topbella

السبت، 5 مارس 2011

الف ليله وليله من وحي الثورة المصريه




بلغني أيها الملك السعيد

ذو الرأي الرشيد

أن بلدًا تدعي مصر المحروسه

قعدت تلاتين سنه في الهم محبوسه

قاعد علي قلبها رئيس ماكر

طلع عنين شعبه

والاسم قال حاكم

فقروطوارئ وأميه وجهل فاق الوصف

وأمراض مستوطنه كانت حديث العصر

مسك شئونها لناس فرتوا في الأرض

وسمعه

بعد ما كانت في السما

نزلت لسابع أرض

وطلق عليهم كلابه المجرمين

الاسم أمن والفعل ارهاب وتنكيل

فضلوا يعذبوا في كل صاحب رأي

واللي يموت ملوش ديه

وكله بأوامر القصر

وكل ما يشتكوا الغلبانين
ويقولواجعنا وشحتنا
يا حاكمنا المتين

يرد ويقول أجيبلكم منين

أتاريه يا مولاي سارق وناهب

وفي بنوك العجم كانز وزاقق

لأوالأدهي من كده وأمر

ابنه المحروس اسماله عليه

واللي كان بيرتبله يحكم بعديه

كوش وحوش بالمليارات جنيه

ومن أجلك انت وانت يا بيه

يوزععلي حبايبهالأراضي والعقارات

والشعب زي ما هو يفضل شحات
لحد يا مولاي مافي يوم سعيد

انتفض شعبها وكأنه اتولد من جديد

وبفضل شبابه المثقف الواعي

اللي ع النت قاعد وقاري

عملوا ثورة ع الظلم والفساد

وخلعوا رمز الفساد من حكم البلاد

ومن يومها يا مولاي

وشعب البلد دي خلاص خلع توب الذل

فتح عنيه وطرطق ودانه

وقرر يحاسب كل اللي خانه

وعرف سكه الانتصار

والسر ورا تنفيذ القرار

السر في الاصرار

علي كل مطلب مفيد

في خلق وطن جديد

العدل فيه حاكم

ووحده الصف جوا الميدان

وطول ما الايد في الايد

كل اللي عايزينه ان شاء الله هيتحقق أكيد


**************

وهنا أدرك شهر زاد الصباح

فسكتت عن الكلام المباح

كوكوكوكو




هناك 9 تعليقات:

هبة فاروق يقول...

تحفة اكثر من رائعة فكرة جميلة وسرد وصياغة اجمل تسلم ايديكى
ومبروك على شكل المدونة رائع

البنفسج الحزين يقول...

شكرا يا هبه ربنا يخليكي نورتيني

sony2000 يقول...

الله عليكي
كأنها حلم او قصه قبل النوم فعلا
بس يارب تكمل علي خير

البنفسج الحزين يقول...

sony2000:
طب أحلام سعيده بقا ههههه
يا رب ان شاء الله تكمل علي خير وترجع مصر اللي التاريخ كله كان بيحكي عنها أم الدنيا بحق وحقيقي ....
نورتيني

ماجد القاضي يقول...

السلام عليكم

أشكرك على لحظات المرح والابتسام وسط هذا الكم من الاضطرابات النفسية والانفعالات المتأرجحة بين شد وجذب عبر الأخبار المتنوعة عن نتائج المعركة بيننا وبين خفافيش الظلام الرابضة في كل جحر وزاوية..

تحياتي اختي الكريمة.

البنفسج الحزين يقول...

ماجد القاضي:

لا شكر علي واجب ...
معك حق فعلا نعيش جميعا هذه الأيام اضطرابات نفسية ومشاعر متأرجحه ما بين الخوف والقلق والفرحه وسط هذا الكم الهائل من الحقائق التي تكشف لنا يوما بعد يوم ووسط هذا الانفلات وعدم الاستقرار الذي نعيشه هذه الأيام ولكن كل هذا لا يعني اننا نفرح ولو قليلا بثورتناالمجيده وما أوصلتنا اليه هذه الثورة ..
تحياتي ونورتني

Noha Saleh يقول...

وتوتة توتة لسة ماخلصتش الحدوتة
تسلم ايدك حلوة بجد

أحمد المغربي 1/1/1987 يقول...
أزال المؤلف هذا التعليق.
Timo.. يقول...

بجد حلوة :)

صباحك معطر بعبير الحرية :)