عرفت مين اللي سرق الكوفيه...

لو انتوا كمان عرفتوا محدش يتصل عشان مش هاتقابلوني قريب في اي حلقه جايه

لاني هاخد أجازة من الشغل وهاتجوز الست فرنسا اللي سحرتني وهي بتهزأني...

هي دي الست اللي كنت مستنيها من زمان ....

وهنا دخلت فرنسا مطبخ المطعم اللي اصبح بلا جرسون بعد القبض علي وديع

وخرجت بصينيه عليها كوبيات شربات ولما لقيت الكل في المطعم بيبصلها قالت في خجل :

كنت داخله أعمل كوبايتين شاي عشان نحبس بعد الاكل بس ملقيتش شاي جيبتلكوا شربات...

ولما اتكشف وديع واتعرف ان هو اللي سرق الكوفيه بتاعه القرموطي ...

حاول ينكر ورد علي المفتش كورومبو وراوغ وقال له اشمعنا...

ليه ماتهمتش تهامي باشا مهو كان معانا في المطعم وقت السرقه؟؟؟...

رد كورومبو وهوبيبص لوديع نظرة استهزاء وقال له طبعا مشكتش في تهامي لأنه صاحب المطعم وأكيد سمعته تهمه ...

وحادثه سرقه زي دي أكيد هتأثر علي سمعه المطعم وبعدين حرام منظلموش.....

( الراجل كان مشغول في مكتبه مع المزز طول الوقت يبقي هيسرق امتي )

اللمبي :انا دلوقتي عندي سؤال بعد اذنك :

كورومبو :اتفضل

اللمبي: يعني انت دلوقتي بتعاقبه عشان سرق ولا عشان معرفش يخبي اللي سرقه ...

كورومبو : شيلوا الواد ده من قدامي...



هناك ٢٣ تعليقًا:

البنفسج الحزين يقول...

فتاة من الصعيد :
أولا باعتذر لك جدا ان التعليق بتاعك اتحذف غصب عني لما كنت بعدل توقيت النشر لأنه كان مخرف حبتين ...
ثانيا :باشكرك جدا علي الكلام الجميل وده يا ستي بعض مما عندكم ...

sal يقول...

بوست جميل يا بنفسج
وفكرته اجمل

جتنا نيله فى حظنا الهباب

قاسم السماوى

غير معرف يقول...

ههههههههه

نعيد التعليق :)

جميل جدااا

حلو بجد

بسمة انور يقول...

فكرة البوست جميله

تسلم ايدك

sony2000 يقول...

بجد بوست جاااااااااامد جدا
عقبال توهامي باشا اللي مخلي مصر بتقول ايييييييوا كدا ياودييييييييع
ربنا ياخدهم
ربنا ياخدهم
ربنا ياخدهوووووووووووم
هههههههههه
تقبلي مروري وتحياتي

خواطر شابة يقول...

الفكرة جميلة والحوار مناسب لكل شخصية وانا أقرأ كنت استحضر الشخصيات امامي يسلم قلمك

ستيتة يقول...

ربنا يفرح قلبك
انا راجعة هلكانة ومش حمل نكد خالص
لقيت بوست زي السكر
انا اتخيلت اصواتهم مع الحوار
ههههههههههههههههههههههه

غير معرف يقول...

هههههههههههههههههههههه

الحلقة دى تحفة فنية بجد

Unknown يقول...

ههههههههه
حللللللوة جنااان يا فندم " يا سلام كيف انا بالمصري أجنننن ههههههه "
فتاه
بجد الك وحشة والله
اشتقتلك كتيييير كتير
انا نوعاً ما رجعت للتدوين ببطئ , فخلينا نشوفك على طول يا قمر

الله يسعدك يارب

البنفسج الحزين يقول...

sal:
قصدي قاسم السماوي ههههههه
يا فندم قر براحتك المدونه مدونتك
أشكرك جدا علي ذوقك...دايما والله رافع معنوياتي...

البنفسج الحزين يقول...

بسمه أنور:
وتسلم عينك يا قمر

البنفسج الحزين يقول...

sony2000:
أشكرك جدا علي ذوقك...
وبادعي انا كمان معاكي ...
ربنا ياخد كل اللي واكلين البلدوالعه
وسايبينها تغوص في الفساد...
لربنا ياخدهم
ربنا ياخدهم
ربنا ياخدهم...

البنفسج الحزين يقول...

خواطر شابه:
شكرا علي ذوقك...
بس كويس انك عارفه الشخصيات دي لأن مش هيفهم البوست الا اللي اتفرج علي الافلام اللي فيها الشخصيات دي علشان انا كاتبه الحوار بطريقه كلام كل شخصيه ودي حاجه كانت قلقاني ان ممكن حد ميفهمش البوست ..بس هي عموما شخصيات موجوده من فترة طويله ومعظم الناس عارفاها ...
مرورك بجد بيسعدني ...

البنفسج الحزين يقول...

د.ستيته العسل:
ربنا يسمع منك ياااااااااااااارب
وانتي عارفه ايه اللي يفرح قلبي بقا
ولا ايه يا وديع ؟؟؟
ربنا يسعد قلبك انتي كمان ياااااااارب...
وشدي حيلك كده عايزين جمعيه المرأة المتوحشه تنمو وتكبر علي ايدك وتتوحش أكتر وأكتر ...هههههههه

البنفسج الحزين يقول...

star in the sky:
(اسم جميل قوي ينفع عنوان فيلم أو مقطع من أغنيه )
أشكرك جدا واسعدني مرورك بجد ...

البنفسج الحزين يقول...

mr.hazem
هههههههههه انت تجنن بالمصري وبالفلسطيني وبكل اللهجات ...
دايما يسعدني مرورك...

أحمد عبد الحميد يقول...

بوست جااااااااامد
تسلو إيديك ياباشا

Unknown يقول...

صحيح فعلا سؤال محير

قبض عليه عشان سرق ولا عشان معرفش يخبي اللي سرقه

ما لو عرف يخبي اللي سرقه مكانش قبض عليه

البنفسج الحزين يقول...

أبو حميد:
أشكرك جدا
منورني يا فندم...

أحمد الصعيدي يقول...

هههههههههه


جميل البوست ده

واضح انك علي التليفزيون 24 ساعة


ربنا يسعدك

البنفسج الحزين يقول...

العيسوي الصغير:
مش سؤال محير ولا حاجه...
أكيد طبعا عشان معرفش يخبي اللي سرقه...
أصل عقبال أمالتك:::
كورومبو اتعين دلوقتي في وزارة الداخليه...
وماسك قضيه محمد ابراهيم سليمان...
فبعد النصب المحكم اللي شافه
بقي بيتخنق من الحراميه الاغبيه
اللي زي وديع
اللي مش بيعرفوا يستفوا ورقهم
ولا يخبوا اللي سرقوة...
وبعدين بصراحه معاة حق يتخنق من غباؤة
ويقبض عليه يا راجل ده سارق كوفيه ههههههه ...
نورتني
تحياتي...

...

البنفسج الحزين يقول...

أحمد الصعيدي:
منورني يا شاعر المدونين الهمام...
أنا فعلا باتفرج علي التلفزيون كتير بس مش لدرجه 24 ساعه ...
وبعيد عنك عندي عادة مهببه اني باحفظ حوارات الأفلام ...

غير معرف يقول...

ايه الروعة دى
واله العظيم تنفعى ولا احسن واجمل كتاب السيناريو فى العالم
انتى مثقفة جدا يا باشا والله
د هانى الحجار