بحبك أيوة وباموت فيكي
ولو نادتيني بدمي أفديكي
بس انا همي من الكيل فاض
فهابطل أخجل
وف الكلام هاستفاض
زعلان منك قوي يا بلادي
علي خاطري واخد وبنادي
بس يا ريت صوتي مسموع
دانا برضه ابنك يا بلادي
باستني مع الفرح ميعادي
وليا عليكي حقوق ... أيوة
ليه الغريب فيكي متصان
ابنك متهان ... وابن البلد
ليه عندك خيار وفاقوس
والغلبان دايما منحوس
ليه تخليني ألف وادور
ميه امضا ودور.... وعلي ورقه
وفي يومنا ييجي ألف طابور...
ليه الواسطه فيكي أساس
وابن الناس غير كل الناس
وان جينا للحق وللأساس
مش دول هما ولاد الناس
يا ما لعنت وسبيت فيكي
من ورا قلبي بادعي عليكي
والله ما عارف... تصدقي
ولا عليكي ... أزعل منك
كلمه أخيرة هادعيلك بيها
ومش هاقول غير
روحي يا شيخه
ربنا يصلح حالي وحالك
هناك ٢٣ تعليقًا:
ليه الغريب فيكي متصان
ابنك متهان ... وابن البلد
ليه عندك خيار وفاقوس
والغلبان دايما منحوس
جميله اوي يا حبيبتي
بصراحه حال البلد كله بيحزن
بس مفيش قدامنا غير اننا ندعي زيك ان يتصلح حالها وحالنا
مشكوره يا حبيبتي على إحساسك الجميل
البنفسج الحزين........
الله على الحنية اللى ماتستاهلهاش بلدنا
صحيح لازم نستحملها ماهى برضه بلدنا
وعشنا فيهاوإتربيناوهى دايمابتعاندنا
هى أمل قلوبنا وهيه رجلينا وساعدنا
لكن ليه يارب بتزلناوموش بتساعدنا
كلماتك جميلة أوى تسلمى يا" أمل"
احساس جميل :)
ادعيلها :)
اعطر تحياتي
ربنا يصلح حالي وحالك
ما اعرفش اخر الحب دا ايه
هههههه
كلام حلو واحساس احلى
تحياتى
د.ولاء
شكرا يا دكتورة ولاء علي كلامك الجميل ومعاكي حق فعلا مفيش في ايدينا غير اننا ندعيلها من قلوبنا ربنا يرفع عنها مقته وغضبه...
عمو فاروق
والله يا عمو احنا زعلانين عليها علشان احنا بنحبها بجد وغصب عنا مش بارادتنا مهما قلنا اننا خلاص كرهناها وعايزين نهاجر ونسيبها عارف عاملين زي المثل اللي بيقول ادعي علي ابني واكرة اللي يقول امين ..
تحياتي
الغاردينيا
أشكرك علي تعليقك الجميل
بادعيلها من قلبي والله بس هي محتاجه دعواتنا كلنا علشان حالها بقا صعب قوي قوي ...
sal
لا اللي ناوي يحب مصر
يبقي عارف انه بيحب من غير أمل هههههههه
وزي مانت عارف بقا
(الحب من غير أمل أسمي معاني الغرام)
لأنه مش هياخد منها حاجه ...
مصر مبياخدش منها غير اللي بيكرهوها وينهبوها وقاعدين علي قلبها...
تحياتي
على اسم مصر التاريخ يقدر يقول ما شاء
أنا مصر عندي أحب وأجمل الأشياء
باحبها وهيّ مالكه الأرض شرق وغرب
وباحبها وهيّ مرمية جريحة حرب
باحبها بعنف وبرقة وعلى استحياء
وأكرهها وألعن أبوها بعشق زي الداء
وأسيبها وأطفش في درب وتبقى هيّ ف درب
وتلتفت تلاقيني جنبها في الكرب
والنبض ينفض عروقي بألف نغمة وضرب
على اسم مصر
صلاح جاهين
انه الوطن عزيزتي
أنا بحبها بكل ما فيها...
بس ما اقدرش أدعي عليها...
هي مالهاش ذنب..
الذنب الحقيقي عليهم... وعلينا.
تحياتي على إحساسك الجميل..
ابنك متهان ... وابن البلد
ليه عندك خيار وفاقوس
دي اكتر حتا حستها وايييييييييييي
خواطر شابه
عزيزتي انا ساعات كتير بحس انك خلاص بقيتي مصريه مش مغربيه من كتر ماانتي متابعه مشاكل مصر والمصريين وعايشاها معاهم يوم بيوم من خلال المدونات ...
وزي ما صلاح جاهين قال كده بالظبط
وأكرهها وألعن أبوها بعشق زي الداء
وأسيبها وأطفش في درب وتبقى هيّ ف درب
وتلتفت تلاقيني جنبها في الكرب
وعجبي ...
تهو ده فعلا المصري عشق مصر في دمه مهما عملت فيه ومهما اتبهدل واتظلم فيها....
تحياتي
ماجد القاضي :
هقولك زي ما قلت في ردي علي تعليق الاستاذ فاروق بن النيل
احنا من كتر اللي بنشوفه فيها ممكن يفيض بينا وندعي عليها بس دعانا بيبقي عامل زي الام اللي بتدعي علي ابنها وتكرة اللي يقول امين...
تحياتي ودايما منورني بزيارتك وتعليقاتك
سوني...
مبسوطه قوي انك حسيتي الكلام
دايما كده منوراني يا سوني
اشكرك
تحفة يا بنفسجة
مش تحفة بس
تبكي كمان
كلنا عندنا حزن وكأن مات لنا عزيز اليومين دول
كل ما نقف نقع تاني
ربنا يصلحها من عنده
كنت هاكتب نفس تعليق خواطر بالمللي !
وحيث إنها مشكورة علقت لي
فبالتالي أحب أطالبها بتعليق ليها :)
لأ بجد جميلة كلماتك البسيطة الغير مصطنعة
:)
خالص تحياتي
ياه عليك
اسرتني بساطتها وواقعية كلماتها
بجد تسلم ايدك لكن زي ماقولت
صوتنا مش مسموع
تحياتي
د.ستيته:
والله معاكي حق يا دكتورة مصر اليومين دول صيوان عزا كبير وكلنا قاعدين فيه ...
ربنا يصلحها من عنده
باشا...
هههههه يعني عمر خواطر اطول من عمرك
انا نفسي وانا بكتب الكلمات دي كان في بالي كلمات صلاح جاهين وخصوصا الجزء اللي بيقول فيه
وأكرهها وألعن أبوها بعشق زي الداء
وأسيبها وأطفش في درب وتبقى هيّ ف درب
وتلتفت تلاقيني جنبها في الكرب...
وعجبي ..اييه ...دنيا
كارمن
يا حبيبتي الف شكر علي ذوقك
اما بقا صوتنا اللي مش مسموع فده لان الصوت الاعلي دلوقتي هو صوت الفاسدين والمتجبرين اللي مغطيين علي اصوات الشعب ...بس معلش مسير مصر تسلك ودانها وتسمع ولادها لان دول ولادها اللي علي حق واللي باقينلها اما اللي صوتهم عالي دلوقتي فكلها طالت ولا قصرت ايام بيعيشوها وبعدين هيروحوا زي اللي قبلهم الي مزبله التاريخ ...
تحياتي
لطيفة جدا في الواقع انا تنزيل على الأرجح. شكرا
غير معرف
أشكرك جدا بس مفهمتش الجمله دي
(انا تنزيل على الأرجح)
حضرتك تقصد ايه؟؟
كلمات اكثر من رائعة يا البنفسج الحزين
تقبلي مروري لاول مرة وان شاء الله ما تكونش الاخيرة ،،،
اختك وجع البنفسج من قلب غزة ...
إرسال تعليق